JERRY OLEA
Maluha-luha si Eugene Domingo matapos mapanood ang trailer ng MMFF 2025 official entry na UnMarry noong Disyembre 5, 2025, Biyernes sa Noctos bar, Sct. Tuason St., Quezon City.
“Alam mo yung paminsan-minsan, nakakagawa ka ng pelikulang maganda,” sabi ni Uge nang usisain ng host na si MJ Felipe kung bakit teary-eyed siya.
“Kasi, sincere lang sa mensaheng gustong ipalabas. Walang super-hype drama. Walang hysterics. It’s just telling a story that all of us can relate.
“Because all of us are capable of loving and losing a love.”
EUGENE DOMINGO ON THE PROCESS OF ANNULMENT
Naka-relate siya sa movie dahil sa kuwento ng hiwalayan? Naranasan niya iyon…
“Talagang mababaw talaga ang luha ko ngayon. Kasi, menopause na ako!” bulalas ni Eugene.
“Nakakaloka! Susunod na pelikula ko nga pala yung tungkol naman sa menopause. Nakakaloka.
“Anyway, sa point na ito, I’m so happily married. I just got there. I married twice but I’m a late bloomer.
“So I cannot imagine myself to reach that point na magpapa-annul. It’s very painful, just the idea.
“Because you invested a lot of emotions.
“But anyway, speaking of my role, my role is Atty. Jackie [Lombridas] and I’m the tool so that mai-present namin ang pinagdadaanan ng gusto magpa-annul.
“So as Atty. Jackie, ako ang magpepresenta. Eto yung mga proseso, at sa opisina ko magkikita itong dalawang ito.”
Ang dalawang tinutukoy ni Uge ay ang mga bidang sina Angelica Panganiban at Zanjoe Marudo na gumanap bilang Celine at Ivan, respectively.
Pagpapatuloy ni Uge: “And so the situations are maybe familiar to all of us na para kang pumupunta sa mga alam mo na, sa mga agencies, nangangailangan ng mga assistance sa legal procedures.
“The situations can be funny. And I’m very thankful to Direk Jeff and to Chris [Martinez, scriptwriter] because they wrote very funny scenes but are not pushing.
“It’s just real and familiar and very Filipino and funny. And it’s really happening.”
Nasa cast din ng UnMarry sina Tom Rodriguez, Solenn Heussaff, at Nico Antonio, sa direksiyon ni Jeffrey Jeturian.
Karangalan para kay Uge na makatrabaho muli si Direk Jeffrey.
Mensahe pa ni Uge para sa kanilang direktor: “I really like how you give us the freedom to interpret our roles but not going overboard.
“And I really appreciate the tone of our movie which is very sincere.”
GORGY RULA
Nagkasama-sama na sina Angelica Panganiban, Eugene Domingo, Tom Rodriguez, at Nico Antonio sa comedy film na Here Comes The Bride na ipinalabas noong Mayo 2010.
Idinirek iyon ni Chris Martinez, na scriptwriter ng UnMarry katuwang si Therese Cayaba.
Ano ang reaksiyon ni Uge na naka-work niya uli si Angelica?
Napangiti si Uge: “Naku, kung it’s an honor for you, no, to do a film like this with Direk Jeff and everyone, ako, nasa akin talaga yung honor and pleasure.
“Kasi, una sa lahat, totoong may relationship na kami. Inaanak ko na siya talaga.
“From Here Comes The Bride na nagpalit yung kaluluwa namin at ninang niya ako doon, tinotoo niya, yes!
“Kinuha na talaga niya akong ninang sa kasal niya. Pero buti na lang, hindi nagpalit yung kaluluwa namin, at hindi ako ang naka-honeymoon ni Gregg [Homan].
“Pasalamat ka! Oo, hindi nagkaroon ng ano, ano iyon? Soul-swapping at saka eclipse.
“Ang liliit na ng mga bigay ni Angelica ngayon. Meaning, galing na talaga sa puso.
“Hindi na yung parang acting na natutunan niya, ipinapakita niya sa mga serye. Yung ganun.
“Ngayon, yung mga ibinibigay niya, ay!!! Masyado nga minsang kimi. Siguro masyado lang malapit sa mga pinagdaanang sakit.
“Pero konting galaw lang, konting mata, konting bibig, konting hinga — ano na, tagos na sa iyo.
“So, marami ka namang natutunan sa mga pinagdaanan mong pain.”
Sambot ni Angelica, “Sana naman, di ba?! Gamitin natin, pagkakitaan natin!”
Napahalakhak si Uge.
NOEL FERRER
Ang sabi naman ni Angelica Panganiban tungkol kay Eugene Domingo sa reunion movie nilang UnMarry: “Nakakamangha! Palagi! Ang sarap panoorin.
“Pero sabi ko nga, si Ate Uge, meron siyang magic na hindi ka mai-intimidate. Ma-e-excite ka.
“Kasi, may mga artista, di ba, na pagtuntong mo doon, ‘Paano ba ito? Ano ang gagawin ko? Ang overwhelming niya, di ba, yung nakakakaba, hindi ako makaarte.’
“Siya, hindi. Warm, warm. Yung ang sarap, ang sarap, ang sarap niyang makatrabaho pa din. Ang sarap niyang panoorin.
“And of course, ang saya-saya namin sa set dahil sa kanya!”
EUGENE REUNITES WITH ZANJOE
Naging leading man ni Uge si Zanjoe Marudo sa pelikulang Kimmy Dora: Kambal sa Kiyeme (2009), sa direksyon ni Joyce Bernal.
Ang scriptwriter niyon ay si Chris Martinez.
Ang sabi ni Zanjoe patungkol sa pakikipagtrabaho muli kay Uge sa UnMarry, “Nakaka-excite. Nakaka-excite gumawa ng scene. Parang alam mong may mangyayari, di ba? Nabasa mo na yung script…”
Natawa si Angelica at sumingit: “Ha! Ha! Ha! Parang siya ang bahala pag kaeksena mo siya. Kaya niya iyan, siya ang bahala!”
Dagdag ni Zanjoe: “Ang sarap, ang sarap ng eksena. Kasi parang unpredictable yung mga scenes kahit ni-rehearse na namin. Ang saya!
“And yung huling project namin ni Uge, Kimmy Dora… tapos ngayon, nagkasama kami ngayon. Siyempre excited ako.”
Tampok din sina Zanjoe at Eugene sa comedy film na Wedding Tayo, Wedding Hindi (2011) na isinulat at idinirek ni Jose Javier Reyes.
Ang partner doon ni Zanjoe ay si Toni Gonzaga, samantalang ang katambal ni Uge ay si Wendell Ramos.