JERRY OLEA:
Wala pong IN MEMORIAM sa 50th MMFF Gabi ng Parangal nitong Disyembre 27, 2024, Biyernes sa grand ballroom ng Solaire Resort sa Parañaque City.
Ang pag-awit nina John Arcilla, John Seña, Arman Ferrer, at Mark Bautista ng “Minsan Ang Minahal Ay Ako” ay binansagang “Tribute to the MMFF Icons.”
Sa bandang huli ng production number ng apat na tenor ay medyo babad sa LED screen ang mukha ni Eugene Domingo.
EUGENE DOMINGO PART OF 'TRIBUTE TO MMFF ICONS' SEGMENT
Before that ay yumaong MMFF icons ang ipinakita kaya siguro may mga nag-akala na pagpupugay iyon sa mga namatay.
Kabilang din sa mga ipinakita ay ang mga litrato nina Charito Solis, Joseph Estrada, Christopher de Leon, Mona Lisa, Ruel Vernal, Hilda Koronel, Vilma Santos, Rolly Quizon, Nora Aunor, Jay Ilagan, Cherie Gil, at iba pa.
Sa pag-intro ng hosts sa nasabing production number, ang sabi ni Robi Domingo, “This is an iconic event hindi lang para sa mga taga-industriya, maging sa mga fans at sumusuporta sa sining ng pelikula through the years.”
Sambot ni Jasmine Curtis-Smith, “Tama yan, Robi. And for this historic night in Philippine cinema, we will celebrate five beautiful decades of artistry and amazing Filipino talent.”
Iyong ipinabasa lang kay Gabbi Garcia ang tumatak siguro sa iba, “Ngayong gabi, we are bringing together remarkable Pinoy voices to pay tribute to those who came before us.”
At ang dugtong ni Tim Yap, “Yes, without further ado, put your hands together for Robert Seña, Arman Ferrer, and John Arcilla.”
Hindi nabanggit ni Tim si Mark Bautista na naunang kumanta.
At any rate, waley sina Maris Racal at Anthony Jennings sa awards night ng golden edition ng MMFF.
Ang mga namataan namin sa mesa ng And The Breadwinner Is… ay sina Vice Ganda, Eugene Domingo, Gladys Reyes, Direk Jun Robles Lana, at Direk Perci Intalan.
Naki-table din kaya sa kanila si Kokoy de Santos, o sumama ito sa table ng Topakk?
Waley rin sa awards night si National Artist Nora Aunor. Masama ang pakiramdam ni Ate Guy, sabi ni National Artist Ricky Lee.
Waley si Bossing Vic Sotto. Magkakasamang rumampa sa red carpet ang Team The Kingdom na sina Direk Mike Tuviera, Sue Ramirez, Cristine Reyes, Piolo Pascual, at Ruby Ruiz.
Palaging sa tabi ni Piolo si Ruby. Pumulupot pa si Ruby kay Papa P!
Ipinaalala ko kay Ruby ang sinabi niya noon na kaya niya tinanggap ang The Kingdom ay dahil may eksena siya with Piolo.
Hindi niya muna inusisa noon ang role bago niya tanggapin ang offer. Ang deciding factor ay kung may eksena siya with Papa P.
Ayun, na-shy kunwari si Ms. Ruby!!!
Nakakatuwa na andaming artista at celebrities ang dumalo sa awards night na ito. Sa dami, hindi ko nakita iyong iba.
Kaya hindi ako sure kung um-attend ba o hindi sa awards night ang mga bida ng Hold Me Close na sina Julia Barretto at Carlo Aquino, maging ang direktor nilang si Jason Paul Laxamana.
Sa sampung official entries ng MMFF 2024, bukod-tanging ang Hold Me Close ang walang nakuhang award.
Of course, usap-usapan din ang pang-iisnab ng mga hurado sa Uninvited, lalo na kay Aga Muhlach sa kategoryang Best Actor.
Ang Star for All Seasons na si Vilma Santos-Recto na bida sa Uninvited, napaka-gracious.
Ngayong Disyembre 28, Sabado ng hapon ay nag-post si Ate Vi ng artcard sa Facebook kung saan kino-congratulate niya ang lahat ng winners sa MMFF 2024.
“Mabuhay kayong lahat, mabuhay ang pelikulang Pilipino!!!” sabi pa sa artcard.
Waley rin sa mga pangalang pinasalamatan ni Best Supporting Actor Ruru Madrid ang namayapang direktor na si Maryo J. de los Reyes (1952-2018).
Si Direk Maryo J. ang manager noon ni Ruru, maski itanong pa ninyo kay Carlos Castelo.
Read: 50th MMFF Gabi ng Parangal: mga ganap, umeksena, at uninvited
GORGY RULA:
Back-to-back ang pagkapanalo ng GMA Pictures sa kategoryang Best Picture, with Zig Dulay as director.
Ang entry ng GMA Pictures sa 49th MMFF na Firefly ay nagkamit ng tatlong tropeo — Best Picture, Best Screenplay (Angeli Atienza) at Best Child Performer (Euwenn Mikaell).
Ang Best Director ay si Pepe Diokno (GomBurZa).
Para sa 50th MMFF entry ng GMA Pictures na Green Bones, wagi muli ito sa categories na Best Picture, Best Screenplay (Ricky Lee at Angeli Atienza) at Best Child Performer (Sienna Stevens).
Ang tatlo pang awards ng Green Bones ay Best Actor (Dennis Trillo), Best Supporting Actor (Ruru Madrid), at Best Cinematography (Neil Daza).
Tabla bilang Best Director sa 50th MMFF sina Michael Tuviera (The Kingdom) at Crisanto Aquino (My Future You).
Back-to-back ang pagkaligwak kay Zig Dulay. Hindi man lang siya naka-tie?
Noong GMA Films pa ang pangalan ng GMA Pictures, nag-back-to-back din ang pagwawagi nito ng Best Picture with Jose Rizal (MMFF 1998) and Muro-Ami (MMFF 1999) na parehong pinagbidahan ni Cesar Montano, sa direksyon ni National Artist Marilou Diaz-Abaya.
Oh yes, back-to-back din ang pagkawagi ng Gender Sensitivity Award sa pelikulang idinirek ni Jun Robles Lana para sa The IdeaFirst Company, with Eugene Domingo in the cast.
Last year, Becky & Badette. This year, And The Breadwinner Is…
Halos limang oras ang awards ceremony ng 50th MMFF. 5:30 pm ang umpisa ng mga ganap sa Red Carpet. Nag-umpisa ang programa ng 8:16 P.M., at 12:52 A.M. nagwakas.
Last year ay walang jury prize, at first time ipinagkaloob ang Manay Vera-Perez Maceda Memorial Award, na ipinagkaloob kay Mother Lily Monteverde.
Para sa golden edition ng MMFF, waley na ang Manay Vera-Perez Maceda Memorial Award.
Pero merong Breakthrough Performance para kay Seth Fedelin, Special Jury Prize para sa Topakk at Isang Himala, Special Jury Citation kay Vice Ganda, Best Student Short Film, 2nd Best Student Short Film, 3rd Best Student Short Film, Special Jury Prize for Best Student Short Film, at MMFF Lifetime Achievement Award para sa Ama ng MMFF na si dating Presidente Joseph “Erap” Ejercito Estrada.
Kasabay ni Erap na dumating ang mga anak na sina Sen. Jinggoy Estrada at Jake Ejercito.
Nang matanaw ni Rob Gomez si Erap ay agad itong tumayo sa kinauupuan para magpugay sa kapatid ng kanyang lolo.
Ang kauna-unahang award ay iyong para sa 87-anyos na si Erap. Bumaba sa stage ang presenter na si Vilma Santos para iabot kay Erap ang trophy nito.
Ang nagbasa ng acceptance speech ni Erap ay si Sen. Jinggoy. Nang lumalalim na ang gabi ay umuwi na si Erap.
Read: Dennis Trillo, Judy Ann Santos lead MMFF 2024 Gabi ng Parangal
NOEL FERRER:
Una, congratulations sa lahat ng mga entries ng MMFF 50 sa kanilang magandang kontribusyon sa ating industriya.
Sana, makatulong ang Gabi ng Parangal sa box office results ng pelikula, at sana ituloy pa rin natin ang pagpupunyaging humikayat pa ng audience at sipagan pa ang pagpo-promote ng pelikula post-Gabi ng Parangal.
Congratulations sa mga nominado at nagsipanalo. Sa mga hindi naman pinalad, there’s always the PMPC Star Awards, the SPEEd’s Eddys at iba pang school award-giving bodies. Kanya-kanyang choices naman iyan, aminin natin.