JERRY OLEA
Tatlong dekada na ang lumipas mula nang banggitin ni Miss Mauritius Viveka Babajee ang infamous line na, “Take it! Take it!”
Hunyo 22, 1994 ang awards ceremony ng Manila Film Festival, sa pamumuno nina Manila Mayor Alfredo Lim (RIP) at Vice Mayor Lito Atienza.
Read: Manila Film Festival 1994: The Scandal that Rocked Showbiz
Ginanap iyon sa Manila Midtown Ramada Hotel na kinatatayuan ngayon ng shopping mall na Robinsons Manila.
Televised ang awards rite. Hindi pa uso noon ang internet, cellphone at social media.
Wala pang Friendster (2002 itinatag), Myspace (Agosto 1, 2003), Skype (2003), Facebook (2004), Twitter (Marso 21, 2006) na ginawang X, YouTube (Pebrero 14, 2005), Reddit (Hunyo 23, 2005), Quora (Hunyo 25, 2009), Instagram (Oktubre 6, 2010), Messenger (Agosto 9, 2011), Snapchat (Setyembre 2011), Telegram (Agosto 14, 2013), at TikTok (Setyembre 2016).
Presenters para sa kategoryang best actor ng 1994 MFF sina Ruffa Gutierrez at Nanette Medved, samantalang ang presenters para sa best actress ay sina Gretchen Barretto, Viveka, at ang younger brother ni Ruffa na si Rocky.
Si Viveka ay isa sa 77 kalahok sa Miss Universe 1994 na ang koronasyon ay ginanap noong Mayo 21 sa PICC.
Ang nagwagi roon ay si Sushmita Sen ng India, at ang kinatawan ng Pilipinas na si Charlene Gonzales ay pasok sa Top 6.
Wala sa Top 10 si Viveka, at wala rin siyang special award. Nagpaiwan siya sa Pilipinas para mag-artista.
Read: 10 Unforgettable Things about 1994 Miss Universe Pageant in Manila
THE MANILA FILMFEST 1994 SCAM
Ang talent coordinator o casting director ng MFF 1994 Awards ay si Lolit Solis, na manager nina Nanette at Gabby Concepcion.
Magkatambal sina Ruffa at Gabby sa MFF official entry na Loretta na idinirek ni Mel Chionglo (RIP). Memorable ang eksena na pinutol ni Loretta (karakter ni Ruffa) ang ari ng kanyang asawa.
Ang sabay na isinigaw nina Ruffa at Nanette na best actor ay si Gabby.
Inihiyaw mag-isa ni Viveka na best actress si Ruffa, at sinabihan ang inaantok na si Rocky na kunin ang envelope na may pangalan ng winner, “Take it! Take it!”
Kitang-kita sa telebisyon ang reaksiyon ni Gretchen na may pagtataka, pagkadismaya, at pagkalito.
Ang accounting firm na SyCop Gorres Velayo & Co. (SGV) ang nag-tabulate ng resulta.
Inalerto ng SGV si Mayor Lim na ang totoong best actor ay si Edu Manzano para sa Zacarias, at ang totoong best actress ay si Aiko Melendez para sa Maalaala Mo Kaya: The Movie.
Matapos ang awards ceremony, nakaalis na ang hosts at karamihang dumalo. Umakyat sa entablado si Mayor Lim at inihayag na may nangyaring dayaan.
Read: Manila Film Festival Scam 1994: Mga katanungang hanggang ngayon ay wala pang kasagutan
PHILIPPINE SHOWBIZ AFTER MANILA FILMFEST SCAM
Hindi lang national issue ang 1994 Manila Film Festival Scam, kundi pinag-usapan maging sa ibang bansa.
Binago niyon ang takbo ng career nina Ruffa, Gabby, Nanette, Gretchen, at Viveka.
Tumalilis ng bansa si Viveka, na nag-suicide kapagkuwan dahil sa depression noong Hunyo 25, 2010 sa India.
Read: Former Miss Mauritius Viveka Babajee commits suicide in India
Nagtangka ring magpatiwakal noon si Manay Lolit sa pag-inom ng isang dakot na sleeping pills. Nag-pray over sa kanya noon si Jeanne Young.
Mula noon ay hindi na dumalo ng awards ceremony si Manay Lolit, kahit na noong bibigyan siya ng special award ng FAMAS.
Tinanggihan ni Nanette ang pelikulang Sa Ngalan ng Pag-ibig, at ang papel na mistress ay napunta kay Alma Concepcion. Itinuon ni Nanette ang pansin sa pag-aaral.
Read: Nanette Medved, may posibilidad kayang bumalik sa showbiz?
Hunyo 24 ang kaarawan ni Ruffa. Nang mga sumunod na taon ay Hulyo siya nagdiriwang ng kaarawan.
Hindi tinapos ni Gretchen ang movie niya noon sa Seiko Films, na if I remember it right ay may pamagat na Pagkagat Ng Dilim, Labi Mo’y Kagat Ko Rin.
Gagawin pa sanang Star Witness ang title niyon. Binago ang istorya niyon at idinagdag sa cast si Rosanna Roces.
Naging Di Mapigil Ang Init (1995) ang title ng movie na bida sina Osang at Jestoni Alarcon. Ibang-iba ang istorya niyon sa penekulang Hindi Mapigil Ang Init (1986) na tinampukan nina Myra Manibog, Albert Eugenio, at Mark Joseph.
Nagpunta sa U.S. si Gabby noong 1995, at sumabak sa real estate career sa California. 2008 siya bumalik sa local showbiz.
Read: FIRST READ ON PEP: Gabby Concepcion comes home; will make first TV appearance on "The Buzz"
Nalugmok ang local movie industry nang mga sumunod na buwan noong 1994.
Salat sa sigla ang 20th MMFF noong Disyembre 1994, kung saan walang binigyan ng award sa mga kategoryang best picture, second best picture, third best picture, best director, best director, at Gatpuno Antonio J. Villegas Cultural Award.
“Wala talagang mapagpilian. Walang deserving,” himutok ng isa sa mga hurado sa MMFF 1994 na nakausap ko.
GORGY RULA
Hindi ko alam kung interesado pa ang Millennials, Gen Z, at Gen Alpha sa malaking iskandalong ng 1994 MFF Scam na matagal na pinag-usapan nang husto.
Kung si Manay Lolit Solis ang tatanungin, okay lang sa kanya na dalirutin ito muli.
Sa 77th birthday celebration ni Manay Lolit noong Mayo 19 sa Oriental Palace restaurant sa Morato Avenue, Quezon City, ay nabanggit ang "Scam."
Present sa nasabing pagtitipon si Nanette Medved, at wala siyang violent reaction sa event.
Ewan kung natandaan pa ni Manay Lolit ang lahat ng mga pangyayari, lalo na noong panahong inilaglag na siya ni Gabby Concepcion.
Mahabang usapin pa iyan kung ano ang mga nangyari sa loob ng hospital pagkatapos niyang lumaklak ng 16 na valium sa tahanan ng mag-asawang Rudy Fernandez at Lorna Tolentino after ng interview ni Gabby kay Julie Yap-Daza sa programa nitong Tell The People.
Marami pang kasunod na nangyari, hanggang sa nagkasuhan na at umabot na sa bargaining plea para matapos lang ang lahat.
Read: UNTOLD STORIES: Details Lolit Solis has never revealed about Manila Film Fest Scam
WHAT I REMEMBER ABOUT THE MANILA FILMFEST SCAM
Pero ngayong Hunyo 22, 2024, tatlumpung taon ang nakaraan, nananariwa pa rin sa akin ang mga eksenang naganap sa awards night sa Ramada Hotel, sa Pedro Gil St., Manila, na Robinson’s Manila na ngayon.
Sinamahan ko kasi si Nanette noon at takot na takot na ito sa ipapagawa sa kanya ni Manay Lolit.
Gusto na niyang umalis noon at hindi na ituloy ang pag-present ng award, pero pinabantayan pa siya sa amin ni Manay Lolit para huwag umalis.
Magulo na ang mga kasunod na nangyari pagkatapos ng awarding, at nakisakay na ako sa kotse ni Nanette para makauwi.
Kinabukasan ay malaking balita na itong pinagpiyestahan ng media, at tuluy-tuloy na ang mga nangyaring gulo.
Ang dami pang naganap na hindi alam ng publiko kung ano pa ang mga nangyari, pati yung araw noong June 24, 1994 na kaarawan ni Ruffa Gutierrez ang kanyang kaarawan.
Ang laking trauma sa kanya yun, kaya ewan kaya pa niyang pag-usapan ito.
Marami pang mga pangyayaring nasaksihan namin lalo noong dinidinig sa Manila City Hall ang kasong isinampa kay Manay Lolit at ang iba pang nadawit.
Napakarami pang puwedeng himayin na tiyak na ikagulantang ng mga sumubaybay sa iskandalong ito.
Read: Lolit Solis reflects on biggest takeaway from 1994 MFF scam
NOEL FERRER
Thirty years after, ang dami nang nagbago sa larangan ng pelikula at kung paano ito gawin at i-consume.
After the pandemic, naging popular na alternative ang panonood ng pelikula through streaming. At kung meron mang papanoorin sa sinehan, ito ay yung mga event movies.
Napansin ninyo rin bang nawala na ang repeat viewers? Minsan na lang pinanonood ang mga pelikula at ang repeat ay hihintayin na lang nila sa streaming platforms.
Tapos, after the 49th MMFF, wala pa talagang pelikulang Filipino na naghi-hit.
FILIPINO MOVIES IN 2024
Kabilang sa mga pelikulang ipinalabas sa local cinemas mula Enero hanggang Marso 2024 ang My Zombabe, Roadtrip, Raging Grace, GG The Movie, Itutumba Ka Ng Tatay Ko, My Sassy Girl, Ikaw Pa Rin Ang Pipiliin Ko, Lisa Frankenstein, I Am Not Big Bird, Pasional, The Buy Bust Queen, Layas, 3 Days 2 Nights in Poblacion, Pagpag 24/7, at Dearly Beloved.
Entries sa 1st Puregold CinePanalo Film Festival noong Marso sa Gateway Cineplex 18 sa Cubao, Quezon City ang Under A Piaya Moon, Pushcart Tales, A Lab Story, Road to Happy, Boys at the Back, at One Day League: Dead Mother, Dead All.
Tinanghal na best actress si Shamaine Centenera-Buencamino para sa Pushcart Tales. Tabla bilang best actor sina Carlos Siguion-Reyna para sa Pushcart Tales, at Jeff Moses para sa Under A Piaya Moon.
Read: Pushcart Tales, Under A Piaya Moon, humakot ng award sa 1st CinePanalo Film Festival
Kabilang naman sa mga ipinalabas mula Abril up to the present ang Under Parallel Skies, X & Y, Elevator, G! LU, Bantay Bahay, Men Are From QC Women Are From Alabang, Fuchsia Libre, Isang Gabi, When Magic Hurts, Seoulmeyt, Chances Are, You and I, 1521: The Quest for Love & Freedom, Glitter & Doom, Playtime, Fruitcake, at Karma.
Nag-No. 1 sa talaan ng Top 10 Movies in the Philippines Today sa Netflix ang mga pelikulang A Very Good Girl (Disyembre 29, 2023-Enero 8, 2024), Wish You Were The One (Enero 20-26, 2024), Instant Daddy (Enero 27), Trip Ubusan: The Lolas vs Zombies (Pebrero 11-13), Apag (Pebrero 14), at English Only, Please (Pebrero 16-17).
Pumuwesto rin sa top spot ang Shake, Rattle & Roll Extreme (Marso 3-8), Rewind (Marso 27-Abril 2), Becky & Badette (Abril 6, 9-10), GomBurZa (Abril 11-14), A Journey (Abril 15-19), Kampon (Abril 20-21), My Zombabe (Abril 26-30), Pula (Mayo 6-8), Road Trip (Mayo 16-23), at Family of Two (Hunyo 1-6).
Pinoy movies ang umariba mula Abril 9 hanggang 21 — Becky & Badette, GomBurZa, A Journey, at Kampon.
Bigong mag-No. 1 nang mag-streaming sa Netflix this year ang mga pelikulang Monday First Screening, Mga Kuwentong Barbero, As If It’s True, Ikaw at Ako, Para Kang Papa Mo, Ikaw Pa Rin Ang Pipiliin Ko, I Am Not Big Bird, Penduko, at Dearly Beloved.
Iyong critically acclaimed animated film na Ito Mapukpukaw (The Missing) ay ni hindi napasama sa Top 10 nang mag-streaming sa Netflix PH.
Thirty years after the MFF Scam, merong The Manila Film Festival 2024 noong Hunyo 5-11 sa Robinsons Manila, at Hunyo 10-11 sa Robinsons Magnolia.
Punong-abala sina Manila Mayor Honey Lacuña, at Vice Mayor Yul Servo.
Pero student short films muna sa TMMF, kung saan tinanghal na best actor si Gold Aceron para sa Una’t Huling Sakay. Tabla bilang best actress sina Gillian Vicencio para sa Ditas Pinamalas, at Amber Jeshley Gomez para sa Happy (M)others Day.
Read: The Manila Film Festival 2024 directors, entries, what to expect
Wala na munang Summer MMFF. Naka-focus ang MMFF ExeComm sa preparations para sa 50th MMFF sa Disyembre.
Wala rin sa kalendaryo ng Film Development Council of the Philippines (FDCP) na ibalik ang Pista ng Pelikulang Pilipino.
EDDIE ROMERO CENTENNIAL BIRTH ANNIVERSARY
Sa Hulyo 7 ang centennial birth anniversary ni National Artist for Film Eddie Romero.
Kaugnay rito, handog ng Cultural Center of the Philippines (CCP) ang screenings ng kanyang digitally restored films sa pamamagitan ng CCP Cine Icons special: Eddie Romero @ 100.
Pinasimulan ito sa pagpapalabas ng Aguila (1980) noong Abril 3 sa GSIS Theater.
Noong Mayo 22 ay ipinalabas ang Ganito Kami Noon, Paano Kayo Ngayon? (1976) sa UPFI Film Center sa UP Diliman, Quezon City. Ipapalabas ito muli sa Hulyo 20 sa De La Salle University sa Taft Avenue, Manila.
Sa Hunyo 25, Martes, ay ipapalabas ang Kamakalawa (1981) sa PUP Theater sa Sta. Mesa, Manila.
At sa Hulyo 21 ay ipapalabas ang Hari sa Hari, Lahi sa Lahi (1987) sa Tanghalang Ignacio Gimenez (CCP Black Box Theater) sa Pasay City.
Kabilang pa sa mga obra ni Direk Eddie Romero ang Ang Kamay ng Diyos (1947), Banta ng Kahapon (1969), Lost Battalion (1960), The Raiders of Leyte Gulf (1963), The Walls of Hell (1964), Black Mama, White Mama (1973), Savage Sisters (1974), Palaban (1980), Desire (1982), Faces of Love (2007), at Teach Me To Love (2008).
Saan patungo ang industriya ng pelikulang Filipino? Nakadepende iyan sa mga bagong players at bagong dugo na naghahanap ng bagong paraan ng pagkunek sa mga manonood.