GORGY RULA
Ngayon lang ibinunyag ni Derek Ramsay na nabuntis pala ang asawa niyang si Ellen Adarna, pero sa kasawiang palad ay nakunan ito.
Ibinahagi ito ni Derek sa grand media conference ng MMFF 2023 entry ng Quantum Films na (K)AMPON, kasama sina Beauty Gonzalez, Zeinab Harake, Nico Antonio, at ang batang produkto ng "Mini Miss U" ng It's Showtime na si Erin Espiritu.
Ini-relate ni Derek ang sarili sa karakter na ginagampanan niya sa (K)AMPON bilang si Clark Martinez na baog. Pero hindi naman daw siya si Clark dahil kaya naman niyang magka-baby.
May isang anak na si Derek, ang 21-year-old nang si Austin, mula sa kanyang first wife na si Christine Jolly.
Ang ikinalulungkot lang ng aktor, nakunan si Ellen.
Read: Derek Ramsay “sumusubok na” after wife Ellen Adarna's IUD removal
"Si Clark kasi sa pelikula, sabi ng mga doktor, baog. Hindi siya makabuo. Yun yung problema naming mag-asawa sa film.
"To be honest, ako worried ako kasi medyo tumatanda na rin tayo. So, akala ko baog din ako.
“Pero nung nasa Spain kami, nalaman namin na preggy si Ellen. And then, unfortunately, we lost the baby," malungkot niyang pahayag.
Patuloy niya, "Pero at least alam namin na hindi kami baog.
“So, first attempt pa lang naman and, well, successful... unsuccessful. So, yun lang talaga ang magiging focus namin na we can get a full pregnancy right away.
"So, at least, sadly we lost the baby, but at least alam namin na hindi kami baog."
Ang importante, nasa mabuting kalagayan na si Ellen at tiniyak pa rin naman daw sa kanilang puwede pang mabuntis ang kanyang asawa.
JERRY OLEA
Ano ang puwede niyang mai-share na details sa nangyari? Ilang weeks na yung nasa sinapupunan ni Ellen nang magka-miscarriage ito?
“It’s very quick, like nandun kami sa Spain for my mom’s birthday. Delayed si Ellen, she’s never delayed,” lahad ni Derek.
“So we knew something was up. And she got herself tested while we were there. She was positive.
“Great news for my mom, for us. And then pauwi, nag-i-spotting na siya and then eventually… we lost the pregnancy.
“So there’s nothing major, hindi niya kailangang magparaspa or anything. It was still early on in the trimester, a few weeks lang naman.”
Parang nakalutang pa raw si Derek nang humarap siya sa entertainment press kahapon dahil kailan lang ito nangyari kay Ellen.
“We didn’t know, e, kung may problema ako, may problema siya. I guess, worry lang,” lahad ni Derek.
“Hindi pa naman kasi kami nagta-try-try pa… and then yun, nakabuo but we lost it…”
Kabi-birthday lang ni Derek noong Disyembre 7. Ano ang birthday wish niya?
“Magka-baby na. Laging sinasabi ko, boy, pero ngayon parang gusto ko nang magka-baby girl,” sambit ni Derek.
“So, yan talaga ang wish. Yan na lang talaga ang kulang sa life ko.
"I’m very blessed and I’m really in a good spot right now and yun lang na talaga ang kulang."
NOEL FERRER
Nakakagulat iyong revelation ni Derek sa miscarriage ni Ellen. Hindi nila iyon nai-post sa socmed?
"Medyo hindi ko alam kung ano yung mapi-feel. Kasi rollercoaster, e. Super happy, biglang… lowest of the low,” pagtatapat ni Derek.
"So she’s pregnant, she's not pregnant. Di masabi ng doktor na hindi pa talaga siya malalaglag, you know. So, ang daming tanong na hindi masagot…
"Paglapag namin galing Spain, diretso na kami sa hospital, ultrasound. So, it's super, super rollercoaster of emotions.
"But priority is, Ellen is okay. She's safe, and yun.
"Yung good thing is, at least now, we know that we can still have a baby," sabi pa ni Derek.
Hindi sila nawawalan ng pag-asa. Umaasa pa rin silang mag-asawa na magkaroon sila ng baby sa Year of the Dragon next year.