JERRY OLEA
Dalawa ang pelikula ni Dustin Yu sa 51st Metro Manila Film Festival (MMFF) — Love You So Bad at Shake, Rattle & Roll: Evil Origins.
Aling role ang mas mahirap para sa kanya?
“Actually, nung sinu-shooting ko po siya, sabay siya,” lahad ni Dustin sa MMFF 2025 Celebrity Golf Tournament noong Disyembre 9, 2025, Martes, sa Wack Wack Golf & Country Club, Shaw Blvd., Mandaluyong City.
“Palit-palitan. Every other day, iba. Love You So Bad and Shake, Rattle & Roll. So tuluy-tuloy siyang ganun.
“So ako, para sa akin, parehong mahirap, e. Pero yung mahirap, magkaiba kasi ng genre. So, doon ako nahihirapan, yung pag-switch.”
Read: DOJ junks missing sabungeros complaints vs Gretchen Barretto
DUSTIN YU ON PLAYING TWO EXTREME CHARACTERS
Magkaibang-magkaiba yung karakter niya sa dalawang pelikula?
Tumango si Dustin, “Sobra, yes. Magkaiba talaga. Kumbaga sa Shake, talagang sigawan, takutan. Tapos biglang dito sa Love You So Bad, pakilig.”
Kahit nahirapan siya, aling project yung mas na-enjoy niyang gawin?
“Well, yung dalawa naman. Shake, Rattle & Roll, enjoy ko siya, kasi iba yung thrill habang nagsu-shooting ng horror, e,” tugon ni Dustin.
“Kumbaga, nalalabas mo yung ibang atake ng pagiging artista, o pagiging aktor. Kasi mahirap gumawa ng horror film, aminado naman ako diyan.
“Sa Love You So Bad naman, masaya kasi kasama ko, mga housemates. Mga malalapit sa puso ko. So, enjoy rin talaga sa shooting.”
Co-stars ni Dustin sa Love You So Bad sina Bianca de Vera, Will Ashley, Ralph de Leon, at Vince Maristela.
Maliban kay Dustin, kabilang sa cast ng Shake, Rattle & Roll: Evil Origins sina Carla Abellana, Janice de Belen, Loisa Andalio, Ysabel Ortega, Ashley Ortega, Arlene Muhlach, Ara Mina, Francine Diaz, Seth Fedelin, JM Ibarra, at Fyang Smith.
Nasa horror trilogy rin sina Sassa Gurl, Alex Calleja, Arkin Lagman, Kaila Estrada, Richard Gutierrez, Ivana Alawi, Manilyn Reynes, Matt Lozano, Raven Rigor, Sarah Edwards, at Dylan Yturralde.
Read: PBB Celebrity Collab ex-housemates, paldung-paldo sa MMFF 2025
GORGY RULA
Nabigla sina Bianca de Vera at Dustin Yu nang diretsahan kong tinanong kung sila na bang dalawa.
Magkakasama sila nina Will Ashley na dumalo sa Celebrity Golf Tournament ng 51st MMFF.
Sinakyan ang lakas ng love triangle nila na nabuo sa Pinoy Big Brother (PBB): Celebrity Collab Edition.
Tila mas lumalim ang samahan nina Bianca at Dustin, na ang duda ng karamihan ay nagkadebelopan na at baka silang dalawa na.
Natawa sina Bianca at Dustin nang itinanong ko ito sa kanila.
“Hindi po! Ha! Ha! Ha! Ha!” mariing pagtanggi ni Bianca.
Dagdag niya, “No. Actually, the three of us are... asan ba tayong tatlo?
“We’re really all in a journey of supporting each other, and of course finding ourselves and nakasuporta naman. Lahat may kanya-kanyang understanding.
“Yeah! Bata pa tayo, di ba?”
Nagtanungan pa sila ng edad nila at bata pa naman daw silang tatlo.
“Bata pa kami!” bulalas ni Dustin.
Itinanggi ni Dustin ang isyung ligawan, pero natuloy raw ang maganda nilang friendship.
“Si Bianca talaga, matalik na kaibigan ko siya talaga. Kumbaga, tuluy-tuloy lang kung ano yung pinagsamahan namin sa PBB of course.
“Paglabas namin, mas nakilala namin yung isa’t isa, and yung friendship namin talaga, mas naging matibay,” saad ni Dustin, na ni-represent din sa Celebrity Golf ang Shake, Rattle & Roll: Evil Origins.
Read: Dustin Yu evasive about real score with Bianca De Vera
NOEL FERRER
Friends ba sina Dustin Yu at Will Ashley, o mas angat ang pagiging rivals?
“Friends,” sagot ni Dustin.
May kani-kanyang manok ang fans sa loveteams na WillCa at DustBia. Balitaktakan ang iba!
“Kita niyo naman kami ni Will, magkaibigan talaga kami. Kumbaga, sinusuportahan namin ang isa’t isa,” sabi ni Dustin.
“Yung mga fans, hindi naman natin mapipigilan ang mga iyan. Pero wala, ganoon lang talaga sila. May kani-kanya talaga silang mga sinusuportahan.
“Pero kami ni Will, suportado naman kami para sa isa’t isa.”
Naaapektuhan ba ang friendship nila ni Will sa bangayan ng fans?
“Hindi naman. Hindi naman, kahit pilit kaming pinag-aaway o kung anu-anong mga sinasabi ng mga tao,” sey ni Dustin.
“Siyempre at the end of the day, ayaw naman namin na masira yung friendship namin. Yun naman talaga iyon.
“Kahit na sino naman, kahit sino naman na tao, iyon naman ang importante. Friendship talaga.
“Hindi kami gagawa ng isang bagay para masira iyong friendship.”
Anong message niya para sa fans na labu-labo online?
“Wala na akong message diyan. Wala na akong magagawa. Merry Christmas na lang!” sambit ni Dustin.
“Kasi ako, kahit ano naman ang sabihin ko, natutunan ko na sa sarili ko na tanggapin na ganoon talaga iyong industriya.
“So ako, tuluy-tuloy lang. Basta masaya ako, enjoy lang ako. Bahala na sila. Tuluy-tuloy rin lang sila sa paggagawa nila ng gulo pero ako, hindi na lang ako mai-stop para maging masaya.”
Sa Disyembre 19, Biyernes, ang MMFF 2025 Parade of Stars sa Makati City.
Dadaan ang parada sa Buendia Ave., Ayala Ave., Makati Ave., at J.P. Rizal St., patungo sa Ayala Malls Circuit Makati.
Kaabang-abang kung mananatili sina Dustin at Will sa float ng Love You So Bad kasama si Bianca de Vera.
May isa pang entry kasi si Will, yung Bar Boys: After School.
At si Dustin naman ay kasama rin sa Shake, Rattle & Roll: Evil Origins.