JERRY OLEA
Antagal ni Miss Eva Darren bago nakapag-red carpet sa 7th The EDDYS nitong Hulyo 7, 2024, Linggo ng gabi, sa Marriott Grand Ballroom, Newport World Resorts sa Pasay City.
Nakatungkod si Miss Eva at hinay-hinay maglakad. Pero ang nagpatagal talaga ay ang maraming fans na nagpalitrato with her bago siya nakarating sa red carpet.
Read: Eva Darren, napansin ng industriya matapos ang FAMAS issue
Kasama niya sa 7th The EDDYS ang apong si Christine, ang isang daughter niya, at ilan pa. Si Christine ang kasabay niya sa pagrampa sa red carpet.
Nag-time out noon ang host ng red carpet na si Mr. Fu kaya ako muna ang nag-interbyu kay Miss Eva.
Masaya siya sa pagkilala sa kanya ng SPEEd (Socety of Philippine Entertainment Editors) bilang isa sa limang Film Icons ng 7th The EDDYS.
Read: Eva Darren at Carlo J. Caparas, pararangalan sa 7th EDDYS
After a little while ay andiyan na si Mr. Fu na siyang nagtuloy sa panayam may Ms. Eva.
Napahinuhod later on si Miss Eva na mainterbyu rin ng mga taga-media na nag-cover sa event.
Kapagkuwan ay ihinatid ko na sina Miss Eva sa cocktails room, na bale holding area for nominees, presenters, honoree, sponsors, and VIP guests.
Sinabi ko kay Miss Eva na bilib na bilib ako sa husay niya sa pelikulang Ang Lalaki Sa Buhay ni Selya (1998) na joint venture ng Reyna Films at Star Pacific Cinema label ng ABS-CBN Star Cinema.
Naalala tuloy ni Miss Eva ang namayapang Armida Siguion-Reyna na producer ng Reyna Films.
At any rate, walang pay ang fudz and drinks sa 7th The EDDYS! Naka-table later on ni Miss Eva ang kapwa Icon awardee na si Miss Nova Villa, at more and more ang nagpa-picture sa kanilang dalawa.
Ang tatlo pang Film Icons ng 7th The EDDYS ay sina Gina Alajar, Leo Martinez, at Senator Lito Lapid.
Escort ni Miss Gina ang anak na si Ryan Eigenmann. Representative ni Senator Lito ang pamangkin niyang si Atty. John DX Lapid.
Sa first row of seats ng Ceremonial Hall nakaupo ang Film Icons. Inalalayan nang lubos si Miss Eva sa pag-akyat at pagbaba kapagkuwan sa stage.
Ang presenter sa Film Icons ay si Congresswoman Lani Mercado. Ang nag-abot ng trophies ay SPEEd members.
Natokang mag-abot ng trophy kay Miss Eva sina Nathalie Tomada ng Philippine Star, at Jun Lalin ng Abante.
Pagkaabot ni Jun ng tropeyo ay nilitratuhan si Miss Eva. Kinuha muli ni Jun ang trophy nang mag-i-speech na si Miss Eva para hindi ito mabigatan.
EVA DARREN'S ACCEPTANCE SPEECH
Pahayag ni Miss Eva, “Maraming-maraming salamat po at magandang gabi sa inyong lahat, sa ating lahat. Talagang nakakakaba.
“Wala akong masasabi kundi magpasalamat sa mga bumubuo ng SPEEd, ng EDDYS.
“At ibinabahagi ko din po sa lahat ng mga beteranong kagaya ko. Hindi sa giyera, ha?!
“Kundi sa teleserye, sa pelikula, ibinabahagi ko rin sa kanilang lahat ang napakagandang karangalang ito na ipinagkaloob po ninyo sa akin.
“Marami pong salamat. Pahabol din ito sa birthday ko dahil nag-birthday ako noong June 28.”
Nagpalakpakan ang audience, at saka nagpatuloy si Miss Eva, “Seventy-eight ako noong araw na iyon. At salamat sa mga kapwa ko beterano, noon at ngayon.
“Nabanggit ko ang noon at ngayon. Siyempre, wala yung ngayon kung wala yung noon, di ba?
“Para sa inyo na kapwa ko beterano, maraming-maraming salamat. At sa inyo po, sana, huwag niyo naman kaming pabayaan.
“Huwag niyo kaming kalimutan. Salamat po, at magandang gabi!”
GORGY RULA
Ipinost sa social media ng ilang miyembro ng entertainment media ang pagdating ni Ms. Eva Darren sa The 7th EDDYS Awards noong Linggo.
Ikinumpara ng ilan sa ginawa ng 72nd FAMAS Awards sa kanya na tila kinalimutan siya.
Sinabi pa naman ni Ms. Eva sa kanyang acceptance speech na huwag naman daw sana silang kalimutan. Kaya nabuhay na naman ang isyu nito sa FAMAS.
Read: Eva Darren, dinisrespeto sa 72nd FAMAS Awards?
Meron pang nag-post ng nag-viral ding video ni Sheena Palad sa ginawa nito sa TikToclock. Yun daw ang ipinalit sa kinalimutang si Eva Darren.
Read: Sheena Palad, inuulan ng batikos dahil sa pamimisikal
Sa isang production meeting namin bago mag-EDDYS, nagkausap pa si Direk Eric Quizon at Ms. Eva Darren.
Ipinaalala pa sa kanya ng beteranang aktres na nakatrabaho niya noon ang ama ni Direk Eric na si Dolphy.
Bago sila nagpaalaman sa telepono, pabirong sinabi pa ni Direk Eric sa kanya na tipong, “Don’t worry Tita, hindi ka namin kakalimutan.”
Siyanga pala, habang nasa cocktails room pa ang mga guests, bumaba pa si Direk Eric para magbigay-pugay sa mga maagang dumating kagaya nina Nova Villa at Eva Darren.
Namataan kong bumati rin siya sa mag-asawang Senator Bong Revilla at Congresswoman Lani Mercado na presenters that night.
Nang magsimula na ang seremonya, nasa director’s booth na si Direk Eric at hindi na bumaba. Wala siyang ibang partisipasyon kundi nagdirek.
Kahit karapat-dapat naman siyang mag-present ng award, pero talagang nagdirek siya para maging maayos ang palabas.
Iyong SPEEd members naman ay tulung-tulong sa Red Carpet, kung saan inatasan nila si Mr. Fu na interviewer.
Ang delayed telecast ng 7th The EDDYS ay nakatakda sa Hulyo 14, 2024, Linggo ng 10:00 P.M., sa ALLTV.
Sa pakikipagtulungan ng Newport World Resorts at ALLTV, kasama ng SPEEd sa pagtatanghal ng The 7th EDDYS ang Globe Telecom at iFern/Kim's Diary.
NOEL FERRER
Salamat sa SPEEd at sa 7th The EDDYS sa maayos na pagdadaos ng awards para sa pelikula.
Salamat sa paggalang at pagkilala sa mga artista at mga kasamahan natin sa trabaho.
Masaya rin akong nakita na dumalo ang mga kasamahan natin sa PMPC, MMPRESS, TEAM, at iba’t iba pang media groups bilang pagsuporta sa EDDYS.
Sana, laging ganoon. Tulungan na lang — dahil iisang industriya rin lang tayo.
Basta tuloy lang, gagalingan lagi natin. At sasayahan.