JERRY OLEA: Nakamit ni Miss Philippines Karen Gallman ang dalawang special awards sa media presentation ng 47th Miss Intercontinental nitong Enero 10, Huwebes, sa Sofitel Philippine Plaza Manila.
Ibinoto siya ng mga taga-media bilang Media Favorite, at siya rin ang H&H Stand Out Beauty (Havey na Havey sa Ganda).
Sabi ni Mr. Gay World-Philippines 2009 Wilbert Tolentino (may-ari ng H&H Salon), “Siya po yung lumulutang sa hair, at nadala po niya yung typical Filipina beauty.”
Sa Okada Manila gaganapin ang tatlong pre-pageant shows.
Ang Swimsuit Competition at Philippine Designers’ Evening Gown Fashion Show ay nakatakda sa Enero 16, Miyerkules.
Ang Evening Gown Competition at Philippine Designers’ Filipiniana Fashion Show ay gaganapin sa Enero 17, Huwebes.
At ang National Costume Competition ay sa Enero 19, Sabado.
Ang koronasyon ay sa Enero 26, Sabado ng gabi, sa Mall of Asia Arena.
Ang telecast ay sa Enero 27, Linggo, bago mag-ASAP Natin ‘To sa ABS-CBN.
NOEL FERRER: Congratulations kay Karen! Ang burden lang niya ay dapat stand out talaga siya—really a cut above the rest.
Para manalo man siya ng title na Miss Intercontinental (na Japan ang host country ng 47th edition) ay hindi masabi na hometown decision ang naganap.
Good luck!
GORGY RULA: Mukhang may laban si Karen kumpara sa mga kandidatang rumampa sa Media Presentation.
Pero ilan sa mga paborito roon ay ang mga kandidata mula sa Paraguay, Colombia, Australia, at Russia (na model pala ng Mattel kaya mukha siyang Barbie doll).