GORGY RULA:
Isa si Ara Mina sa celebrities na dumalo sa grand opening ng Startista Gallery sa Star City noong nakaraang Biyernes, June 19, 2026.
Mabuti at happy naman si Ara sa statute na ginawa sa kanya ng Startista Gallery na binabatikos ngayon ng karamihan.
Nakatsikahan namin si Ara pagkatapos ng ribbon-cutting, at napag-usapan namin ang pinaplanong kasal ng kapatid niyang si Cristine Reyes at ni Gio Tingson ng National Youth Commission.
Wala pang maibigay na final na plano ng magkasintahan.
Sabi ni Ara, excited na raw siya at suportado niya itong plano ng kanyang kapatid.
“Well, nag-initial talk na kami,” pakli ni Ara.
“Parang Iniisip niya kung dito ba gagawin o destination wedding. So, wala pang napa-finalize. Nag-aano pa lang, nag-browsing-browsing.
“May mga sine-send siya sa akin na mga kung anu-ano, mga ideas. Tapos, nagtatanung-tanong siya sa akin.
“Wala pa talagang napa-finalize. Ang gusto lang nila, parang yun nga, iniisip nila kung mag-destination wedding, parang ganun na.”
Read: Maui Taylor on Project MILF: "Reunion ng mga napatangkad natin."
ARA MINA EXCITED FOR CRISTINE'S WEDDING
Ang unang kasal daw ni Cristine noon kay Ali Kathibi ay napaka-intimate na. Inaasahan niyang makukumpleto ang buong pamilya.
“Walang particular na ganito. Kasi yung una niya, intimate na, e. Pero okay naman yung intimate sa mga panahon ngayon, di ba?” saad ni Ara.
“It depends sa kanila. So, kung ano yung gusto ng sister ko, suportahan ko siya.”
Nakikita ni Ara na malaki raw ang nabago kay Cristine ngayong papasok na naman siya sa panibagong bahagi ng buhay niya bilang may asawa.
“Malaki na, e. Saka siguro very careful na siya. Yung ano naman kasi, nung una, hindi talaga prepared, e.
“Even yung wedding niya, parang biglaan lang din. Kasi, may anak na sila nun, e, nung kinasal sila.
“Saka hindi kami kumpleto nun. Wala yung Mommy ko, Daddy ko. Dalawa lang kaming andun na present.
“Parang hindi mo mape-feel yung ano… siyempre hindi kumpleto yung family namin,” sambit ni Ara.
Read: Cristine Reyes reveals 2027 wedding plans with Gio Tiongson
NOEL FERRER:
Sunud-sunod ang trabaho ni Ara Mina. Regular siya sa My Husband Is A Mafia Boss, at nasa Love Is Never Gone din siya nina Joshua Garcia at Ivana Alawi.
Kaya hindi pa raw nila naiisip ng asawa niyang si Dave Almarinez na magka-baby pa sila.
Puwede pa raw siyang mabuntis, pero hindi pa raw nila ito pinaplanong mag-asawa. Masaya na raw siya sa anak niyang si Mandy at siya na rin ang tumatayong Mommy sa anak ni Dave na si Kirsten.
Natutuwa rin daw silang mag-alaga sa mga aso nila.
Ani Ara, “Sa busy naming mag-asawa, parang happy na kami sa aso. Happy na kami sa mga puppies. Kasi parang ano, e, iniisip din namin kung papano yung work namin.
"It depends, kung ibibigay din naman, di ba? At saka iniisip ko rin, ano na ako, 47 na ako. Parang baka mahirapan na ako. Though kaya ko pa naman. Puwede pa raw.”
ARA MINA ON BABY PLANS
Ayaw raw nilang magpa-pressure na dapat na mabuntis siya uli. Nasa Panginoon na raw kung bibiyaan pa sila ni Dave.
“Gusto ko talaga nung una, magka-boy pa, magka-son,” sambit ni Ara.
“Sabi ko, parang hindi pa inaano sa amin… E, hindi rin kami, yung alam mo, in vitro. Hindi kami nagta-try. Hindi lang namin napa-prioritize.
“Kasi parang siguro, kuntento na kami na andiyan si Kirsten, andiyan si Mandy, tapos yung work namin, ganun.
“Marami namang ways, e. Puwede kang magpa-surrogate, magpa-freeze ako ng egg, di ba? Puwede din namang ganun.
“Meron lang siguro kaming mga priorities na nauuna — na may mga obligations pa kami.
“Hindi namin pinipilit,” pakli ni Ara.
Read: Eman Bacosa knocked down by Rodelyn Perez in title fight
JERRY OLEA:
Maliban kay Ara Mina, present sa opening ng Startista Gallery sina Maui Taylor, Bayani Agbayani, Gladys Reyes, Michael Flores, at Lisa Macuja-Elizalde.
Wala pa sa gallery ang statue ni Bayani. More or less ay three weeks pa raw bago matapos iyon.
Happy sina Ara, Maui, Gladys, Michael, at Miss Lisa sa kinalabasan ng kanilang estatwa.
Bale 23 statues ang nasa first batch. Andoon din ang statues nina Isko Moreno, Lucy Torres, Richard Gomez, Imee Marcos, Hidilyn Diaz, Django Bustamante, Efren “Bata” Reyes, Rhian Ramos, Angel Aquino, Rica Peralejo, Ruffa Gutierrez, Pops Fernandez, Ashtine Olviga, Wilbert Ross, Bea Binene, Diana Zubiri, Paolo Contis, at Michael V.
Hindi agad namin namukhaan si Diana sa kanyang statue. Iyong katabi ni Goma, akala ko ay si Dawn Zulueta. Ang wife pala ni Cong. Goma na si Ma’am Lucy. Hirit tuloy ng iba, hindi iyon mala-Madame Tussauds kundi Madam Tisod.
Sa mga nagtatanong kung bakit si ganito at si ganire ang nasa first batch ng Startista Gallery, bakit hindi si ganyan o si ganoon — hinihingan ng Star City ng permiso ang mga celebrity na concerned, o ang kanilang kaanak as the case may be, bago gawan ng statue.
Para sa second batch ng celebrities sa Startista Gallery, at least 25 more statues ang itatampok.
Naka-line up na sina Dolphy at Gabby Concepcion, at hopefully si Nora Aunor. Siyempre, inaasam nating magkaroon ng statues sa Startista Gallery sina Coco Martin, Piolo Pascual, Vice Ganda, Manny Pacquiao, Carlos Yulo, at Lea Salonga.
Kasama rin sina Vilma Santos, Sharon Cuneta, Fernando Poe Jr., Christopher de Leon, Cesar Montano, Gloria Romero, Dingdong Dantes, Kathryn Bernardo, at Alden Richards.
Gagawan din sina Kris Aquino, Angel Locsin, Marian Rivera, Anne Curtis, John Lloyd Cruz, Bea Alonzo, Robin Padilla, Heart Evangelista, Raffy Tulfo, Maricel Soriano, Ai Ai de las Alas, Ivana Alawi, Kim Chiu, at marami pang iba.