Thankful at walang pagsisisi sina Cassy Legaspi at Joaquin Domagoso na sa bakuran ng GMA-7 sila napunta.
Si Cassy, 20, ay isa sa kambal na anak nina Carmina Villarroel at Zoren Legaspi.
Si Joaquin, 19, ay anak naman ni Manila Mayor Isko Moreno.
Magkatambal sina Cassy at Joaquin sa upcoming Kapuso primetime series na First Yaya, na pagbibidahan nina Sanya Lopez at Gabby Concepcion.
Inusisa ng PEP.ph (Philippine Entertainment Portal) sina Cassy at Joaquin kung bakit GMA-7 ang napili nilang home network sa kanilang pagsabak sa showbiz.
CASSY LEGASPI
“Growing up naman, I was guesting both in [GMA-7], sa kabila [ABS-CBN],” paliwanag ni Cassy sa virtual interview nitong Miyerkules, February 24.
Ang unang nagpakita raw ng interes sa kanila ng kakambal na si Mavy ay ang Artist Center, ang talent management arm ng Kapuso network.
“After some guestings sa kabila, biglang nag-offer ang Artist Center, to sign with them.”
Hinimok din daw sila ng amang si Zoren na sunggaban ang pagkakataong ibinibigay ng GMA-7.
“And my dad was already with Artist Center and he had nothing but good comments to say."
Pagpapatuloy ni Cassy, “So, sabi niya, ‘I suggest, if you want to enter showbiz, you take this opportunity. Pero yun nga, you also take this seriously because this is also your work and this is your future.’”
Nag-usap daw ang kambal, at sa huli ay sinunod nila ang payo ng ama.
“So, kami ni Mavy, we took some time to really think na, ‘Do we sign with Artist Center?’ So, we gave it a shot.
“Now, I have no regret signing with GMA Artist Center. Super happy ako dito,” sambit ng dalaga.
Sina Carmina at Zoren ay may mga ongoing teleserye sa GMA-7.
Bida si Carmina sa Babawiin Ko Ang Lahat, samantalang si Zoren ay kasama sa Bilangin Ang Bituin sa Langit.
Hosts din sina Carmina, Zoren, at ang kanilang kambal na anak sa weekend magazine show na Sarap, ‘Di Ba? Bahay Edition.
JOAQUIN DOMAGOSO
Mabilis namang sagot ni Joaquin, “Ako, talagang GMA talaga from the start, because bago pa nanalo si Papa [bilang mayor], gusto na ako ng GMA.
"So, GMA talaga ako kasi.
“I believe in loyalty,” sabi pa ng binatang anak ni Mayor Isko, na nagsimula sa youth-oriented show ng GMA-7 na That’s Entertainment noong ‘80s.
Dagdag pa ni Joaquin, “Although nag-entertain kami ng konting shows sa 2, pero that was just a side thing lang.”
Taong 2019 nang pasukin ni Joaquin ang showbiz.
Read Also: Joaquin Domagoso on big changes in his showbiz career this 2022
LONG-TERM PLANS
Sundot naming tanong: pangmatagalan ba ang plano nila sa kanilang showbiz careers?
Ani Joaquin, “Ako, some part of me wants to pursue directing.
“Pero I don’t know pa, kasi I don’t know. I’m still a kid.
“I’m still at that age in my life where I’m still deciding what path I should take.”
Pero sigurado raw si Joaquin na papasukin niya ang pagnenegosyo. Kumukuha ngayon ang binata ng kursong Business Entrepreneurship at nasa second year college na.
Mas tiyak naman si Cassy na long-term ang pagsabak niya sa showbiz.
Naikuwento pa nga niya ang isang past interview niya na napanood niya kamakailan lang.
“I think kasi, growing up, show business life has always been there, as in. Nandiyan lang siya.
“But recently, I think last year, my family and I were watching our interviews in the past.
“One of the questions was, ‘Cassy, what would you want to be when you grow up?’ ‘Tapos sabi ko, ‘I want to be an actress.’ I want to be an actress since before.
“And ayun, with Artist Center, I wanna be an artista, gusto ko ito.
"Once First Yaya started, once this lock-in taping started, I wanted to be an artista even more.
"Nae-enjoy ko yung pagod, yung everything about it. I super love it.
"I think I can see myself doing this for a long time, like, a very, very long time.
"Excited ako for this journey."