GORGY RULA
Ginunita ng Claretian priests at missionaries ang 26th death anniversary ni Father Rhoel Gallardo noong Linggo, Mayo 4, 2026, sa pamamagitan ng pagpapalabas ng documentary film na Seeds of Peace: The Life of Fr. Rhoel D. Gallardo, CMF na ginanap sa Cinema 12 ng Gateway 2, Cubao, Quezon City.
Dinaluhan ito ng mga paring taga-Claret na nag-produce ng pelikula, kasama ang pamilya ng namayapang pari.
Nandoon din ang ilang kapatid ni Father Rhoel, mga kaibigan, pati ang ilang survivors sa kidnapping na ginawa ng grupo ng Abu Sayyaf sa Tumahubong, Basilan, noong Abril 2000.
Inilahad sa documentary film ang ugat ng pag-abduct kina Father Rhoel at mga kasamahan sa Claret School sa Tumahubong, hanggang sa pagpatay sa kanya at ilang kasamahan nito.
Itinuring si Father Rhoel na martir dahil sa pagsasakripisyo niya para sa teachers, estudyante at iba pang kasamahang nakidnap.
Hindi niya isinuko ang kanyang pagiging Kristiyano.
Kahit na bihag siya ng mga Abu Sayyaf ay patuloy pa rin siya sa pagsamba at lalong tumibay ang paniniwala sa Panginoon.
ZAIJIAN JARANILLA PLAYS FR. RHOEL GALLARdo
Si Zaijian Jaranilla ang gumanap si Fr. Rhoel Gallardo para sa reenactment scenes.
Ayon sa mga taga-Claret na nag-produce ng Seeds of Peace, malaking bagay raw ang pagiging Santino ni Zaijian sa teleseryeng May Bukas Pa, kaya siya ang bumagay sa role.
Sabi pa ng direktor ng pelikula na si Rommel Galapia Ruiz: “Pinili ko siya in a way na pag tinitingnan mo si Z, may mga moments na sa mata niya na alam mong kayang i-portray kung sino si Father Rhoel.
“Actually, mahirap piliin kong sino ang gaganap kay Father Rhoel. Ang daming pagkakataon na hindi mo alam kung papaano mo siya i-portray dahil isa siyang martyr.
“Pinili ko lang... maliban sa pagiging Santino niya before nung bata siya, pinili namin siya because of the depth na meron siya in terms of acting.”
Ang reaksyon ni Zaijian: “Sobrang saya lang. Wala akong ibang nararamdaman kundi joy.
"Kasi, nai-share ko yung story ni Father Rhoel. At isang malaking karangalan.
“At nabanggit din sa akin nina Father Ama at nila Direk Rommel na wino-work out yung pagiging saint niya.
“So, parang napakalaking bagay po yun sa akin kung matuloy man siyang maging saint, na maipalaganap yung istorya niya.
“Dun sa sinabi ni Direk kung bakit ako yung naging choice niya… Siguro po… bukod po dun sa pagiging Santino — ngayon ko lang sinabi din.
“Nung bata po ako, lagi po akong dinadala ng lola ko sa charismatic sa Sto. Domingo Parish Church. So, hindi po malayo sa loob ko yung Panginoon.
“Kumbaga, alam ko na dun din yung path ko. Hindi po ako nagulat sa sarili ko na in a few years siguro, gaganap ako ng pari. Hindi ko lang ini-expect na ang bilis.
“Nung dumating siya, ginrab ko na na agad, dahil alam ko na para sa akin siya. At ito yung tamang panahon para gawin ko.”
Read: McCoy de Leon "pambawi" ang pagganap na pari sa kasamaan ni David
NOEL FERRER
Pinag-aralan daw ni Zaijian Jaranilla nang mabuti ang role na niya bilang Fr. Rhoel Gallardo, at ang laki raw ng realization sa kanya habang ginagawa niya ang pelikula.
Nung ginagawa raw niya itong documentary film ay naramdaman niya kung gaano kahirap ang pinagdaanan ni Father Rhoel Gallardo.
Ani Zaijian: “Mahirap siya siyempre, kasi totoong buhay yung gagawin namin.
“Kailangan maging sensitive, kailangan pag-aralan bawat eksena, kahit po ang mga simple ay kailangan pa ring i-consult kay Direk. Kasi, nangyari siya sa totoong buhay.
“Nung ginagawa ko na po siya, characterization, inaral ko lang yung… may binigay sa akin si Father Ama na books.
“So, binasa ko, inaral ko kung paano siya. So, nakipag-usap din po ako dun sa mga survivors kung paano siya during captivity.
“Tinanong ko kung paano siya naging matapang, at feeling ko po, malaking tulong din yung naniwala lang ako sa vision ni Fr. Ama at ni Direk Rommel. Hindi ako naghanap ng masyadong maraming tanong.
“Basta nag-dive lang ako dun sa character at niyakap ko lang mismo si Fr. Rhoel. Kaya po… feeling ko naramdaman ko din dun sa nung pinapahirapan si Father.
“Parang sa isip-isip ko, grabe siguro yung experience niya, yung pakiramdam niya nung nangyayari yun.”
Naramdaman daw niyang ginagabayan din sila ng namayapang pari.
Sabi pa ni Zaijian: “And during din dun sa ordination niya, gusto ko lang din po, one fun fact lang.
“Kasi yung ginamit namin na istola [vestment] dun sa eksena na napanood ninyo, istola po talaga ni Father yun.
“So, nung ginagawa namin yun, nakaramdam ako ng pangingilabot dun sa eksena. Naging emotional ako, na hindi naman hinihingi.
“So, dun ko naramdaman ang mga ganung instances po na, 'Ahh nandito si Father sa amin.
“Habang buong proseso namin, ginagawa yung shoot, alam ko nandun siya, ginagabayan niya kami.
“Kaya maraming-maraming salamat sa Gallardo family po, dahil pinagkatiwalaan ninyo na isabuhay si Father Rhoel.
“At sa buong Claret po, maraming-maraming salamat po.”
Ang binabanggit ni Zaijian na si Father Ama ay si Father Amador Tumbaga, CMF, ang na-elect bilang provincial superior ng Fr. Rhoel Gallardo Province nung nakaraang taon.
Siya ang vice-postulator for the Cause of Martyrdom of Fr. Rhoel Gallardo, CMF.
Isinumite nila for beatification si Fr. Rhoel Gallardo noong taong 2021.
Read: Vice Ganda reveals almost quitting It’s Showtime: “Parang na-overwhelm ako.”
JERRY OLEA
Ang direktor ng Seeds of Peace na si Rommel Galapia Ruiz ay siya ring assistant director ni Cesar Soriano sa pelikulang In Thy Name, na pinagbidahan ni McCoy de Leon bilang Fr. Rhoel Gallardo.
Iba raw itong Seeds of Peace sa In Thy Name.
“Magkaiba ng genre. Magkaiba naman sila ng purpose. Ang In Thy Name is for malaman natin kung anong nangyari.
“For Seeds of Peace is that, bakit nangyari. Anong purpose bakit nangyari,” sabi ni Direk Rommel.
Wala raw silang balak magkaroon ito ng commercial showing.
“Ang Seeds of Peace po is only available for block screening, or special screenings,” pakli ni Direk Rommel.
Nagkaroon na raw ito ng screening sa isang Filipino community sa London.
Aniya, “Kahapon po ay katatapos lang ang international exhibition namin sa London. Sa Crawford po sa London. Kasi ang brother ni Father Rhoel is in London.
“They gathered Filipino communities to watch Seeds of Peace.”
Sa mga interesadong magpa-special screening ng Seeds of Peace: The Life of Father Rhoel Gallardo, CMF, puwede raw kumontak lang sa Claretian Missionaries o sa Gallardo family na nagmamay-ari ng pelikula.
Read: Bida sa Arena: Ultimate Celebrity Showdown highlights and sidelights