Trigger Warning: Mention of suicide
JERRY OLEA
Alay nina Jerom at Elijah Canlas sa bunsong kapatid nilang si JM Canlas ang one-act play na Footprint na kalahok sa Virgin Lab Fest (VLF) XXI: Hubo’t Hubad.
Nag-suicide si JM sa edad na 17 noong Agosto 3, 2023.
Ang buod ng Footprint: “A grieving family turns back time with a virtual archive of memories. While they scramble to make sense of a tragedy, their unspoken feelings inflict a much harsher truth.”
Itatanghal ang VLF 2026 ng apat na linggo, Hunyo 3-28, sa Tanghalang Ignacio Gimenez (CCP Black Box Theater) sa CCP Complex, Pasay City.
Debut ito ni Jerom bilang playwright sa VLF, samantalang debut ni Elijah bilang aktor sa nasabing theater festival.
Naunang mag-VLF bilang aktor sina Jerom at JM.
Maliban kay Elijah, nasa cast ng Footprint sina Meryll Soriano, Jojo Cayabyab, Omar Uddin, at Pappel, sa direksiyon ni Mikko Angeles.
HITTING TWO BIRDS WITH ONE STONE
“Sinulat ko itong Footprint para kay JM, e,” pagtatapat ng 27-anyos na si Jerom sa mediacon noong Mayo 19, Martes sa Tanghalang Ignacio Gimenez.
“Double ano naman, hitting two birds with one stone para sa akin. To be back at the VLF, and also at least to… debut ko as a playwright.
“Exciting din kasi iba iyung feeling ng ikaw yung nagsulat. Kasi, I’ve been watching sa VLF since I was 11.
“So, alam na alam ko po yung festival, tapos when I first acted, it was a milestone for me as an actor. Pero ngayon, another milestone na as an artist, debut as a playwright.”
Bakit kinuha nila si Elijah para sa cast ng Footprint?
“Sa aming magkakapatid, siya lang ang hindi pa nakapag-VLF. Ako, nakapag-VLF na. Si JM, nag-VLF na,” lahad ni Jerom.
“Ako po ang nauna, tapos si JM sumunod. Tapos si Jelo [palayaw ni Elijah], never pa. So sabi ko, sakto, itong isinulat ko, para sa kanya rin.”
THE PAIN OF LOSING JM CANLAS
Magtatatlong taon na mula nang pumanaw si JM. Meron pa ring pain kapag naaalala nila ito?
“Never naman pong nawawala. Ahh I think, recurring talaga. Forever na siguro yong sakit,” pagbuntong-hininga ni Jerom.
Parang way of healing itong dulang Footprint?
Tumango si Jerom, “Opo, sobra. Nakatulong talaga sa… kahit ano namang sining, para sa akin, parang nakakatulong talaga na maghilom. Lalo na for this.
“Kasi, for this traumatic… kasi for me, for our family. Pero in a way, parang processing din my grief, the trauma. Healing din in my own terms through art.”
Read: Virgin Lab Fest 2026: schedules, plays, key details to know
NOEL FERRER
Isinulat ni Jerom Canlas ang dulang Footprint two years ago habang nagra-run ang Bar Boys The Musical, na ang direktor ay si Mikko Angeles.
“For VLF talaga… actually, kinalimutan ko po muna noong sinubmit ko. Kasi sabi ko, ayoko munang mag-expect,” saad ni Jerom.
“Parang submit lang ako, yun. Tapos parang stream of consciousness ko lang siya sinulat.
“Medyo fresh pa during that time, e. A year after JM’s death. Parang stream of consciousness kung ano yung sa tingin kong parang kuwento na puwede kong maikuwento.
“Tapos luckily, natanggap. At yun, exciting.”
MENTAL HEALTH AWARENESS
Bahagi ng kuwento ng Footprint ang mental health?
“Opo, tungkol siya sa mental health pero mas tungkol po siya sa grief of losing someone,” pagmamatwid ni Jerom.
“So mas ganun, universal ano of grief. Pero specifically siyempre about mental health, about suicide.”
Hanggang ngayon ay isyu pa rin ang depression at mental health. Nangyayari pa rin.
“Opo, parang feeling ko, kahit naman noon, hindi lang napag-uusapan… ngayon, ang goal naman, kaya itinayo rin namin iyong KULIT: The JM Canlas Organization,” sabi ni Jerom.
“Ngayon, itong play na ito. Mga efforts para ma-destigmatize yung mental health, lalo na kapagka usapan na ng suicide.
“Kasi, buhay na yon, no. Parang I hope, with this play, makita nila na parang grabe yung loss kapagka nawalan through suicide.”
Kumusta na ang parents nila? Alam nila ang tungkol sa Footprint?
“Aware sila. Pero matagal bago ko nasabi. Kasi, kinakabahan din ako,” tugon ni Jerom.
“Dahil malapit siya sa kuwento namin. Siyempre, hindi kami. Pero parang super-lapit. Inspired.
“So parang ako mismo, kinakabahan ako kung ano yung… hindi dahil sa parang hindi nila magugustuhan or whatever, pero dahil lang baka maapektuhan sila masyado.
“Pero ano naman, excited din sila na mapanood. I think we’re all in a good place after everything.
“Pero mahirap pa rin po. Parang every day pa rin talagang struggle talaga, na ma-miss yung kapatid ko.”
And mind you, magaling at mabait ang direktor nilang si Mikko Angeles na dati pa talaga dapat nag-VLF.
And now that he’s given that chance, this is surely something to look forward to.
Read: John Lapus finally breaks into Virgin Lab Fest main lineup
GORGY RULA
Bakit napili nilang i-cast sa Footprint si Meryll Soriano?
“Si Mama Meme kasi, kakilala na namin since before. In fact, nagkasama na sila dati — si Jelo, si JM, saka si Ate Meme — nagkasama sa Unconditional (2020 TV series),” pahayag ni Jerom.
“So close talaga siya sa family. So nagba-badminton kami together, ganyan…
“Nag-reading din, nag-chemistry test, pero nasa utak ko na after ano, noong nag-iisip kami, sino kaya ang puwede?
“E, sakto, si Ate Meme, gusto niya talagang mag-VLF ever since. Kasi, never pa siyang nag-VLF, sila ni Jelo, first time po.
“Perfect opportunity rin na dito pa, sa special na play. Kasi, parang anak-anakan na rin niya si JM.”
Nagkataon pa na ang panganay ni Meryll ay Elijah ang pangalan. Ang ama nito ay si Bernard Palanca.
Ang supling nina Meryll at Joem Bascon ay si Gideon, na ang palayaw ay Gido.
Tinatawag ni Meryll si Gido na Kulit (na tawag nina Jerom at Jelo kay JM).
“Kasi, sobrang kulit daw ng anak niya ngayon, si Gido, oo!”
Kumusta si Meryll sa rehearsal?
“Si Ate Meme, wala naman akong masabi as an actor. Talagang grabe yung truth, yung vulnerability every time,” sagot ni Jerom.
“In fact, kinakabahan siya nung critiquing namin. Kasi, hindi pa niya kabisado yung linya.
“So sabi namin, ‘OK lang yan, call line.’ Kapagka hindi mo pa alam ang line, sabihin mo lang, ‘Line.’
“In fairness sa kanya, hindi siya nag-call ng line. Talagang dire-diretso, wala siyang na-miss. So, very professional.
“Yung vulnerability, yung rapport nila ni Jelo, siyempre matagal na silang magkasama. Para talaga silang mag-ina.”
Nagkasama sina Meryll at Elijah sa twinbill na Emulsyon (Indigo Child at Loyalist Redux) noong Nobyembre 2024 sa Erehwon Center for the Arts, Quezon City.