Sunshine at Lasting Moments, panggulat ang lakas sa takilya

JERRY OLEA

Puwedeng bumaba ang ticket price ng Pinoy movies na ipinapalabas sa mga sinehan.

“Pag pakiusapan, pag nag-uusap kayo, puwede namang ibaba,” pahayag ni Film Development Council of the Philippines (FDCP) Chairman Jose Javier Reyes aka Direk Joey.

“May PHP270, minsan PHP230. Sa Robinsons daw, nagbaba pa. Dahil anniversary ng Robinsons, nagbaba sila.

“So it’s feasible. Ang PHP400, yung mga Hollywood blockbusters.”

Read: Maine Mendoza clarifies remark on Alden Richards meant no malice

SUNSHINE

Maliban sa taas ng presyo ng tiket sa sinehan, nakaapekto ang streaming platforms gaya ng Netflix kaya tumamlay ang moviegoers na manood sa cinemas.

“Kunyari PHP600 ang kinikita mo, gagastos ka pa ba ng PHP400 sa sinehan? E, alam mong after 100 days, nasa Netflix yan, e,” pagmamatuwid ni Direk Joey.

“Magkano ba ang monthly subscription sa Netflix? Sabihin nating PHP600 meron ang bayad mo sa Netflix a month.

“E, dyusko, ang dami mo nang mapapanood, mabubulag ka kung ima-max out mo, e.

“Pero kailangan, na-realize… yung pelikula mo, kailangan importante. Kailangan, event.

“Example, I’m proud of this. Sunshine, first weekend. After the first week, tatlong sinehan na lang dapat paglabasan niyan.

“E, pucha, sumipa noong weekend! Ngayon, may third week!”

Eksklusibong ipinalabas sa SM Cinemas ang Sunshine umpisa Hulyo 23, kasabay ang The Fantastic Four: First Steps, Incarnation, at The Ancestral Home.

Bida sa Sunshine si Maris Racal, sa direksiyon ni Antoinette Jadaone. May cameo rito si Piolo Pascual.

Read: First guesting ng BINI sa All-Out Sundays, tinutukan ng mga manonood

LASTING MOMENTS AND FOOD DELIVERY

Pagpapatuloy ni Direk Joey: “Another example, who would have thought… Lasting Moments?! Nag-work siya. May third week, OK.

“Event ba yon? Hindi, maganda ang content, OK. Kasi, let it be a lesson, pag puchi-puchi ang budget mo, hindi ka papanoorin. Kasi, hindi worth ng pera nila.

“Example din, Food Delivery. Who’d want to watch a documentary? Pero ngayon, pinag-uusapan, di ba?

“Dahil nung nagbanggaan pa yung dalawang coast guard ng China, sabi ko nga kay Baby Ruth [Villarama] at kay Chuck [Gutierrez], ‘Grabe naman ang promo niyo. Grabe ang promo niyo!’”

51ST METRO MANILA FILM FESTIVAL

Interesado si Direk Joey sa kahihinatnan ng 51st MMFF kung saan apat na entries na ang napili — Call Me Mother nina Vice Ganda at Nadine Lustre, Manila’s Finest ni Piolo Pascual at Kyle Echarri, Rekonek nina Carmina Villarroel at Gerald Anderson, at ang horror trilogy na Shake, Rattle & Roll: Evil Origins.

“Yung next four, kung ano doon ang papalo. Dahil alam naman natin sa Metro Manila Film Fest, masuwerte na kung tatlo ang bumongga!” bulalas ni Direk Joey.

“Sana, tuluy-tuloy na ang pagbaba ng ticket price sa sinehan. Pero hindi naman nangangahulugang tuluy-tuloy ang pagbaba, na kailangang babaan din ang kalidad ng ginagawa mong pelikula.

“Saka alam niyo, ang kalaban ngayon, yung punyetang vertical. Yung mga vertical ano, dyusko!”

Nakachikahan si Direk Joey ng mga taga-media sa presscon ng Philippine Film Industry Month (PFIM) 2025: Pelikula at Pilipina noong Agosto 15, 2025, Biyernes, sa Limbaga 77 restaurant, Sct. Limbaga St., Brgy. Laging Handa, Quezon City.

Read: Liza Soberano answers bashers shaming her for speaking up about past trauma

NOEL FERRER

Bida sa Lasting Moments sina Sue Ramirez at JM de Guzman, sa direksiyon ni Fifth Solomon.

Tantiya ng source ng PEP Troika ay naka-PHP30M ito sa three weeks.

Mas surprising para kay Direk Joey Reyes ang pagsipa sa takilya ng Lasting Moments kesa sa pag-ariba ng Sunshine.

Katuwiran ni Direk Joey: “Sunshine kasi, galing sa festivals iyan, e. Di ba, nag-Crystal Bear et cetera. May reputasyon.

“Yung niche market niya, mga manonood niyan, mga cineastes, OK. Manonood iyan, OK.

“Pero dumaan ang ingay, OK, nag-umingay at pinanood. Merong excitement na na-create, so I’m happy for Antoinette.

“At saka kung papanoorin ninyo ang Sunshine, it’s not an easy watch, ha? It’s not an easy watch.

“Ang daming question na umiikot sa iyo pero that’s the whole point of the movie.

“Nagtaka ako sa Lasting Moments. OK, magprangkahan tayo, ha? Sinong stars niyan?

“They’re not, you know, the Kathryn [Bernardo] level, ano? Si Sue saka si JM. Si Sue, kagagaling lang sa isang pelikula which did not fare as well.

“So what is it about Lasting Moments? It’s a romantic drama, OK. Meron bang need to address that? Hindi ba?

“Tapos ano pa yung pinagdaanan ni Fifth Solomon bago maipalabas ang pelikula which is as dramatic as the movie, di ba?

“So you know, ano yun? That’s something worth addressing.”

Read: BINI sues vlogger for unjust vexation, cybercrime offense

LOCAL MOVIES VS FOREIGN MOVIES

Originally ay Mayo 21 ang playdate ng Lasting Moments, with 20 cinemas. Iniurong ito sa June 4 playdates, kung saan 30 cinemas ang inilaan dito.

Nagpasya ang writer-producer-director na si Fifth na iurong ito sa July 30 playdate, kung saan nabigyan ito ng mas maraming sinehan.

Bale pitong Hollywood blockbusters ang iniwasan ng Lasting Moments sa local cinemas.

Ang mga ito ay Mission: Impossible — The Final Reckoning, Lilo & Stitch, How To Train Your Dragon, F1 The Movie, Jurassic World Rebirth, Superman, at The Fantastic Four: First Steps.

Kabilang sa Pinoy movies na nakipagsabayan sa mga iyan ang ConMom, Isang Komedya sa Langit, Beyond the Call of Duty, Only We Know, Cheat Day, Flower Girl, Song of the Fireflies, Unconditional, I Remember You, at Sunshine.

Dalawang pelikulang Pinoy ang kasabay ng Lasting Moments na nag-showing noong Hulyo 30, P77 ni Barbie Forteza at How To Get Away From My Toxic Family.

Agosto 6 ipinalabas ang Meg & Ryan at Lola Barang, kasabay ng Weapons, Materialists, Freakier Friday, at Omniscient Reader: The Prophecy.

Tatlong Pinoy movies ang nag-showing umpisa Agosto 13 — Sa Likod ng Tsapa, Wild Boys, at Food Delivery: Fresh from the West Philippine Sea.

Kasabay ng mga ito ang foreign movies na The Naked Gun, Evil Within Walls, at Nobody 2.

Bukas, Agosto 20, Miyerkules, ang opening sa local cinemas ng Mudrasta: Ang Beking Ina! ni Roderick Paulate, at ng Posthouse nina Sid Lucero at Bea Binene.

Kasabay ng mga ito ang showing ng Demon Slayer: Infinity Castle, She Rides Shotgun, at The Life of Chuck.

Nakapuwesto sa August 27 playdate ang Outside de Familia nina Ruby Ruiz, Sheila Francisco, Gelli de Belen, Luis Alandy, Matet de Leon, Rey “PJ” Abellana, at Peewee O’Hara.

Kasabay nito ang showing ng Afterburn, Caught Stealing, My Daughter is a Zombie, at The Roses. Maaari pang magkaroon ng pagbabago ang mga playdate na ito.

Para sa updates, bisitahin ang Facebook pages ng Cinema Exhibitors Association of the Philippines (CEAP), SM Cinema, Ayala Malls Cinemas, at Robinsons Movieworld, maging ang website ng Click The City.

GORGY RULA

Ayon sa Box Office Mojo, ang sampung pinakamalalakas na pelikula worldwide ngayong 2025 as of this writing ay ang mga sumusunod:

1. Ne Zha II, $1.899B
2. Lilo & Stitch, $1.030B
3. A Minecraft Movie, $955M
4. Jurassic World: Rebirth, $829M
5. How To Train Your Dragon, $626M
6. Mission: Impossible - The Final Reckoning, $597M
7. Superman, $595M
8. F1: The Movie, $591M
9. The Fantastic Four: First Steps, $469M
10. Captain America, Brave New World, $415M

Siyempre, mababago pa ang ranking ng mga iyan, at madadagdagan ang grosses ng iba.

Sa Biyernes, Agosto 22, pa lamang ang wide release sa North America ng Chinese animated adventure comedy film na Ne Zha II.

Masasabi nating mas malakas talaga sa takilya ang Superman na unang pelikula ng DC Universe (DCU) kesa sa The Fantastic Four: First Steps na ika-37 pelikula sa Marvel Cinematic Universe.

Ang iba pang pelikula na lumampas sa $100M ang worldwide gross this year ay Thunderbolts, $382M, Sinners ($366M), Final Destination: Bloodlines ($285M), Snow White ($206M), Demon Slayer: Infinity Castle ($160M), Elio ($151M), 28 Years Later ($150M), Dog Man ($146M), Bridget Jones: Mad About The Boy ($140M), Ballerina ($134M), Mickey 17 ($133M), The Bad Guys 2 ($118M), Karate Kid: Legends ($110M), Detective Conan: One-Eyed Flashback ($109M), Smurfs ($105M), at The Accountant 2 ($103M).

Bale dalawampu’t pitong (27) pelikula na ang lumampas sa $100M-mark ang worldwide gross ngayong 2025.

Hindi porke lumampas sa $100M ang worldwide gross ng pelikula ay blockbuster ito.

Yung Snow White nina Rachel Zegler at Gal Gadot ay tinatayang $240-$270M ang production budget.

Kaya kahit $206M ang worldwide gross nito, ikinukunsidera itong box-office bomb. Certified flop, semplang sa takilya.