Pumayag si Ericson “Eric” Pascual, 30, taga-Bulacan, Bulacan, na maging makeup artist ng kanyang ex-girlfriend, free of charge, sa araw ng kasal nito.
Hindi rin iyon ang unang beses na inayusan ni Eric ang ex-girlfriend na si Gillian Pineda-Rivera, na ikinasal noong February 10, 2023.
Bago iyon, inaayusan na ni Eric si Gillian sa mga events, tulad ng sagala.
Bagamat walong buwan na ang nakalipas nang i-post ni Eric ang kanyang TikTok video tungkol sa kasal ng ex na si Gillian, sumusulpot-sulpot pa rin ito sa social media.
Kumukurot pa rin kasi ito sa puso ng netizens.
Mas may kurot sa puso ang kuwento ni Eric kung paano ang dating magkasintahan ay naging magkaibigan, at nanatiling bahagi ng buhay ng isa’t isa.
Read: Resort worker in El Nido insists their guest is “Harry Potter”: “Umamin Po xa.”
THE LOVE STORY
Nakausap si Eric ng PEP.ph (Philippine Entertainment Portal) via instant messaging.
Kuwento niya, “Naging kami po when we were in high school, mga year 2009-2011.
“Eleven months kami that time bago kami nag-break up. Kasi mahigpit parents niya noon.”
Nasa second year high school daw sila noon at ginawa nilang secret ang kanilang relationship. Pero nagkahiwalay rin sila.
Pagpapatuloy ni Eric, “Then naging kami po ulit pagtuntong namin ng third year high school.
“Ilang months lang din kami, then nag-break din kami kasi parang nagselos siya that time.”
Nagtapos sila ng high school, pero hindi sila on good terms. Mag-uusap sila pagkalipas ng ilang taon.
Lahad ni Eric, “Until noong 2016, she needs a makeup artist for Reyna Elena…
“Pretty kasi siya, e, kaya lagi siya sa sagala that time.
“Nag-start na akong mag-make up, kaya naman ako ang nag-make up sa kanya…
“And nasundan pa iyon. I think twice ko siya na-make up-pan, pero never na namin na-open yung about sa amin.”
Marahil ay alam na nilang nakaraan na iyon kaya hindi na lang nila pinag-usapan.
Read: Grade 5 student slapped by teacher suffered brain swelling; body of victim undergoes autopsy
MY EX-GIRLFRIEND’S WEDDING
Pagbubunyag pa ni Eric, kinonsulta muna siya ni Gillian bago pa man itakda ng huli ang petsa ng kanyang kasal.
Kuwento ni Eric, “Before sila mag-plan ng wedding, she messaged me if available ako sa mga dates na possible ng wedding nila.”
Ang initial plan daw ay ganapin sa January ang wedding, pero hindi available si Eric.
Kaya ang kasal ni Gillian, nalipat ng February.
Gumawa ng TikTok video si Eric tungkol sa kasal ng kanyang ex-girlfriend. Isinama rito ni Eric ang messaging nila ni Gillian.
Mababasa rito na gusto talaga ni Gillian na si Eric ang kanyang maging makeup artist.
Kinonsulta muna niya si Eric kung kailan siya available bago i-set ang date ng kanyang wedding.
“Ang gusto daw niya kasi ako ang mag-make up sa kanya sa wedding nila,” mensahe ni Eric sa PEP.
Ani Eric na bagamat hindi sila nagkatuluyan, masaya pa rin siya dahil sa mabuting tao napunta si Gillian.
Sabi ni Eric sa PEP, “Yes, I’m being emotional that day even if nung nag-eedit ako ng video, kasi she deserves what I’m seeing.
“Masaya ako para sa kanya. Mabait kasi yun, e, deserve niya maging masaya.”
Wala ring panghihinayang si Eric bagamat ikinasal sa iba si Gillian.
Sabi ni Eric, “Wala naman regret kasi nakita ko naman na masaya siya, and mahal nila yung isa’t isa.
“Never namin kasing napag-usapan about us, kaya, syempre, medyo may ilang factor. I’m happy na din kasi hindi niya ako nakalimutan until nung ikasal siya.”
Sa kuwento nila bilang lover’s to friends, naniniwala si Eric na everything happens for a reason.
Sabi niya, “Siguro nagtapos kami ng pareho kami masaya. Masaya ako sa nakita ko, kung paano siya ngayon, and I know she’s happy for what I am now.
“We are mature now and mas naintindihan namin yung salitang love.
“Siguro naging part lang ng buhay namin yung isa’t isa kasi meron talagang mas darating na better para sa amin.”
Ang TikTok video ni Eric ay mayroon nang 6.4 million views.
Nakakaantig ang video clip na nagpapakita ng highlights ng kasal ni Gillian.
Pero may kurot sa puso ang caption ni Eric.
Bahagi ng caption: “Hindi ako ang naging groom mo. Pero I wanna make sure na you're one of the beautiful bride[s] [to] walk down the aisle. Kasi ako ang makeup artist mo.”
@makeupbyericsonpascual Replying to @Mae hoy bakit ako naiiyak habang ineedit to ???????????? highschool pa yun e #wedding #weddingmakeupartist #tiktokph #fry #makeupartistph ? original sound - taraveltheworld