Matagumpay na abogado, may kumportableng buhay, pero nananatiling itinataguyod ni Atty. Rey Bergado ang InnerVoices, ang bandang kanyang binuo noong 1991.
Lahad ni Atty. Rey sa panayam ng PEP.ph (Philippine Entertainment Portal), “Magkakaklase kasi kami sa Letran ng mga original members, so binuo namin ang InnerVoices, and then nung 1992 mas naging organized kami.”
Sila ng kaklase niyang si Porong de Torres (ama ng The Voice Kids Season 2 finalist na si Esang de Torres) ang mismong bumuo ng InnerVoices.
“Una, apat lang kami, and then wala kaming drummer. So kinuha namin si Ruben Tecson.
"And then tumugtog kami sa Art’s Venue, unang-unang gig namin, 1993 dun namin nakilala si Rene, sa Art’s Venue, nasa kabilang banda naman siya.”
Sa kasalukuyan ay gitarista ng banda si Rene Tecson.
Read: Orange & Lemons gets candid about the song ‘Pinoy Ako:’ “It made the band. It also broke us.”
WHERE INNERVOICES GOT BAND NAME
Saan kinuha ni Atty. Rey ang pangalang InnerVoices?
“Yung kanta namin parang it [came] from within, parang voices from within, tapos binaligtad namin.”
Kahit na ilang dekada na ang nagdaan ay tuloy pa rin ang kanilang nabuong samahan.
“Naging kaibigan ko na sila e,” bulalas ni Atty. Rey. “Magkakaibigan na kami noon pa, so this not just about the music and the band, it’s beyond the band na.
“We’re friends, ninong kami ng mga kanya-kanyang anak and nagkikita kami kahit walang tugtog. In fact, we’re all riding buddies, nagmo-motor kami.”
Read: Who told the Itchyworms to create "Beer" song
Dagdag pang kuwento ni Atty. Rey, “2020, the pandemic struck. Hindi kami nagkikita pero I kept in touch with them. We have a group chat, we helped each other during the pandemic so we never really lost touch with each other.
“So nung 2021, there’s still the pandemic, nag-isip kami, ‘Anong gagawin natin?’
“So we thought na mag-reunion kami once mabuksan na talaga ang economy, the music scene.
"Eto na nga nung 2022 nag-comeback kami dito as 19 East, sinubukan lang namin.
“And yun na, the ball started rolling again. Nabuhay ang music industry.”
Noong nalaman daw ng mga dati nilang kakilala na buo muli sila ay nagtawagan na ang mga ito at nag-alok ng gig sa grupo.
“Nakuha kami sa Hard Rock Café, sa Bar IX [Alabang] nakuha kami dun, ito 19 East nagtuloy din. Ang daming bars, ‘no?
“Yung sa Aromata [Quezon City], of course yung Bar 360 [Newport World Resorts] so naging busy kami.
“And we released last year yung tatlong singles namin."
Read: It started with a high school crush: How “Kahit Kailan” was written
Ang mga awiting “Isasayaw Kita," "Hari," at "Anghel,” na nasa ilalim ng Vehnee Saturno Music Corporation, ay available for download sa Spotify, Apple Music, YouTube Music, Deezer, at iba pang digital platforms.
Samantala, nanalo ang InnerVoices sa 14th Star Awards for Music ng Philippine Movie Press Club (PMPC) kamakailan sa kategoryang Revival Recording Of The Year para sa kantang "Paano," sa ilalim rin ng Vehnee Saturno Music Corporation.
“Thank you PMPC for recognizing InnerVoices during the 14th Star Awards for Music under the category 'Revival Recording of the Year' for the song PAANO. Salamat po Ama,” ang mensahe ni Atty. Rey bilang pasasalamat sa natamo nilang parangal.
NEW VOCALIST, MEMBERS FOR INNERVOICES
Si Atty. Rey ang keyboardist ng InnerVoices, at sa kasalukuyan ay gitarista ng banda si Rene Tecson. Kasama pa rin nila si Ruben bilang orihinal na miyembro ng grupo.
Pero through the years ay nadagdagan pa ang kanilang banda.
Bokalista ng InnerVoices si Angelo Miguel simula noong 2016.
Kuwento ni Angelo, “Actually, ang nangyari nun, nung 2016, may upcoming project sila. So nagkaroon ng time differences yung banda, yung iba may work.
"So that’s when I came in, to fill up the remaining projects ng InnerVoices that time in 2016.”
Saan siya nagmula bago nakapasok ng InnerVoices?
“Sa tabi-tabi lang," ang tumatawang pakli ni Angelo.
“Actually, si Jeffrey Virtudazo yung isang keyboardist namin, we are in the same band that time, ayun, sa retro band, it’s called Real Groove.”
Wala na raw ang Real Groove, at mukhang na-disband na raw ito.
“Tapos ayun, hanggang sa pinakilala ako ni Jeffrey Vertudazo kay Atty. [Rey].
"Tapos ayun na nga, tinuloy namin yung projects nila for the whole year, yung mga events nila, yung mga gigs.
“After nun, nagpahinga muna kami, siguro 2017, nagwatak-watak muna kami, nagkanya-kanya muna kami, 2016 to 2017 tapos pahinga na kaming lahat.”
Bakit sila nagpahinga ng isang taon?
Paglalahad ni Angelo, “Kasi nga siyempre may mga trabaho sila.
"Siyempre si Atty. [Rey] is attorney, di ba? Lalo na nasa government sector siya, siyempre mahirap, mahirap i-balance yung work tsaka yung banda noon, sa time niya, nung time na iyon.
“Siyempre si Rene Tecson also, meron din siyang work. Ganun din, setting up his construction firm nung time na yun.
"So ayan, kaya marami talagang hindi nagtugma noong time na iyon.”
Taong 2022 sila muling nabuo upang mag-perform.
“So after the pandemic, ayan si Atty. [Rey] kinontak kaming lahat, ‘So what are we waiting for? Everyone is back on track, let’s do it!’
“So ayan,” ang nakangiti pang sinabi ni Angelo.
Ang isa pa nilang keyboardist na si Joseph Cruz ay tiyuhin ng mga Cruz celebrities na sina Sunshine, Geneva, and Donna Cruz, at magkapatid na Rayver and Rodjun Cruz.
Si Jojo Esparrago naman ang sa drums at percussion ng InnerVoices.
story behind "Isasayaw kita"
Samantala, ang kanta nilang "Isasayaw Kita" ay isinulat ni Angelo at may malungkot na kuwento sa likod nito.
Lahad ni Angelo, “Yung 'Isasayaw Kita' is, hindi ko naman itinatago ito, is a song for my late daughter. Back in 2020 nung namatay siya e, pandemic, eight months pa lang na nasa womb.
“So, manganganak na, lalabas na siya.
“Una pa lang, mga three months na checkup, nun pa lang sinabi na sa amin ng doctor na hindi maganda yung heart nung bata.
"So… actually ang pagkakasabi nga ng doctor sa amin, ‘Huwag na kayong umasa na mabubuhay, na lalabas.’
“But still… dapat nga, actually nung early months pa lang pinapatanggal na sa tiyan, kasi nga siyempre, there’s no assurance na mabubuhay yung bata. Talagang mataas yung chance na mamamatay.
“But siyempre kami still, di ba, bata, buhay iyan, e. so, ‘Sige buhayin natin, why not, di ba? May awa ang Diyos.’
“Baka mamaya may milagro. And iyon mga seven months, ganyan, wala na, huminto na yung heart nung bata.”
Ayon kay Angelo, ang "Isasayaw Kita" ay isang "what might have been" song para sa kanyang pumanaw na anak.
Paliwanag niya, “Kasi there’s a lot of things na gusto kong gawin dun sa daughter ko e, like I want to dance with her, sa cotillion, sa debut.
“Sa totoo lang gusto ko talaga babae ang anak kasi di ba, ang daming special na event na mangyayari, katulad ng debut, di ba? At tsaka iba pag babae ang anak.
“So iyon na nga sana, e kaso lahat ng in-expect ko, siyempre habang nagbubuntis yung ex-wife ko nung time na yun, marami kaming siyempre plano, na, ‘O bilhan na natin ng ganito!’
“Na mag-aaral sa all-girls school, ‘Lagyan natin ng sweet sixteen kahit walang sweet sixteen dito sa Pilipinas, let’s do it!’
“Tapos may debut pa, so marami, marami.
“Lahat ng, nung nawala siya, nung namatay na siya, lahat ng iyon sinulat ko, lahat ng galit ko, siyempre nagalit din ako dahil, ‘Bakit? Hindi mo man lang pinagbigyan sana na,’ lahat iyon sinulat ko sa iPad ko.
“Ang haba nun, lahat ng galit ko, ng inis ko, ayun hanggang sa naging kanta na siya.”
Nasa YouTube at Facebook page ng InnerVoices ang kanta at music video ng "Isasayaw Kita."
Pinangalanan ni Angelo ang kanyang namayapang anak.
“She’s named Hope, sana. I named her Hope kasi iyon na lang ang natitirang pag-asa nung time na yun.”
Makalipas ang ilang buwan ay naghiwalay rin sila ng ina ng bata.
“Hindi na kami tumagal ng taon. Well, marami na kaming pinagdaanan nung time na yun, before pa mangyari iyon, so talagang nagpatung-patong na lang that time.”
“Especially pandemic nun, financial di ba, kasama na yun so talagang you cannot control it anymore.”
Single ngayon si Angelo.
Nakapanayam ng PEP.ph ang InnerVoices members sa gig nila sa 19 East (Km. 19 E Service Rd, Sucat, Muntinlupa) noong April 24, 2024, kung saan personal ding nanood ang owner ng naturang bar na si Wowee Posadas.