May kani-kanyang misyon sina Mariel Padilla, Ciara Sotto, at Ruffa Gutierrez sa TV programang M.O.M.s (Mhies On A Mission).
“Yung personalities kasi namin, iba-iba,” sambit ni Mariel sa mediacon nitong Nobyembre 22, 2022, Martes, sa The Crossing Café, Daang Hari Road, Molino IV, Las Piñas.
“Di ba? So ako, feeling ko, iyon yung maio-offer ko dun sa table. Yung siguro energy ba? Energy ba, alam mo yun?
“So, feeling ko yung vibe — happy lang tayo — iyon yung para sa akin, maio-offer ko sa kanila that I can promise them, na masaya kami, ganun.
“Happy lang, light lang, ganun. For me, ha? Yun ang aking maiaambag kumbaga nga,” pagtatapat ng tinaguriang "Mhie na may Diskarte."
Sabi naman ng "Mhie na May Laban," si Ruffa, “Ako, I can offer my authenticity and my originality. Ahhm, importante yun, e.
“Kasi, hindi kami fake. Hindi lang siguro ako, I think that is also true with Mariel and Ciara.”
Singit ni Mariel, “Just like with the energy, sila din!”
Sambot ni Ruffa, “Yeah. And what I can bring to the table is… I know na the Villar Group of Companies can rely on me na sila ang magiging priority ko.
“And I’ll be professional, always come on time, I’ll always do my best. And I think that’s not just for me, I think sa ating tatlo din yun.”
Pahayag ng "Mhie na may Hataw" na si Ciara, “Ako naman, being true. I will just always be honest with my feelings, with the mhies. And I can also promise them that they can trust me.”
Hirit ni Mariel kay Ciara, “I want to add something dun sa maio-offer mo. Kasi, ikaw lang ang nakakagawa nun.
“Yung mga sporty mission, sa iyo na! Kunin mo na yun, mhie! Ikaw na yun, mhie! Nakalaan sa iyo yun, mhie!”
Pagngiti ni Ciara, “To inspire others to be fit, you know. You don’t have to be thin to be fit, no.”
Susog ni Ruffa, “Yung mga ginagawa ni Ciara, grabe talaga!”
Magpo-pole dancing ba sina Mariel at Ruffa just like Ciara?
Tugon ni Ciara, “Tuturuan ko sila. Mission ko yun, turuan silang dalawa. Tuturuan ko silang dalawa na mag-pole. Nakasulat yun.”
Napatili si Ruffa, “Sana huwag magiba yung pole, di ba? Pag-akyat namin sa pole…”
Himutok ni Mariel, “Pagod na po ako. Baka puwedeng siya na po. Hinihingal po ako. Baka puwedeng sila na po!”
“Pero nag-jump rope ka,” pakli ni Ciara.
“Di ba, isang ganun ko lang?” pagmulagat ni Mariel.
“Ako, hindi ko kaya. Kasi maliit yung ceiling. Saka baka magiba yung chandelier,” pagmamatuwid ni Ruffa.
HOW CIARA CAN CONVINCE MARIEL AND RUFFA
Ano ba ang dapat gawin ni Ciara para makumbinsi sina Ruffa at Mariel na mag-pole dancing?
“Siyempre po, hindi ko sila mapipilit kung ayaw po nila. Pero I will try my best to encourage them,” sabi ni Ciara.
“Kasi, feeling ko they’re both fearless. So I think they can do it.”
Pagsisiwalat ni Ruffa, “Alam mo, I tried it kasi dati, kay Dra. Vicki Belo. Parang muntik nang mabali yung pole!
“Ang hirap umakyat! Kasi kailangan mo parang maging monkey ka, e!”
Pagkontra ni Ciara, “Hindi naman!”
Dagdag ni Ruffa, “Ikaw kasi ano, sporty ka. So, kailangan siguro magpraktis muna tayo sa monkey bars.”
“Basta may something lang, feeling ko kaya nilang dalawa,” pananalig ni Ciara.
Napailing si Mariel, “Ako, ayoko talaga. Sabi ko kay Ciara, ‘Ayokong pinapawisan, ayokong hinihingal. Ayokong napapagod! Ha! Ha! Ha! Ha! Alam mo yun, ang hirap i-convince. Ha! Ha! Ha! Ha!”
ONLINE SELLING
Ang galing-galing naman ni Mariel sa online selling. Pati comments, nababasa niya habang nagbebenta siya ng kung anu-ano.
Kaya ba nina Ruffa at Ciara na pantayan man lang si Mariel sa ganung larangan?
“Magpabenta na lang sila sa akin!” mabilis na sabi ni Mariel.
“Iba ang talent ni mhie!” pagsuko ni Ciara.
Napangiwi nang slight si Ruffa, “Hindi! Hindi ko kaya! At saka parang twelve hours kang nagsasalita! Di ba?”
Pagkontra ni Mariel, “Grabe naman yung twelve hours! Talagang naganun na yung dila ko pag ganun! Five hours straight lang.”
Kuwento ni Ruffa, “Kagabi, nagkita kami ni Robin [Padilla]. Sinabi ko sa kanya, ‘May nahanap na akong mas malakas ang energy kesa sa akin at mas madaldal kesa sa akin!’
“‘Sino?’ ‘Asawa mo!’ Sabi niya, never a dull moment with you daw.”
Natawa si Mariel.
Siyangapala, mag-uumpisa ang M.O.M.s (Mhies On A Mission) sa Nobyembre 28, Lunes ng 11:00 a.m.-12:00 nn sa ALLTV. Abangan ang pasabog reveal sa kanilang pilot episode!