JERRY OLEA
Queer love story ang pelikulang Until She Remembers kung saan gumanap na lovers sina Charo Santos-Concio at Boots Anson Roa-Rodrigo.
“Ang mensahe ng pelikula, kahit paghiwalayin mo ang dalawang pusong nagmamahalan, gagawa’t gagawa ng paraan ang universe para magkita muli,” mabining sambit ni Ma’am Charo sa celebrity premiere ng movie noong Pebrero 19, 2026, Huwebes, sa The Block, SM North EDSA, Quezon City.
Sambot ni Tita Boots, “You know, in delving into the love angle, the love issue here, ang naiisip ko, yung agape love which is the purest form, di ba?
“Even in the Bible, we talk that… and parang yun yan, e. Walang conditions, walang rancor, walang dala-dalang sama ng loob.
“It’s all-giving. It’s an all-giving thing, and that was the kind of love that the character of Charo particularly, she was the giving one.”
Read: Charo Santos at Boots Anson Roa-Rodrigo lesbian couple sa movie
UNTIL SHE REMEMBERS CAST MEMBERS REACT TO ANTI-GAY REMARKS OF ALVIN ARAGON
Napapanahon ang showing ng Until She Remembers sa Pebrero 25, 2026, Miyerkules, dahil Love Month ngayong Pebrero, at mainit na pinag-uusapan ang same-sex relationship dahil sa mga pahayag ni Alvin Aragon kaugnay rito.
Pananalig ni Alvin, batay sa Bibliya ay mapupunta sa impyerno ang mga homosexual.
Malumanay na pahayag ng 70-anyos na si Ma’am Charo: “Ako kasi, mapang-unawang tao, e. Tinatanggap ko… loving is a human experience.
“Walang kasarian. Di ba, walang edad, walang gender, walang katayuan sa buhay. “Pag mahal mo, mahal mo — sa akin iyon. Sa opinyon ko yon.”
Pagmamatuwid ng 81-anyos na si Tita Boots: “Sino pa yung sususugan natin kundi yung Kataas-taasan na nagsabi, ‘Judge ye not, lest ye be judged.’
“At saka I think from Matthew na, ‘The measure with which you measure shall be measured unto you.’
“Kaya dito, wala, walang judgment. And even with the relationships that abound now, na years back, e, closeted; ngayon nga, bukas na… they’re all embracing, we are all embracing.”
Ang dalawang Biblical quote na binanggit ni Tita Boots ay mula sa Sermon on the Mount (Matthew 7: 1-5) ni Jesus.
Present sa celebrity premiere ang direktor na si Brillante Mendoza, producer na si Wilson Tieng, at co-stars nina Ma’am Charo at Tita Boots na sina Barbie Forteza, Angel Aquino, Albert Martinez, Angel Latorre, at Bianca Kierulf.
Dumalo rin sina Dingdong Dantes, Alden Richards, National Artist Ricky Lee, Film Academy of the Philippines Director General Paolo Villaluna, Mowelfund President Rez Cortez, Malou Santos of Star Cinema, Enchong Dee, Bea Binene, Kristoffer Martin, Harlene Bautista, at iba pa.
Read: Alvin Aragon criticizes celebrity parents of LGBTQIA+ children
GORGY RULA
May mga umayon sa pag-weaponize ni Alvin Aragon sa Bible kaugnay sa homosexuality. Meron ding mga na-trigger at nanggigil.
“I respect people’s privacy and choices,” reaksiyon ni Angel Aquino, na aminadong naa-attract sa kapwa babae.
“Di ba, in the same way that when I spoke about it, they… you know… I don’t know if anyone got angry or disappointed, pero I appreciate the respect that I received from those who gave it.
“So ako rin, I will afford it to those people, di ba, who choose to still not speak about it. Kung hindi sila komportable, why force them?
“It’s really... sana lang, eventually, they will learn to live out their truth. Kasi, it’s so important, di ba?
“Parang… sana mapalaya din nila yung sarili nila eventually. But as long as… they wanna stay in their comfort zone, let them. Live and let live, di ba?”
Read: Sofia Trazona reacts to stepdad Alvin Aragon's anti-gay remarks
ANGEL AQUINO ON WEAPONIZING RELIGION TO CONDEMN SAME-SEX RELATIONSHIP
E, sa mga nagsasalita laban sa same-sex relationship, ano ang saloobin niya? 2026 na, ginagamit pa ng iba ang relihiyon bilang weapon…
“Well, yun nga! Guys! Ha! Ha! Ha! Ha! Anong oras na, anong taon na, di ba?!” bulalas ni Angel.
“Ako, para sa akin lang, let’s all have open minds and open hearts. Love is love, and in the end, it’s all that matters, di ba?
“There’s really no gender when it comes to love. It’s really just two people, two spirits, two souls who have that reverence for each other.
“So, bakit hindi natin pagbigyan yon, di ba? Bakit kailangan natin silang pigilan kung yun ang nararamdaman nila?
“Basta lang they don’t cause each other pain. If anything, tayo yung nagko-cause ng pain sa kanila, kasi hindi natin sila pinapayagan. Hindi natin sila naiintindihan.
“Pero siguro, magiging mas malaya sila kung papalayain natin sila. So, let’s be inclusive.
“Let’s be open-minded. And let’s keep our hearts open.”
Read: Celebrities react to Alvin Aragon’s controversial religious stand
NOEL FERRER
Nagkomento rin si Albert Martinez kaugnay sa pagkondena ni Alvin Aragon sa homosexuality gamit ang Bible.
Didiretso raw sa impiyerno ang mga nag-i-indulge sa same-sex relationship?
Read: StarStruck alum Alvin Aragon draws backlash over anti-gay remark
Ani Albert: “Ahhmm sa akin, pananaw yan ng isang tao. Pananaw ng isang individual. Of course, we follow as Christians kung ano yung tama.
“But then again, we’re in a different society wherein finding love is hard, and then you find love, your true friend — siguro not necessarily na yung susuwayin natin yung nasa Bibliya.
“Pero ito lang naman yung they become real friends, friends na to a point wherein ‘wala tayong iwanan.’
“So I believe, my opinion, wala naman silang viniolate. Ang ano lang nila dito is ‘magkasama tayo hanggang mamatay.’”