GORGY RULA:
Marami ang nagulat sa pagpasok ng comedy movie na Broken Hearts Trip (na entry ng BMC Films, ka-partner ang Smart Films) sa nalalapit na 49th Metro Manila Film Festival.
Sabi ng direktor nitong si Lem Lorca, kahit sila raw ay nagulat din. Pero hindi nila matanggap ang ipinarating naming intriga na malakas daw ang producers nito, at may kapit sa kung kanino man kaya napasama ang naturang pelikula sa MMFF.
Sabi ni Direk Lem, huwag naman daw sana menosen ang entry nila, at sana panoorin muna bago ito husgahan.
Ani Direk Lem, “Parang ayoko naman i-discredit yung nagawa na trabaho ng mga tao, yung nagawa ng mga artista, mga writers natin from the original concept ni Lex Bonife and Archie del Mundo. Parang ayokong i-discredit to even acknowledge that kind of rumor.
"So, I believe na nakapasok siya because of the merits of the film. Mahuhusay yung mga artista ko. They have the track record, especially si Christian nga every year nananalo... sa magandang track records niya sa MMFF. Ang writer namin just won sa Venezuela ng writing for Siglo sa last movie namin.
“So, I have to give credit to the people behind the camera and nasa harapan ng camera na... I think we've given more than 100 percent of our time and talent here na feeling ko, deserve nilang makapasok sa MMFF. Dapat panoorin para ma-justify."
Proud si Direk Lem sa pelikulang ito, lalo na't magagaling daw ang mga artista niya. Bida rito si Christian Bables kasama sina Teejay Marquez, Marvin Yap, Petite, Iyah Mina, at Direk Andoy Ranay. May special participation dito si Ms. Jaclyn Jose.
"So far naman, after we released the trailer, we got nothing but positive feedback dun sa trailer. It's a fun film and people should be given a chance na makita nila.
“Sabi nga ni Direk Andoy, hindi siya malaking artista, pero ganun din ang mga pelikula ng CInemalaya, QCinema, CineFilipino which I am proud to be part of in the past, na maliliit na pelikula kung tawagin sa industriya, pero sila yung nagbibigay ng karangalan sa bansa.
"Bigyan niyo naman ng chance na maka-experience din kami ng mainstream na maibahagi namin sa mas maraming audience ang aming pinaghirapan," pakiusap ni Direk Lem.
Kinunan ang kabuuan ng pelikula sa iba't ibang bahagi ng bansa kung saan ipinakita ang ganda ng Kawasan Falls sa Cebu, ang Pagudpud sa Ilocos Norte, sa Mt. Banahaw, pati ang beaches sa Lobo, Batangas at ang white water river rafting sa Magdalena, Laguna.
Magastos ang pelikulang ito dahil sa paiba-iba sila ng location, kaya hindi ito basta-bastang indie film. May budget ang producers, di ba?
"Ang masasabi ko lang, napakahirap pala mag-shoot ng ganitong travel. Buti na lang magagaling ang mga producers namin, from our line producer, supervising producer, production manager, financiers namin, yung mga producers namin. Sila dapat talaga ang mabigyan ng credit dito, e. Kasi, sila yung nagkasa ng shooting na ito.
"So, I have to give them the credit para mabigyan ng tamang budget... yung experience namin. Parang as if hindi kami namroblema kasi sila yung pumasan ng lahat na problema.
"Magagaling yung mga producers namin magtipid. Magaling silang mag-budget. Hindi naman kami ginutom ng mga producers namin. Nabigyan kami ng sapat na talent fee.
"Hindi kami ginutom. Masaya kaming nag-shoot nito. So, I have to give them the credit," sambit ni Direk Lem.
NOEL FERRER:
Bading na naman ang role dito ni Christian Bables, pero tiniyak daw niyang ibang-iba ito sa mga gay roles na nagampanan na niya.
"May kaibahan po. As much as possible... with the help na rin po ng mga directors na nakatrabaho ko, talagang sinu-sort out namin, ano yung hibla na iba dito sa character na ito. Kasi yung nagampanan ko po before, leaning towards the LGBT community character.
"So ayun po, mahalaga talaga na meron akong open communication with my directors, kung papaano ko ihihingi ng tulong. Kasi minsan, meron akong hindi nakikita as an actor na nakikita nung director ko," pahayag ni Christian.
Ginagampanan dito ng premyadong aktor ang role ng host sa ginawa nilang competition na sinalihan ng limang brokenhearted LGBTQ individuals. Makakasama niya as "Judgers" sina Tart Carlos at Ms. Jaclyn Jose.
Alalahanin na na-master na ni Christian ang mga bading roles at nagawa pa niyang manalo bilang Best Actor dahil dito.
Sana, na-match ni Direk Lem ang kanyang grasp sa gay culture at gay comedy at hindi naging caricature ang kanilang portrayal. We are hoping for the best!!!
JERRY OLEA:
Time is the ultimate truth teller, ika nga.
Lalabas at lalabas ang katotohanan kaugnay sa isyung malakas ang producers ng Broken Hearts Trip sa pamunuan ng 49th MMFF.
Ang criteria sa pagpili ng official entries ng MMFF ay Artistic Excellence (40%), Commercial Appeal (40%), Filipino Cultural Value (10%) at Global Appeal (10%). Tingnan natin kung mas swak ang comedy ni Christian sa criteria na iyan kumpara sa ibang aspiring entries na naligwak.
Inilunsad ang Manila International Film Festival noong Nobyembre 2, Huwebes sa Directors Guild of America, Sunset Blvd., Los Angeles, California.
Ipinalabas doon ang Summer MMFF 2023 entries na About Us But Not About Us, Here Comes The Groom, at Love You Long Time.
Dumalo roon sina Romnick Sarmenta, Direk Jun Lana, Direk Perci Intalan, Enchong Dee, Kalad Karen, Eisel Serrano, Direk JP Habac, MMFF Overall Chairman Atty. Romando Artes, at MMFF Executive Director Atty. Rochelle Ona.
Pinarangalan sa event si Hilda Koronel bilang unang recipient ng Monty Manibog Lifetime Achievement Award.
Ayon sa Facebook post ng Hollywood correspondent na si Oliver Carnay, kabilang sa notable attendees sa “star-studded red carpet gala and lavish (not to mention, very well organized!) event for the inaugural launch of Manila International Film Fest 2023” sina Tia Carrere, John Savage, Iñigo Pascual, Jay-R Sillona, Mica Javier, Sam Morelos, Tootsie Guevara, Giji Kocher, Djhoanna Garcia, Evelyn Vargas-Knaebel, Olga Natividad, Carlin James, Saira Bunny Paras, at Bradford Adkins.
Ang organizers ng Manila International Film Festival ay sina Omen Ortiz (chairman), Ebradu Udarbe (president), Lisa Lew (executive producer), Leo de Cruz (CFO), Erick Ilog (COO), Ron Ramores, Ruben V. Nepales, Janet Nepales, Celia Abaya Dy, Cindy Sison, at Meriden Angeles.