GORGY RULA
Pagkatapos ng It’s Showtime nitong Sabado, April 5, 2025, kaagad na number one trending sa X ang #Miah, at karamihan sa mga post ay si Miah Tiangco ang tinutukoy.
Nag-trending din ang #ShowtimePANGKATagisan dahil sa mainit na pinag-usapan online ang tagisan nina Raven Heyres ng Pangkat Alab at ni Miah ng Pangkat Alon.
Pero natalo ni Raven si Miah na siyang naging dahilan ng pagkawala ng Pangkat Alon.
Tuloy pa rin ang laban ng Pangkat Alab sa Pangkat Agimat.
Pero nasa mechanics ng "Tawag ng Tanghalan" o "TNT" na ang matatalong pangkat ay magsasalba ng miyembro para ilipat sa maiiwang pangkat.
Dalawa ang pinili ng mga hurado para ilagay sa Pangkat Agimat at Pangkat Alab.
Ramdam na ramdam sa studio lalo na sa contestants ang tension na pati si Vice Ganda ay nanliliit na rin sa tinatawag niya.
Sa halip na si Marko Rudio ang tatawagin niyang magbubukas ng envelope ay pangalan ni Miah ang nabanggit niya.
“Pasensya na. Gulung-gulo na ang hormones ko. Yung kamay ko, pawis na pawis na,” sambit ni Vice Ganda.
Ang napili ng mga hurado na sina Ogie Alcasid, Pops Fernandez, at Louie Ocampo ay sina Miah Tiangco at Arvery Lagoring.
Nasa Pangkat Alab si Arvery, at sa Pangkat Agimat si Miah.
Marami sa mga netizens ang kumuwestiyon sa desisyon ng mga hurado. Agree sila sa pagkapili kay Arvery, pero kay Miah ay mas nararapat daw si Eunice Encarnada, o si Shanne Gulle o kaya si Makki Lucino.
May mga nagsasabing naging champion na rin naman daw si Miah, na sa The Clash ang tinutukoy nito.
Bukod pa riyan ay nagka-record na siya sa GMA Music. Kaya okey na raw iyon.
May hanash pang mas mataas naman daw ang scores na nakuha ni Eunice na naka-97.7% sa round 1 at naka-99% pa sa round 2.
Ano raw ba ang basehan at bakit hindi raw mabitawan si Miah Tiangco?
Pero iyon ang desisyon ng mga hurado, kaya wala nang magagawa.
Ang duda raw tuloy ng ibang netizens ay baka ang ending nito, si Miah Tiangco ang magiging champion, dahil nakikita raw na mas pinapaboran ito.
NOEL FERRER
Noong pagpasok pa lang ni Jeremiah Tiangco sa It's Showtime's "Tawag ng Tanghalan" Grand Resbakan ay marami na ang nagtataka kung bakit pa siya sumali dahil tinanghal na siyang champion sa The Clash.
Kahit ang mga taga-The Clash ay ayaw na lang magkomento sa pagsali ni Miah sa "TNT."
Nagtatanong tuloy ang iba kung ire-recognize pa bang isa sa mga The Clash winners si Jeremiah Tiangco ngayong nasa "Tawag ng Tanghalan" na siya?
Patapos na ang audition ng The Clash na magsisimula na ang airing sa June ng taong ito. Magiging bahagi pa kaya itong champion ng The Clash 2019?
May iba pang nagdududa kung committed ba ang It’s Showtime sa GMA-7 na huwag ilaglag si Jeremiah Tiangco.
Posibleng aangat ang singing career ni Jeremiah kung maganda ang kalalabasan ng pagsali niya sa "Tawag ng Tanghalan." Wala pa rin kasing produkto ang The Clash na sumikat nang husto.
Ganundin ang tingin ng karamihan na maaring maraming sisikat na Sparkle talents na kasali sa Pinoy Big Brother: Celebrity Collab. Malaki ang magagawa ng Kapamilya shows na ito sa ibang talents ng GMA-7.
JERRY OLEA
Nag-sign off na ang Pangkat Alon, pero tuloy pa rin ang laban ni Miah Tiangco. Abang-abang tayo sa mga susunod na ganap sa "Tawag ng Tanghalan," at kung ano rin ang kahihinatnan ng bagong season ng The Clash.
Teka! Ano na ba ang nangyari kay Golden Cañedo?