JERRY OLEA:
Ika-88 kaarawan ni Joseph Estrada sa Abril 19, 2025, Sabado de Gloria. Parang advance birthday gift sa kanya ang Lifetime Achievement Award sa Film Development Council of The Philippines (FDCP) Parangal ng Sining 2025.
Ginanap ang awarding noong Abril 11, Biyernes ng gabi, sa Seda Vertis North, Quezon City.
Pahayag ni FDCP Chair Jose Javier Reyes aka Direk Joey, si Joseph ay sagisag ng bidang Pilipino sa pelikula.
"Ngunit higit pa doon, siya ay naging simbolo ng tagapagtanggol at tagapangalaga ng mga manggagawa ng pelikulang Pilipino,” dagdag ni Direk Joey.
“Hindi mapapantayan ang napakarami niyang ginawa sapagka’t siya ay bahagi na ng kasaysayan ng ating pelikula.”
Kuwento ng 80-anyos na si Boots Anson Roa-Rodrigo, na presenter ng Gawad Lente para kay Joseph, “Ilang pelikula rin ang aming pinagsamahan ni Joseph Estrada.
“Dalawa sa mga paborito ko ay ang Ander di Saya si Erap (1973) at Tatay Na si Erap (1972).
“Marahil dahil dito siya lubos na nakilala bilang si Erap. Para sa mga ibang hindi pa ho nakakaalam, Erap, baligtad po ng ‘Pare.’
“And this is true, he wasn’t just my leading man. He was also my erap, my kumpare. My dear friend.
“And if I may add, in my second marriage in 2014, he was also my ninong.
“Kaya tuwing magkikita kami, nagmamano po ako sa kanya. At nagmamano din po siya sa akin.
“Lalo pa pong lumalim ang aming samahan sa Mowelfund."
Ang tinutukoy ni Boots na Mowelfund ay ang Movie Workers Welfare Foundation.
“Doon ko po napatunayan na ang puso ni Erap ay pusong punung-puno ng pagmamahal sa pelikula, at pusong punung-puno ng paglilingkod.
“He brought action not just in his movies but he was also an action man behind the cameras.
“He not only fought off contravidas but he also fought for the rights of the film workers.”
Maliban kay Erap, ang tatlo pang Lifetime Achievement Awardees sa 3rd FDCP Parangal ng Sining ay sina Charo Santos-Concio, Direk Lav Diaz, at Direk Laurice Guillen.
GORGY RULA:
Ang tumanggap ng trophy ni Joseph Estrada ay ang anak niyang si Senador Jinggoy Estrada.
Bahagi ng mensahe ni Sen. Jinggoy, “To be honored by your peers is the ultimate recognition of one’s talents and achievements.
“In behalf of my father, former President Joseph Estrada, our family, I would like to thank the Film Development Council of the Philippines for bestowing the Lifetime Achievement Award upon my father.
“Dalawang buwan lang ang nakakaraan noong nabigyan din ng pagkilala ng aking mga magulang sa Senado ang dating First Lady at former Senator Loi Ejercito Estrada.
“And as their son, no words can express the pride I feel for my parents and the legacy they have built in their respective fields.
“Mahirap pong pantayan at lalong mas mahirap higitan ang kanilang mga nagawa, lalo na ang aking ama, mapa-Senado man o sa larangan ng pagiging alagad ng Sining.
“Kapag sinabing Mowelfund at Metro Manila Film Festival, hindi po maaaring isantabi ang pangalang Joseph ‘Erap’ Estrada.
“My father was once not just an actor and movie producer. He was a visionary, truly an icon of the movie industry.
“Naglipana man ang mga fake news, hinding-hindi mababaluktot ang katotohanan sa mga nagawa ng aking ama sa pinakamamahal niyang industriya ng pelikulang Pilipino.
“Hindi ko na iisa-isahin ang kanyang mga nagawa dahil kayo na mismo ang makakapagpatunay nito.”
NOEL FERRER:
Sa 50th MMFF Gabi ng Parangal noong Disyembre 27, 2024 sa Solaire Resort & Casino, Parañaque City, pinagkalooban din si Joseph “Erap” Estrada ng Lifetime Achievement Award.
Magkatabi sila sa upuan ni Boots Anson Roa-Rodrigo.
Inalala ni Boots ang mga kuwelang hirit ni Erap.
Pagbabalik-tanaw pa ni Tita Boots, “Nung unang-unang inanunsyo niya in some public affair, na alam niyo naman si Erap, si patawa yan.
"'Kailangang malaman niyo na sa lahat ng mga leading lady ko, si Boots lang ang hindi ko niligawan!'
“Pero, of course, si Susan din, di ba?”
Ang tinukoy ni Boots na "Susan" ay ang yumaong si Susan Roces, na dati ring leading lady ni Erap.
Naniniwala si Tita Boots na ang biggest legacy na iiwan ni Erap sa movie industry ay ang Mowelfund Film Institute at Metro Manila Film Festival.
Ani Tita Boots, “Sabay yan, e. Sabay niyang na-found. Pero iyong Mowelfund kasi, in short, ang role niya, it was through him that the Mowelfund was institutionalized.
“Dahil dati, di ba, maraming artista led by him, Dolphy and FPJ, kilala sa kanilang generosity, sa pagtulong.
“Parati yan, kasal, libing, binyag. So, at some point, the story goes, no, na pinapatunayan naman niya yan, e, na nag-uusap yung tatlo.
“At sabi nga ni Erap, ‘Ginagawa naman natin ito—not that we’re complaining, not that we’re asking for anything in return—but if we’re going to do this over the long term, ba’t di natin i-institutionalize?’
“Dun nag-umpisa ang Mowelfund. Gumawa ng charter. Gumawa ng by-laws, and they consulted lawyers, administrators, kaya 50 years na ngayon.”
Nabanggit ni FDCP Chair Jose Javier Reyes na napakaraming ginagawa ni Dingdong Dantes para sa kapakanan ng mga manggagawa sa local showbiz.
Sumusunod si Dingdong kay Erap?
“Siguro if I may, dadagdagan ko rin yung sinabi ni Direk Joey. Si Dingdong, we take a lot of pride in that, ay nasa board ng Mowelfund,” sabi ni Tita Boots.
“Silang dalawa ni Alden Richards. And what a refreshing addition to the board!
“Kasi ito yung mga pinakasikat, ito yung mga pinakamagagaling! And yet they devote time, ha? Pag-attend ng meeting, pag-develop ng mga programs.
“Ewan ko kung papaano nila ginagawa yon, so I hope ma-sustain yung kanilang commitment despite their busy schedule. Nasa puso, e!”