JERRY OLEA
Salamat sa bangs ni Maris Racal, isang linggo nang nangunguna ang DonBelle series na Can’t Buy Me Love (CBML) sa listahan ng Top 10 TV Shows in the Philippines Today ng Netflix.
Anak ng panty! Hanggang Mayo 2024 pa ang installment sa Netflix ng mga bagong episode ng TV show nina Donny Pangilinan at Belle Mariano!
Sa tingin ninyo, tuluy-tuloy ang pamamayagpag ng CBML sa Netflix Philippines?
Streaming na rin sa platform na ito ang Jose & Maria’s Bonggang Villa nina Dingdong Dantes at Marian Rivera. Pabobonggahin kaya ito ng DongYan fans?
Siyempre pa, sa Nobyembre ay mag-i-streaming na ang Netflix original series na Replacing Chef Chico kung saan bida sina Piolo Pascual, Alessandra de Rossi, at Sam Milby.
Romcom ito, ibang-iba sa Metro Manila Film Festival (MMFF) 2023 entry ni Piolo na Mallari na isang horror thriller.
Fantasy drama naman ang MMFF 2023 entry ni Alessandra na Firefly.
“I love working with Alessandra, you know. She’s a firebolt. Pag nandiyan si Alessandra, tatahimik ka, papanoorin mo na lang siya, e,” sabi ni Piolo noong Huwebes, October 19, 2023, sa Kao Manila ng Newport World Resorts, Pasay City.
“And I’ve always wanted to work of course with my brother Sam. So it’s about culinary, very Filipino.
“We’re really happy because when Netflix commissioned to do it, ang sarap ng pakiramdam because it’s the first Filipino Netflix series.
“So ang sarap ng experience with Dan Villegas as your director. The last that I’ve worked with him was The Breakup Playlist [2015], and then Antoinette Jadaone, I’ve worked with her as well.
“So everyone just brought their fair game, and everyone just had so much fun, you know.
“It’s gonna come out in November, and we’re also so excited because it’s one way to champion our content, you know, to a more global market.”
May nuances ang karakter niya sa Replacing Chef Chico?
“Hindi. Nagpapogi lang ako!” bulalas ni Papa P.
“Nagpapogi lang ako, 'tapos kumain ako ng mga niluluto ni Alessandra.
“I was there just to really support Alessandra. I mean, whatever I did, I guess you just gave life to the story that these guys beautifully wrote.
“And maganda siya, kasi ang dami mong matututunan when you watch it.”
Siyanga pala, sa Oktubre 27, Biyernes, ang Netflix streaming ng mini-series nina Lovi Poe at Janine Gutierrez na Sleep With Me.
Ang Top 10 TV Shows sa Netflix PH ngayong Oktubre 22, Linggo — Can’t Buy Me Love, Strong Girl Nam-soon, Doona!, Jujutsu Kaisen: Shibuya Incident, Young Sheldon, Spy x Family, Lupin, I Woke Up A Vampire, Strong Girl Bong-soon, at Bodies.
Sa sampung TV shows na iyan ay ang CBML lang ang gawang-Pinoy.
Samantala, sa listahan ng Top 10 Movies in the Philippines Today ng Netflix ay tatlo ang pelikulang Pilipino.
Ang mga ito ay ang Love Me Tomorrow nina Dawn Zulueta at Piolo Pascual; Keys to the Heart nina Zanjoe Marudo, Elijah Canlas, at Dolly de Leon; at Halik sa Hangin nina Gerald Anderson at Julia Montes.
Ang Top 10 TV Movies ng Netflix PH this Sunday — Gemini Man, The Conference, Ballerina, The Devil On Trial, Nowhere, Love Me Tomorrow, Keys to the Heart, Halik sa Hangin, Last Night in Soho, at Reptile.
Sa Oktubre 26, Huwebes ay streaming na sa Netflix ang movie nina Julie Anne San Jose at Rayver Cruz na The Cheating Game.
Nasa Worth the Wait section na ang Third World Romance nina Carlo Aquino at Charlie Dizon. Hindi pa naka-announce kung kailan ang streaming nito.
NOEL FERRER
Speaking of Maris Racal, mula sa kanyang Here Comes The Groom at Marupok AF (Where Is The Lie?), then ito ngang Can’t Buy Me Love, kinakitaan siya ng higit pang commitment sa kanyang artistry.
Kaya excited din ako sa parating niyang series with Khalil Ramos na Simula Sa Gitna directed by Tonet Jadaone which will be shown naman sa Prime Video starting November 2.
I’m sure with the coming Undas long break, mas marami na namang oras ang maigugugol ng mga tao para mag-catch up sa kanilang streaming viewing.
Anu-ano pa ba ang ibang maire-recommend ninyo, mga ka-Troika?
GORGY RULA
Mahu-hook ka naman talaga sa Can't Buy Me Love. Totoo namang aliw ang karakter doon ni Maris.
Pero si Donny Pangilinan talaga ang nagdadala sa bawat episode. Sa tingin ko, magtatagal iyang nakapuwesto sa number one.
Sa mga kabadingan namang hindi bumibitaw sa Spanish telenovelang Elite, puwede niyo nang simulan ang season 7 nito. Obvious namang itong Elite ang peg ng Senior High.
Samantala, nangunguna naman sa Viu ang Unbreak My Heart na lalong naging masalimuot ang takbo ng kuwento.
Lumalaban din sa number one slot ng Viu ang Love Before Sunrise nina Dennis Trillo at Bea Alonzo.
Pero ang isa sa mas tinututukan ko ay ang Linlang sa Prime Video.
Bitin na bitin na naman ako sa episode 6 nila. Lalong gumaganda ang takbo ng kuwento, at lalo akong napapahanga sa galing ni Paulo Avelino.
Mahuhusay rin sina Maricel Soriano, Ruby Ruiz, Kim Chiu, at JM de Guzman.
Bagay rin kay Kaila Estrada ang role niya rito bilang asawa ni JM de Guzman, pati si Heaven Peralejo na lalo pang gumagaling.
Ang laki talaga ng naitulong sa ganda ng isang teleserye kung magagaling ang mga artistang gumaganap.
Magandang training ground ito kay Anji Salvacion, na malabnaw ang pag-arte sa Linlang.