Direk Carlo J. Caparas, pumayag maging assistant director ng anak

GORGY RULA: Sumunod na rin pala sa yapak ni Direk Carlo J. Caparas ang anak nila ni Donna Villa na si Peach Caparas.

Nagdidirek na ito ngayon ng isang pelikula sa Viva Films.

IMAGE peach caparas & carlo j. caparas ILLUSTRATION Instagram / Noel Orsal

Nakausap namin si Direk Carlo J. sa programa naming Showbiz Talk Ganern sa DZRH kagabi, June 17.

Natutuwa siyang ikinuwentong assistant director daw siya ngayon ng anak na si Ysabelle Peach sa pelikulang Chiong Sisters, Rape Murder ng Viva Films.

Saad ni Direk Carlo J., “For the first time, ako yung assistant nung anak ko.

“Pinababayaan ko siya dahil gusto kong makita yung potential niya talaga dahil mahilig.

"Una nag-artista siya, ngayong gusto raw niya magdirek.

“Co-director ko siya sa Angela Markado at Kamandag ng Droga.

"Kinuha naman siya ng Viva ngayon as full-fledged director sa Chiong Sisters Rape Murder, ang kuwento ng magkapatid na Marijoy at Jacquiline Chiong, yung celebrated case sa Cebu na malalaking tao ang involved, e.”

Hindi na raw siya nagtataka kung bakit gusto ring gumawa ng massacre movies ng anak niya.

“Lumaki siya sa shooting, e, sa pagiging filmmaker namin ni Donna. Kaya sabi nga niya, 'It runs in the family.'

“Si CJ [Caparas, panganay nila ni Donna], naging aktor. Gusto naman niyang maging producer katulad ng mommy niya.

“Si Peach ang nagkaroon ng innate talent sa directing. Mahusay si Peach.

“Hindi naman self-serving, ano? Pero nakikita ko mahusay.

"Maganda siya maggawa ng mga lines, mag-execute ng mga eksena,” pakli ng kilalang nobelista at direktor.

May isinusulat naman daw siya ngayong isang romance story na gagawin din ng Viva at ididirek ni Ysabelle Peach. To Have and To Hold daw ang title nito.

Ayon kay Direk Carlo J., “Kami pa rin ni Peach ang gumagawa kasi marami siyang naiisip na subplots, e.”

Kailangan daw magtrabaho pa ni Direk Carlo J. dahil bahagi ito ng pag-move on sa pagpanaw ng asawa niyang si Donna.

Ginagawa naman daw niya ngayon ang pelikulang The Encounter: Mamasapano Massacre, na hango sa kuwento ng lone survivor na SAF member sa naturang malagim na engkuwentro sa Mamasapano.

“Nag-move on ako sa work ko, pero hindi pa rin ako nakapag-move sa nangyari sa amin ni Donna.

"Kaya dito na lang ako sa trabaho mag-move on.

“I hope matutuwa si Donna siguro dahil alam kong gusto niyang matulungan ang mga anak niya hanggang ngayon."

Nasa Cebu pa si Direk Carlo J. Caparas nang nakausap namin kagabi.

Kasama raw niya ang mga anak niyang nag-celebrate ng Father’s Day sa puntod ng kanyang asawa.

JERRY OLEA: Luv luv luv natin ang Mega Couple, kaya labis ang lungkot natin sa pagpanaw ni Tita Donna Villa noong Enero 2017.

Na-miss natin si Direk Carlo J. Caparas, na absent sa premiere ng pelikula niyang Kamandag ng Droga last December.

Masaya tayo sa pagbabalik-showbiz ni Direk Carlo, lalo pa’t ang daughter niyang si Peach ay sumusunod sa kanyang mga yapak.

Si Tita Donna ay nag-artista rin noon.

Susundan kaya ng panganay nilang si CJ ang pagiging ma-PR ni Tita Donna, o mas pipiliin nito ang acting?

NOEL FERRER: Tingnan natin kung namana ba ng anak ang husay ng ama sa storytelling at ang PR ng nanay, lalo na sa press.

Malalaman lang natin iyan kapag ipapalabas na ang pelikula.

Sana’y malinawan tayo sa totoong nangyari sa SAF at hindi magdala ng higit pang kontrobersiya at sigalot sa hati-hati na nating bansa.

Good luck!