GORGY RULA
Nilinaw ni Lino Cayetano na hindi siya disqualified bilang kandidato sa pagka-congressman ng Taguig-Pateros district sa 2025 elections.
“Walang makakapigil sa akin. I will not be disqualified!” bulalas ni Direk Lino nang makatsikahan ng PEP Troika nitong Nobyembre 9, 2024, Sabado, sa office ng Rein Entertainment sa Malingap St., Quezon City.
Read: Lino Cayetano takes a break from politics, returns to directing
Ipinagdiinan din ni Lino na hindi niya iniiwan ang showbiz.
“I want to champion the industry in Congress… andaming nangyayari ngayon,” saad ni Direk Lino.
“Si Direk Joey [Reyes] in FDCP, sina Toff de Venecia, ABS-CBN, Viva, Regal, GMA, TV5, everyone is doing something now that will help us get to where we want to be. Sooner than we think.
“And tingin ko, may maiaambag ako dun…"
COMELEC REJECTS LINO CAYETANO'S RESIDENCY TRANSFER BID
Kasalukuyang nahaharap si Lino sa disqualification issue matapos i-reject ng Comission on Elections (Comelec) ang request ni Lino at ng misis nitong si Fille Cainglet-Cayetano na ilipat ang kanilang residency mula sa second district ng Taguig sa first district ng Taguig-Pateros.
Bahagi ng desisyon ng Comelec Election Registration Board (ERB) noong October 28: “WHEREFORE, premises considered, the applications of Lino Edgardo S. Cayetano and Fille Saint Merced C. Cayetano for transfer of registration records are hereby disapproved for not having fully-satisfied the requirement of residency [as] mandated by law.”
Independent candidate si Lino sa darating na halalan.
Ang kalaban niyang si incumbent Congressman Ricardo Cruz Jr. ay suportado ng kanyang kapatid na si Senator Alan Peter Cayetano at asawa nitong si Mayor Lani Cayetano.
Naniniwala si Lino na may taong ayaw siyang umupo bilang kongresista, pero nais niyang ipaalamn na lalabanan niya ang disqualification case laban sa kanya.
Saad ng director/producer/politician, "Gumastos pa yata sila sa press release na na-disqualify ako. Kasi may mga editorial pa.
“So someone really does not want me to become congressman. And for me, I wanted lang this opportunity to be able to tell my friends in the entertainment industry, and lalung-lalo sa mga kababayan ko in Taguig and Pateros na I will fight the disqualification case.
“At until umabot siya ng Supreme Court."
Dagdag ni Lino, My father [the late Rene Cayetano] is from Pateros. My father grew up in Pateros.
“My brother Alan was congressman of Taguig and Pateros. I first voted in District 1 in 1998, in Taguig and Pateros, in the first district.
“Hindi ko maintindihan kung bakit pinagbabawalan ako ng ilang mga tao na tumakbo sa unang distrito."
Ipinaliwanag ni Lino kung bakit siya lumipat sa Fort Bonifacio, sa Taguig.
Lahad niya: “Kaya ho ako napunta sa Fort Bonifacio, Alan and Lani asked me to run for barangay captain to help Lani.
“Kasi nung nanalo si Lani, wala siyang kakampi. And they needed isang matibay na kakampi na ipagtatanggol siya. So I left showbiz.
“It was the height of my career. Kasi I was doing Noah with Piolo [Pascual], and at the time Zaijian [Jaranilla] who just finished May Bukas Pa.
“Nagpaalam ako sa ABS-CBN because my family asked me to move to District 2 para tumakbo ng barangay captain and eventually congressman."
Nanungkulan si Lino bilang barangay captain ng Fort Bonifacio, Taguig noong 2010 hanggang 2013.
Tumakbo siya at nanalong kongresista ng second district ng Taguig noong 2013; umupo siya sa puwesto hanggang 2016.
Naging mayor naman siya ng Taguig noong 2019 hanggang 2022.
LINO INSISTS RESIDENCY TRANSFER IS LEGAL
Nanindigan si Lino na ang pagpababalik niya sa unang distrito ng Taguig-Pateros ay legal.
“So all I’m doing now is going back to the first district, which is legal. Nung mayor ako, meron kaming residence na kinuha near city hall, and that’s in the first district.
“So lahat po yun, legal. When I was mayor, I was mayor of the entire Taguig. Not just one, or not just two.
“So, hindi siya legal issue, mas political issue siya. Ginagawa siyang paraan para huwag akong makatakbo sa eleksyon.
“Pero yun nga, I’m confident and my lawyers are confident na we will win the appeal, and if we don’t, meron pang mga next step. Sabi ko nga, until umabot ng Korte Suprema.
“Pero sa akin, napakasimpleng kaso. My father Rene Luna Cayetano is from Pateros. Our family home is in the first district of Taguig.
“My brother was kinatawan ng first district. My sister-in-law was kinatawan ng first district.
“I don’t see any legal reason why I can’t run except if ayaw nga akong patakbuhin.”
Kahit ongoing ang eleksyon, ang kampanya, andiyan ang kaso laban sa kanya?
Saad ni Lino: “Yun ang gusto nila. Yun ang gusto nilang mangyari.
"Kumbaga sa showbiz, imbes na yung show ang pinag-uusapan, yung intriga na nangyayari sa show o sa pelikula.
“Gusto nila, imbes na mapag-usapan yung mga problema namin sa Taguig and Pateros, na gusto kong hanapan ng solusyon, ang pag-uusapan e, ‘Madi-disqualify naman iyang si Lino, e.’
“So sa akin, it’s really a political move. Ano siya, pardon the ano, pero style-trapo. Na mas magandang i-disqualify yung kalaban kesa sa lumaban.
“And for me, nakakalungkot. Kasi kilala ako ng mga taga-Taguig. Wala ho akong kalaban.
“Kahit ho yung mga kalaban namin sa pulitika, malapit ho sa akin. Parang ako yung Cayetano na nalalapitan nila.
“I work with the Dutertes, the Marcoses, the Binays. Sa Taguig, with the Tingas, the Seraficas, ako ho yung tulay ng pamilya namin kahit sa mga nakalaban namin sa pulitika."
Dagdag niya, “Yung next line-up ng projects namin [sa Rein Entertainment], it’s with ABS-CBN, with Viva, it’s with Regal, and we’re in talks with the other networks as well.
“Parang collaboration is such a beautiful thing. And ako, I’m excited to work with people like Vico [Sotto]. I’m excited to work with Yorme Isko [Moreno] if he gets back in Manila.
“I’m excited to work with the neighbors and the other mayors. Hindi ko nakikitang parang ano, hindrance yung dayalogo at nakikipag-usap sa mga hindi mo kapareho ng pananaw sa pulitika.”
Read: Phillip Salvador, Brian Poe, Michael Pacquiao tatakbo rin sa 2025
JERRY OLEA
Napakahabang proseso ang kasong disqualification sa candidacy ni Direk Lino Cayetano.
Saad ni Direk Lino, “And ako, confident ako na habang humahaba yung proseso, mas nagiging public siya, mas mahirap akong isahan. Mas mahirap akong durugin.
“Kasi naniniwala ako that it’s simple. It’s a simple case, e. Meron kaming tahanan sa unang distrito. Gusto nila akong i-disqualify dahil taga-BGC, or taga-second district daw ako.
“So for me it’s simple. Napakarami sa mga kababayan natin, we live in Quezon City, we go home to vote in the province because may bahay tayo doon. We consider it our domicile.
“Ganoon kasimple sa amin. Marami sa mga kaibigan natin, kasamahan nating nagsisilbi sa gobyerno — they live near Congress, they vote somewhere else.
“Pero tayo mismo, andami sa Makati, sa BGC, nagtatrabaho sa Taguig. Pero uuwi ng Laguna, uuwi ng Cavite para bumoto."
Ibinigay pang halimbawa ni Lino ang kapatid niyang si Alan Peter Cayetano at ang asawa nitong si Lani Cayetano na parehong tumakbong kongresista sa magkahiwalay na distrito ng Taguig noong 2019 midterm elections.
Aniya: “Ang pinakamatibay nga na rason diyan, e, last elections, si Alan and si Lani, nagrehistro sila sa dalawang hiwalay na distrito.
“So, kung ang mag-asawa, puwedeng magrehistro sa dalawang hiwalay na distrito, at ang sabi ng Comelec doon, OK lang daw iyon.
“Walang rason na kami nung wife ko… hindi papayagan na magrehistro sa isang bahay na more than two years na naming inuupahan.
“And in fact, more than five years na. Kasi mayor pa ako noon nung kinuha ko yung bahay sa subdivision near city hall.
“Parang dito, the whole time I was working in ABS, nakatira ako sa El Jardin pero bumoboto ako sa Taguig.
“Sa El Jardin ako umuuwi kasi pagbukas ko ng bintana ko, nakikita ko yung antenna ng ABS, naaalala ko kung sino ang nagpapasuweldo sa akin.
“So, ganoon din ho doon. I got a place beside city hall because I wanted to live near work.”
Inimbita si Direk Lino ng munisipalidad ng Pateros na dumalo sa kanilang flag-raising ceremony sa Nobyembre 11, Lunes.
“I think they’re happy that the son of iyong isa sa mga pinaka-prominent sons nila decided to serve in Taguig-Pateros,” sambit ni Direk Lino.
“So it will be my first opportunity to be able to serve Pateros because Taguig pa lang ako nagsilbi.”
Read: Ion Perez withdraws candidacy for councilor in Concepcion, Tarlac
NOEL FERRER
Bakit parang hinahadlangan si Lino, kahit ng sarili niyang pamilya?
Ito ang tunay na Family Feud, na hindi programa sa TV kundi sa tunay na buhay.
Pero sa huli’t huli, sana makita ng mga tao ang track record ng mga tumatakbo sa public office.
Basta, alam ni Lino noon pa man, na nasa kanya ang aking suporta!!!