JERRY OLEA:
Ang pakulo ng smorgasbord na Rekonek ay ito lang daw ang Christmas movie sa 51st Metro Manila Film Festival.
Nag-umpisa kasi ang kuwento nito ilang araw bago mag-Pasko. Pero iyong third episode ng Shake, Rattle & Roll: Evil Origins, kunsaan tampok sina Richard Gutierrez, Dustin Yu, Ivana Alawi, Manilyn Reynes, at Matt Lozano, ganoon din ang setting—a few days before Christmas.
Ang Unmarry, merong Christmas party scene, kunsaan nag-moment pa sina Angelica Panganiban at Zanjoe Marudo sa loob ng elevator.
GLAIZA DE CASTRO ON BAR BOYS
Sa tent ng Bar Boys: After School bago mag-umpisa ang MMFF 2025 Parade of Stars noong Disyembre 19, 2025, Biyernes sa Makati City, inusisa si Glaiza de Castro kung ano ang Christmas message ng kanilang movie.
“Katulad ng sinabi po ni Direk Kip [Oebanda] kanina, we’re all better persons now,” sabi ni Glaiza.
“So I think, after watching this film, hopefully, iyong mga taong manonood nito would be better people.
"Alam naman natin kung paano magsulat si Direk Kip, kung paano siya magbigay ng mensahe…
"Being a good person means being kind, siyempre mapagmahal. Magkakamali at magkakamali pa rin tayo at times, pero we will always make better choices and decisions.”
GLAIZA DE CASTRO CHRISTMAS PLANS
Busy si Glaiza sa promo ng Bar Boys: After School. Paano ang Christmas nila ng husband niyang si David Rainey?
“Ay! Naka-schedule na po iyan. Nakaplano na po iyan ahead. Handa po tayo diyan,” nakangiting tugon ni Glaiza.
“Balanse po ang schedule natin. At masaya po ako dun. This time, sa Philippines po kami. Naka-plan na po kami.
“Next week, wala na ako sa Manila. Kaya po ako nasa Metro Manila Film Fest ngayon, kasi next week, nasa probinsya na po kami with the family.
“Filipino Christmas celebration naman sa Baler [Aurora].”
Dumalo si Glaiza sa premiere night ng Unmarry nitong Disyembre 20, Sabado, sa Trinoma.
Ang premiere night ng Bar Boys: After School ay bukas, Disyembre 22, Lunes, sa Robinson’s Galleria sa Ortigas Center.
Aside from Glaiza, nasa Bar Boys: After School sina Carlo Aquino, Rocco Nacino, Enzo Pineda, Kean Cipriano, Odette Khan, Will Ashley, Sassa Gurl, Emilio Daez, Klarisse de Guzman, Therese Malvar, Benedix Ramos, at Bryce Eusebio.
Read: Derek Ramsay, nagbakasyon sa U.K. kasama ang anak na si Lili
GORGY RULA:
Dumalo rin ang mag-asawang Glaiza at David Rainey sa premiere night ng Unmarry bilang suporta nila kay Angelica Panganiban.
Si Angelica kaya ang isa sa nagbigay ng payo kung paano na sila magka-baby next year?
Nag-cross ng fingers si Glaiza nang tinanong namin kung sa 2026 ba ay makakakuha na kami ng good news tungkol sa pagkakaroon na nila ng baby.
“Ipag-pray natin!” bulalas ni Glaiza.
“Ready naman kami. May mga kaibigan po ako na magbibigay sa akin ng advice kung paano harapin ang bagong taon. Sana.”
Noong bagong kasal pa lang sina Glaiza at David ay sinasabi ng aktres na gusto na gusto raw muna nilang magkaroon ng moment na silang mag-asawa lang muna.
Kapag ready na raw siya, saka nila planuhin ang magka-baby. Ngayon ay handa na raw ang Kapuso actress na maging mommy.
Read: Angelica Panganiban, pang-Best Actress sa MMFF 2025?
NOEL FERRER:
Understandable na “iniiwas” sa isa’t isa sina Tom Rodriguez ng Unmarry at Carla Abellana ng Shake, Rattle & Roll: Evil Origins sa MMFF 2025 events.
Nakakatuwa na nagsusuportahan iyong stars ng 51st MMFF. Ang mga bida ng I’mPerfect na sina Earl Amaba at Krystal Go ay dumalo sa premiere ng Rekonek. Sina Glaiza de Castro at Kean Cipriano ng Bar Boys: After School, Zaijian Jaranilla ng I’mPerfect, at John “Sweet” Lapus ng Call Me Mother, um-attend sa premiere ng Unmarry.
Bumilib nga si Glaiza kay Tom at sinabihan ito nang magkita sila sa parking lot, “Nakakagalit ka!” Ang sabi pa ni Tom, “Ako rin, nainis sa sarili ko!”
Ngayong Disyembre 21, Linggo, ang premiere ng I’mPerfect sa SM North EDSA, Quezon City.
Bukas, Disyembre 22, Lunes, ang premiere night ng Bar Boys: After School sa Robinson’s Galleria sa Ortigas Center.
At sa Disyembre 23, Martes, ang premiere night ng Call Me Mother sa SM Megamall, Mandaluyong City.
Sa Disyembre 27, Sabado, ang gabi ng parangal sa Dusit Thani Hotel. Abangan natin ang mga kaganapan sa mga event na ito!!!