JERRY OLEA: Sold out na ang birthday concert at 25th showbiz anniversary celebration ni Marissa Sanchez na gaganapin sa Nobyembre 30, Biyernes, 8 p.m., sa Historia Boutique & Bar.
Ubos na ang tickets na P500 ang halaga.
“Ayoko naman pong maging chopsuey tayo sa loob, na magkakapalit-palit na tayo ng mukha sa loob ng Historia,” post ni Marissa sa Facebook nitong Nobyembre 28, Miyerkules ng umaga.
300 lang ang capacity ng place. First come, 1st served basis!
Humingi ng paumanhin si Marissa sa mga nagme-message sa kanya na puro “seen” lang ang nasisilayan at hindi niya nasasagot.
Paliwanag niya, “Mukha lang po akong masungit pero ang totoo, TULALA lang ako! Sobrang toxic lang po talaga ng sitwasyon ko ngayon.
“Ganun po talaga ako, halos hindi po ako makausap before the show. Kasi, hindi po madali maging singer, komedyante, na nagmememorya pa, at maging INA.
“At lalong hindi po madali na may dinaramdam akong physical pain! Kayo na ang magkaroon ng FROZEN SHOULDER.
“Madaling sabihin, it’s all in my mind. Sana, maranasan n’yo para maintindihan n’yo.”
NOEL FERRER: Kayang-kaya ‘yan ni Marissa Sanchez na laging laman ng posh hotels.
Isa sa bilib na bilib sa kanya ay si Tita Julie Yap-Daza.
Nakilala si Marissa bilang komedyante, pero at her very core is her talent for singing.
Kumusta ang love life ni Marissa? Kailan kaya magme-melt (aside from her frozen shoulder) ang kanyang frozen heart?
GORGY RULA: Nagsisipag na lang ngayon si Marissa kahit malungkot dahil hindi pa rin tapos ang isyu sa dating asawang nakasuhan.
Noong huling nakausap namin si Marissa, wala pa siyang balita kung nahanap na ang dating asawa na naisyuhan na ng warrant of arrest.
Maselan ang kasong kinasangkutan ng dating asawa kaya hindi ko maidetalye.
Iyon ang isa sa hinihingi ng singer-actress na makuha niya ang hustisya at managot ang dating asawa.
Thankful si Marissa dahil ang dami pa rin niyang kaibigang patuloy na tumutulong sa kanya.
Sana, makuha niya ang lahat na wish niya sa kanyang kaarawan.