JERRY OLEA
“Pinaluhod ni Rebecca Rios si Sister Stella L!”
Hanash iyan noong Hulyo 11, 1984 nang sabay ipalabas sa mga sinehan ang pelikulang Sister Stella L na title role si Vilma Santos, at ang Bukas Luluhod Ang Mga Tala kung saan gumanap si Sharon Cuneta bilang Rebecca Rios.
Sa talkback session matapos ang Philippine premiere ng restored version ng Sister Stella L nitong Setyembre 20, 2026, Linggo, sa makasaysayang Metropolitan Theater ng Maynila, nagbalik-tanaw si Ate Vi sa pagsemplang sa takilya ng Sister Stella L na prinodyus ng Regal Films.
Nagkaiyakan sila noon ng producer na si Mother Lily Monteverde.
Paggunita ng Star for All Seasons: “Ang Sister Stella L, hindi kumita, e! Kasi natakot… hindi kumita ang Sister Stella L, unang-una, natakot yung mga tao sa bomba.
“Kasi ikinalat sa mga sinehan, may bomba raw. So, hindi kumita yung pelikula, sa totoo lang.
“So, si Mother Lily was really sad. So, yung first day na hindi masyadong tinao yung pelikula namin dahil may bomba daw, pumunta ako kay Mother Lily.
“Nag-iyakan kaming dalawa.
“Sabi namin, ‘Sorry, Mother! Pero itong pelikula natin…’ Sabi ni Mother, ‘Kasi takot tao, may bomba daw.’
“But you know, kung buhay lang si Mother… Roselle, nandidiyan si Roselle… palagay ko, wala na dapat ikatakot at this point in time.
“Dahil legacy na po ang pelikula nating Sister Stella L!”
Ang Roselle na tinutukoy ni Ate Vi ay ang daughter ni Mother Lily na si Roselle Monteverde, na kabilang sa mga pinagkalooban ng commemorative poster ng Sister Stella L.
Read: Vilma Santos reacts to 2026 National Artist list omission
NOEL FERRER
Humakot ng sampung tropeyo ang Sister Stella L sa GAWAD URIAN noong 1985.
Pinarangalan ito sa mga kategoryang best picture, best director (Mike de Leon), best screenplay (Jose F. Lacaba, Jose Almojuela, Mike de Leon), best actor (Jay Ilagan), best actress (Vilma Santos), best supporting actor (Tony Santos), best supporting actress (Laurice Guillen), best music (Ding Achacoso), best editing (Jess Navarro), at best sound (Ramon Reyes).
FAP AWARDS 1985
Sa LUNA Awards ng Film Academy of the Philippines, kinilala itong best film at best director.
Pero ang best actor ay si Rudy Fernandez (Batuigas II: Pasukuin si Waway).
Best actress si Sharon Cuneta (Sa Hirap at Ginhawa).
Best supporting actor si George Estregan (Bulaklak ng Apoy).
Best supporting actress si Gina Alajar (Kaya Kong Abutin Ang Langit).
Wagi ng best screenplay si Jose Carreon (Batuigas II: Pasukuin si Waway).
Para sa Alyas Baby Tsina na pinagbidahan din ni Vilma, nagkami ng best screenplay si Fiel Zabat, at best musical score si Willy Cruz.
Ang best sound ay natamo ni Rolly Ruta para sa Bukas, Luluhod Ang Mga Tala.
STAR AWARDS 1985
Sa unang STAR AWARDS for Movies ng Philippine Movie Press Club (PMPC), pinarangalan ang Sister Stella L bilang best picture, best director, best supporting actress (Laurice Guillen), best supporting actor (Tony Santos), at best theme song (“Sangandaan”).
Best actor si Rudy Fernandez (Batuigas II: Pasukuin si Waway), at best actress si Nora Aunor (‘Merika).
FAMAS 1985
Sa FAMAS, nominado ang Sister Stella L na best picture at best director, ganundin sina Vilma at Laurice sa acting categories.
Best picture ang Ang Padrino, at waging best director ang bida rito na si Fernando Poe Jr.
Best actor si Rudy Fernandez (Batuigas II: Pasukuin si Waway), at best actress si Nora Aunor (Bulaklak sa City Jail).
Tabla bilang supporting actor sina Celso Ad. Castillo (Sampung Ahas ni Eva) at Tony Santos (Sister Stella L).
Best supporting actress si Perla Bautista (Bulaklak sa City Jail).
Wagi ng best editing si Jess Navarro (Sister Stella L).
Para sa Bukas Luluhod Ang Mga Tala, panalo sina Rolly Ruta (best sound) at Willy Cruz (best musical score).
VILMA AND NORA: BEST ACTRESS WINS
Three consecutive years na best actress si Vilma sa URIAN — Relasyon (1982), Broken Marriage (1983), at Sister Stella L (1984).
Three consecutive years na best actress si Nora sa Luna — Bilangin Mo Ang Bituin sa Langit (1989), Andrea, Paano Ba Ang Maging Isang Ina? (1990), at Ang Totoong Buhay ni Pacita M (1991).
Read: A nod to Mike de Leon films in Summit Books' cinema opus
GORGY RULA
Ano ang reaksiyon nina Laurice Guillen at Vilma Santos matapos mapanood ang restored version ng Sister Stella L?
“Unang-una, napakaganda ng pagka-restore,” lahad ni Direk Laurice na gumanap bilang Sister Stella Bautista sa pelikula.
“Para sa aking alaala, parang mas maganda pa ngayon kaysa noon. Tingin ko, mas binantayan talaga, mas tinutukan ni Mike [de Leon]. Although tinututukan naman talaga niya lahat ng trabaho niya.
“But this one, I think he realized that this is a very special film… naiyak ako sa huli!
“At that time, nagandahan naman ako sa pelikula. Pero at the time, walang ginagawang ganyan. Hindi gumagawa ng ganyang pelikula.
“So nakakagulat siya, at the same time nakakakaba. You have to realize, that this was 1984. Martial law pa.
“It was only two years later that we had a four-day revolution in 1986. So, napakatapang.
“Pero now that I see it as a film, napakagandang pelikula at na-realize ko na this is a very important work of Mike de Leon.
“That even now, the message of the film is still true.”
Setyembre 21, 1972 ang sinasabing araw na idineklara ang martial law o batas militar sa Pilipinas.
Ni-lift ito formally noong Enero 17, 1981 sa bisa ng Proclamation No. 2045 — isang buwan bago ang makasaysayang pastoral visit ni Pope John Paul II sa Pilipinas noong Pebrero 17-22, 1981.
Pebrero 18, 1981 ginanap sa Manila ang beatification ni Lorenzo Ruiz at 15 companion martyrs.
Bagama’t lifted na ang Martial Law noong Enero 17, 1981 ay sinasabing patuloy itong umiral sa bansa.
SISTER STELLA L 42 YEARS AFTER
Sumang-ayon si Vilma sa sinabi ni Direk Laurice: “Palagay ko, after 42 years po na ipapalabas uli iyung pelikula mo, at isang pelikulang ipinagmamalaki mo…
“At nagpapasalamat ho ako, nabigyan ng pagkakataon na ma-restore ang isang very relevant, meaningful film na gawa po ni Direk Mike de Leon.
“Palagay ko, ano na ho ito, e, ahhmm karangalan na sa tagal na rin ng career ko.
“Sixty-three [63] years in the industry, and after 42 years, eto pa rin po, ipinapalabas pa rin po yung pelikula ko lalo na po idinirek ng isang henyo na Mike de Leon.”
Ipinaabot ni Vilma kay Roselle Monteverde ang pasasalamat niya sa ina nitong si Mother Lily na nagprodyus ng pelikula.
“It was Mother Lily, iyung producer who really took the risk. Alam niya, yung tema ay hindi madali, lalung-lalo na, 1984,” pagmamatwid ni Ate Vi.
“Shaky na yung ating gobyerno by that time. Pero naglakas-loob pa rin si Mother Lily na talagang isugal ang ganitong klase ng pelikula.
“At pag binanggit yun, kasama na po kaming lahat na nag-perform at kasamang gumawa ng pelikula.
“So, I’m very, very, very proud of this movie. It will definitely be part of my life as an actor.”
Co-actors nina Vilma at Laurice sa Sister Stella L sina Jay Ilagan, Gina Alajar, Tony Santos, Anita Linda, at Liza Lorena.
Nasa cast din sina Ruben Rustia, J. Eddie Infante, Adul de Leon, Rody Vera, Malu de Guzman, Crispin Medina, Jojo Sanchez, Raquel Villavicencio, at Fred Capulong.
Gumanap na goons sina Joe Jardi, Waldo Reyes, Jimmy Reyes, at George Wendth. Pumapel na photographer si Fernando Modesto.