JERRY OLEA
Tabla na naman ang best actress sa The EDDYS o Entertainment Editors’ Choice ng Society of Philippine Entertainment Editors (SPEEd)!
Sa 6th The EDDYS last November 2023 sa Aliw Theater ay tabla bilang best actress sina Janine Gutierrez (Bakit Di Mo Sabihin?) at Max Eigenmann (12 Weeks).
Sa 7th The EDDYS nitong Hulyo 7, 2024, Linggo, sa Ceremonial Hall ng Marriott Grand Ballroom, Pasay City, stalemate bilang best actress sina Julia Montes (Five Breakups And A Romance) at Charlie Dizon (Third World Romance).
ACTING WINNERS
Sa acting winners ng 7th The EDDYS, bukod-tanging si Charlie ang absent. Nag-best actress na si Charlie sa 4th The EDDYS (online edition) noong Abril 2021 para sa Fan Girl.
Read: DongYan, Kathryn, Alden Box-Office Heroes sa 7th EDDYs
Interestingly, ang itinanghal na best supporting actress ay si Gladys Reyes para sa Apag. Sa 1st Summer MMFF ay best actress ang nakamit niya for the said performance.
Sina Gladys at Julia ay parehong “Clara” sa teledramang Mara Clara. Si Gladys ang OG Clara noong si Judy Ann Santos ang Mara, at si Julia ang Clara noong si Kathryn Bernardo ang Mara.
Nominado ring best actress sa 7th The EDDYS si Kathryn para sa A Very Good Girl, pero gaya sa 47th Gawad Urian last month sa DLSU campus, Taft Ave., Manila, ay waley siya.
Ang best actor ay si Piolo Pascual para sa Mallari. Ibinahagi niya ang kanyang tropeyo sa mga kapwa nominado na sina Dingdong Dantes, Cedrick Juan, Romnick Sarmenta, Alden Richards, at Elijah Canlas.
Sabi ni Piolo, ang best actor niya ay si Romnick.
Ang best supporting actor ay si Enchong Dee para sa GomBurZa. Aniya, hindi pala talaga nakukuha sa haba ng exposure para ma-nominate ka at magwagi.
BEST FILM
Ang best film ay ang About Us But Not About Us na best picture ng 1st Summer MMFF. Nakamit din nito ang tropeyo para sa best director (Jun Robles Lana), best screenplay (Jun Robles Lana), at best editing (Lawrence S. Ang).
Ang tumanggap ng awards na ito ay si Direk Perci Intalan, na co-producer ni Direk Jun sa The IdeaFirst Company, na isa sa producers ng naturang pelikula.
Sinamahan kasi ni Direk Jun ang mga anak nila ni Direk Perci sa Blippi concert that night sa New Frontier Theater sa Cubao, Quezon City. Mahal ang tickets doon, huh?!
“At least in the future, masasabi namin sa mga anak namin na inuna sila kesa sa awards night!” sabi ni Direk Perci.
Sa kabuuan ng About Us But Not About Us ay nakaupo at nag-uusap sina Romnick Sarmenta at Elijah Canlas. Sinamahan nina Romnick at Elijah si Direk Perci sa pagtanggap ng best film trophy.
Maliban sa best actor, wagi ang Mallari sa technical categories na best cinematography (Juan Lorenzo “Pao” Orendain), best production design (Mariel Hizon), best musical score (Von de Guzman), at best sound (Immanuel Verona, Nerrika Salim).
Ang technical awards na ito ay pawang tinanggap ng producer na si Bryan Dy, na umakyat din para sa special award na Rising Producer of the Year.
Ang best visual effects ay natamo ng Regal horror trilogy na Shake, Rattle & Roll Extreme.
Ang choice ng SPEEd na best original theme song GomBurZa, ang "Sa Duyan ng Bayan" performed by Noel Cabangon, Ebe Dancel and Gloc-9, music and lyrics by Krina Cayabyab and Gloc-9.
SRO (Standing Room Only) ang 7th The EDDYS. Sa dami ng dumalo, nawalan ng upuan ang SPEEd members, at ang daming nakatayo habang ongoing ang awards ceremony.
Read: Binibining Pilipinas 2024 Question and Answer
GORGY RULA
Sa major winners, sina Charlie Dizon at Direk Jun Robles Lana lang ang hindi nakadalo.
Nasa out of town si Charlie, habang si Direk Jun mas pinili muna ang Best Parent, kesa mag-Best Director.
At dapat naman talaga dahil magiging aligaga na siya sa mga susunod na araw para sa shooting ng And The Breadwinner Is… nila ni Vice Ganda.
Pero ang saya lang ng 7th EDDYS kagabi, dahil nakikita mong may pag-asang makaahon talaga ang ating movie industry. Halos ganoon ang panalangin ng lahat na may malasakit sa ating industry.
Iyon din ang suma ng acceptance speech ni Direk Perci Intalan nang tinanggap niya ang Best Picture award para sa pelikulang About Us But Not About Us.
Pahayag niya: "Maraming salamat sa ilang pelikulang nagpakita rin na bumabalik ang tao. Hindi madali yun.
"At ngayon alam naman natin na nandun uli tayo, pinapabalik na natin ang mga tao sa sinehan.
"Continuous na climb, continuous na struggle, pero I think there’s a ray of hope. So, hindi ako naniniwala that bleak ang future ng Philippine cinema, dahil kita naman natin sa mga pelikulang pinakita ngayon.
"Nung nakaraang taon, kita naman natin sa mga pelikulang ginagawa ngayon, laban lang ng mga producers. Palakihan pa rin nang palakihan ng mga project, di ba? Palakasan pa rin ng loob.
"At nakakatuwa ang dedikasyon din ng lahat ng mga bumubuo ng pelikula, mga artista, obviously nga director, writers, production designers, cinematographers, editors, everybody.
"Kasi parang unspoken, nangangarir lahat. Pagandahin natin ito, patunayan nating maganda ito."
JULIA MONTES
Ang isa pang natuwa kami ay para kay Julia Montes na nakikita namin kung gaano siya katuwa nang tinanggap pa lang ang Box-Office Hero award.
Hindi niya talaga akalaing siya ang magwawaging best actress katuwang si Charlie Dizon.
Nung tinatawag pa lang ang nominees, namataan naming naluluha na siya. Matagal-tagal bago siya nakatayo nang tinawag ang pangalan niya as Best Actress.
Sabi nga niya, “Never naman po akong umasa or nag-e-expect kapag may ganito kasi ma-nominate ka pa lang po or masabi lang na, ‘Napanood ko, gusto ko yung ginawa mo dun.’ Yun pa lang po reward na yun, e.
“So, ang nangyari po ngayong gabi, sobrang overwhelming po for me and parang nagkaroon lang po ako lalo ng drive na gumawa pa ng marami pang film, serye para ma-share ko kung ano pong meron po ako.”
Read: DJ Mo claims Angelicopter dumped him on their wedding anniversary
NOEL FERRER
Official auditor ng The EDDYS ang Juancho Robles, Chan Robles & Company (CPAs).
Ang bagong tropeyo ay dinisenyo ng dating sexy actor na si Leandro Baldemor na tubong-Paete, Laguna, ang wood carving capital of the Philippines. Host ng red carpet si Mr. Fu.
Pinagpugayan bilang Icons ng pelikulang Pinoy sina Eva Darren, Leo Martinez, Gina Alajar, Nova Villa, at Lito Lapid.
Kinilala bilang Box-Office Heroes sina Dingdong Dantes, Marian Rivera, Piolo Pascual, Alden Richards, Julia Montes, at Kathryn Bernardo.
Ang tumanggap ng trophy ni Kathryn ay si Thess Gubi ng ABS-CBN Star Magic.
Pinagkalooban ng Isah V. Red Award sina former Ilocos Sur Governor Chavit Singson at Quezon City Mayor Joy Belmonte. Ang tumanggap ng award ni Mayor Joy ay ang ama niyang si former House Speaker Sonny Belmonte.
Ang Joe Quirino Award ay ipinagkaloob kay Korina Sanchez; ang Manny Pichel Award, kay Ronald Constantino; at ang Rising Producer of the Year ay ang Mentorque Productions na nagprodyus ng Mallari.
May posthumous award for Direk Carlo J. Caparas, na tinanggap ng mga anak nila ni Donna Villa na sina CJ at Peach Caparas.
Ang nagdirek ng 7th The EDDYS ay si Eric Quizon. Opening number si Jed Madela na umawit ng "Go The Distance."
Nag-keyboard at umawit ng "Kailangan Kita" si Ogie Alcasid sa In Memoriam segment. Nagpakitang-gilas ang RAMPA Reynas sa production number sa kalagitnaan ng awards rite.
Para sa closing part ay nag-duet ang mga baguhang singers na sina Elisha Ponti at Andrea Gutierrez, habang nagtipun-tipon sa entablado ang winners at SPEEd members na naroon pa.
Sa ending ay nag-join sa group picture ang hosts na sina Janine Gutierrez, Gabbi Garcia, at Jake Ejercito.
Ang Brightlight Productions ang line producer ng ginanap na awards night.
Sa pakikipagtulungan ng Newport World Resorts at ALLTV, kasama pa rin ng SPEEd sa pagtatanghal ng The 7th EDDYS ang Globe Telecom at iFern/Kim's Diary bilang major sponsor.
Katuwang din ng grupo ngayong taon si DILG Secretary Benhur Abalos, Mayor Albee Benitez, Beautéderm ni Rhea-Anicoche Tan, Unilab, Frontrow, Kat Corpus Atelier, Sen. Chiz Escudero, Sen. Bong Revilla, Camille Villar, Sen. Nancy Binay, former Ilocos Sur Governor Chavit Singson, Rep. Arjo Atayde, Emelette Gorospe, Rowena Gutierrez, Kamiseta, Casa Juan, at ang Echo Jham Entertainment Production.
Ang SPEEd ay binubuo ng mga current at former entertainment editors ng mga leading broadsheets, tabloids at online portals sa bansa.
Ang kasalukuyang presidente ng SPEEd ay si Salve Asis ng Pilipino Star Ngayon at Pang Masa. Ang Internal Vice President ay si Tessa Mauricio-Arriola ng The Manila Times, at ang External Vice President ay ang ka-Troikang Jerry Olea.
Kabilang pa sa officers sina Gerardine Fe Trillana ng Malaya Business Insight, Maricris Nicasio ng Hataw, Dondon Sermino ng Abante, Dinah Ventura ng Daily Tribune, Nickie Wang ng Standard Today, Ervin Santiago ng Bandera, at Rohn Romulo ng People’s Balita.
Founding members/advisors sina Eugene Asis ng People’s Journal, Ian Fariñas ng People’s Tonight, at Isah V. Red (RIP). Consultants sina Nestor Cuartero ng Manila Bulletin at Tempo, at Dindo Balares ng Balita.
Board members sina Neil Ramos ng Tempo, Nathalie Tomada ng The Philippine Star, Bobby Requintina ng Manila Bulletin, at Rito Asilo ng Philippine Daily Inquirer.
Associate members sina Jun Lalin ng Abante, Janiz Navida ng Bulgar, at Anna Pingol ng Pika Pika.
Ang delayed telecast ng 7th The EDDYS ay nakatakda sa Hulyo 14, 2024, Linggo sa ALLTV.
Abang-abang naman tayo sa 40th PMPC Star Awards for Movies sa Hulyo 21, Linggo sa Henry Lee Irwin Theater ng Ateneo De Manila University, Katipunan Ave., Quezon City.
Si Eric Quizon din ang magdidirek nito. Ang delayed telecast nito ay sa Hulyo 27, Sabado ng 10:30 p.m. sa A2Z.
Ipoprodyus ito ng Airtime Marketing Inc. kung saan executive producer si Tessie Celestino-Howard. Naglabas na rin ng nominees ang Film Academy of the Philippines (FAP) para sa 40th Luna Awards, na tentatively set sa Agosto 3.
Hindi pa iyon final, at hindi pa batid kung saan ang venue, pero strictly invitational iyon.