GORGY RULA
Naungkat ang isyung hiwalayan nina Jennica Garcia at Alwin Uytingco sa nakaraang media conference ng pelikulang Behind The Smile.
Madrama ang title ng naturang pelikula na isinulat at dinirek ni Lawrence Roxas, at tumatalakay sa adbokasiyang HIV awareness.
Pero pasabog ang tanong ni Jun Lalin sa buong cast kung ano ang totoo behind their smile. Masaya ba sila behind the smile?
BEHIND JENNICA GARCIA'S SMILE
Malalim ang hugot ni Jennica diyan dahil talagang mabigat daw ang pinagdaanan niya noong naghiwalay sila ni Alwyn.
Nataon daw na bumabalik siya noon sa pag-arte. Halos isang taon din daw nilang sinikap maayos ang kanilang pagsasama alang-alang sa dalawa nilang anak.
“Behind the smile, I was really broken inside,” pagtatapat ni Jennica.
“It’s just that, overtime, natutunan ko na rin na hindi mainam kung madaling mabasa sa mukha kung ano yung tunay na kalagayan ng puso.
“Kasi siyempre mas pag-uusapan… and when you are going through something.
“Kasi, hindi naman naging private yung relationship namin ni Alwyn. So siyempre, yung married life and then yung pagkahiwalay din naming dalawa, siyempre naging public din siya dahil bumalik din ako sa pag-aartista.
“So definitely, during I think mga 2020 to 2021, yun siguro… parang hindi ko naman masabi na nagpapakaplastik ako.
“It’s just that, if I do show what I truly feel inside, feeling ko hindi po ako makakapagtrabaho.
“Baka hindi ko po magawa nang maayos yung trabaho ko.”
Nung panahong yun ay nagtatrabaho siya, sinisikap niyang iwan ang nararamdaman sa kanyang bahay. Ayaw niyang dalhin ito sa trabaho.
Ani Jennica: “Meron silang term na ‘fake it till you make it,’ di ba? Feeling ko naman po, hindi ganun yung ginawa ko.
“At ang ginawa ko lang, pag lumabas na ako ng bahay, iniiwan ko na yung tunay kong nararamdaman sa pinto. Para pagdating ko ng trabaho, kasado na po.”
Read: Heart Evangelista admits to feeling like a “sugar mommy” in past relationship
NOEL FERRER
Ibinahagi ni Jennica Garcia ang mga pinagdananan niya sa hiwalayan nila ni Alwyn Uytingco.
Nung panahong yun ay ginagawa pa raw niya ang drama series sa GMA-7 kasama sina Yasmien Kurdi at Jason Abalos, ang Las Hermanas (2021-2022).
Talagang nadadala raw ni Jennica ang tunay niyang nararamdaman sa mga mabibigat na eksena.
Lahad ng aktres: “Nung time na yun, yun po kasi yung fresh pa, e. Height pa ng falling out of my marriage.
“Nung time kasi na yun, nahihimatay ako sa set, e. So, iniiwasan ko po talaga gamitin yung emotions.
"Kaya lang minsan nati-trigger kasi. Siguro kasi meron ka talagang dinaramdam.
“So, kahit hindi yun yung emotion na gusto mong i-tap, pero dahil kailangan mong… kunyari kailangan mong sabihin kay Jason, ‘Mahal kita, hindi tayo puwedeng maghiwalay, dito ka lang,’ ganyan-ganyan.
“So minsan, hindi mo na siya intensiyon, bigla siyang lalabas. Hindi siya nakakatulong, e.
“Kasi siyempre, lumalabas na yung tunay mong emotions. But the thing is, it’s not needed for that scene.
“You’re not Jennica in that scene. You’re not supposed to see Jennica in that scene.”
JENNICA TRIED UNDERGOING THERAPY
Kaya nung panahong yun ay sinubukan pa raw niyang magpa-therapy.
Saad ni Jennica: “So, honestly, hindi talaga siya nakakatulong. Kaya nung time na yun, kailangan ko din po talagang mag-invest on therapy.
“Kasi before, medyo tinitipid ko yung sarili ko sa therapy. Mahal kasi!
“Siyempre, kababalik mo pa lang sa industry, di ba? So, hindi ka pa naman talaga nakapag-ipon ng ganun kalaking halagang pera.
“Kahit na sabihin pong pa-tatlong libo, pa-tatlong libo, malakng bagay yun. Paano kung kailangan mong therapy three times a week? So, nine thousand!
“Eventually, kailangan mo talagang gastusan, ganyan. Pero siyempre, kailangan mong maghilom, e.”
Read: Tessa Prieto opens up about ex-husband's "infidelity"
JERRY OLEA
Masaya si Jennica Garcia dahil okay raw sila ngayon ni Alwyn Uytingco sa co-parenting sa kanilang mga anak.
Kaya nang napag-usapan ang hiwalayan, maingat si Jennica sa pagbibitaw ng pahayag na hindi makakasira sa dating asawa.
“Very careful po ako magsalita, kasi I really don’t want people to look at Alwyn in a negative light,” saad ni Jennica.
“Yes, something happened that ended our marriage.
“But honestly, feeling ko po meron din akong nagawa for him to come up with something that ended up hurting me deeply.
“So, ayoko nang igisa na parang nag-end yung relationship dahil sa kanya, ganyan-ganyan.
“So, parang hindi naman. But definitely, because we have two children, the goal talaga is to really save the marriage.
“Kasi, when people found that we were no longer together since I went back to showbiz, isang taon na naming sinusubukan, e.
“Hindi naman siya something happened tapos ayawan na. Hindi po siya ganun, e.
“Parang something happened, we tried saving it for a year. But then, hindi na talaga siya maisalba.
“And I really thank him because he really tried. I tried as well. It’s just that, it wasn’t for us.
“I’m very happy that we’re co-parenting now, and he borrows our children, ganyan po.
“Nilalabas naman niya, nagkikita sila. Okay naman po.”
JENNICA GARCIA IS STILL SINGLE
Ngayon ay single pa rin daw siya. Nahihiya na raw siya minsan sa kasasagot sa mga nagtatanong tungkol sa kanyang lovelife.
“Kasi siyempre may mga nagtatanong kung 'may lovelife ka na ba?' Tapos hindi naman palaging gusto lang makitsismis.
“In fairness naman, may mga tanong sa akin na gusto lang talaga rin akong magka-lovelife,” nakangiti niyang pahayag.
Dagdag ni Jennica: “Tapos alam mo, siyempre hindi ko sinasabi before, pero meron akong season na gusto ko na magka-partner. Pero feeling ko, sa sobrang tagal ko nang single, nawala na yung ganung pakiramdam.
“Kasi dati, siyempre dati hindi ko inaamin sa… I mean hindi naman ako nagsinungaling sa interview.
“Pero pag sinasabi ko, 'Wala po, wala po talaga,' wala naman talaga. Pero deep inside, medyo curious ako and interested ako na makakilala.
"Pero ngayon po kasi, hindi na talaga."
Read: Jennica Garcia closes door on possible reconciliation with estranged husband Alwyn Uytingco