"Gerald Anderson, maghanda-handa ka na!"
Ito ang kunwa'y maangas na sambit ni Vice Ganda laban kay Gerald Anderson na makakatapat niya sa napipintong All-Star Games 2019.
Si Vice ang pambato ng Team Vice Ganda o It's Showtime All Stars, habang si Gerald naman ang sa Team Gerald Anderson o Star Magic Warriors sa gaganaping basketball match sa Araneta Coliseum sa Linggo, August 25.
Ang warning ni Vice kay Gerald ay nag-ugat sa pagpapakita ni Vice ng kanyang maliksing basketball moves sa live telecast ng It's Showtime, noontime show ng ABS-CBN, noong August 20.
Natatawang hirit pa ni Vice, "May guest player ako!"
Tanong ng co-host niyang si Vhong, "Ikaw magbabantay kay Gerald?"
Sagot ni Vice, "Oo, may nag-utos sa akin. Bantayan ko daw."
Tanong ulit ni Vhong, "Sino?"
Sabay turo ni Vice kay Vhong, "Ikaw! Ikaw captain ball, e. Sabi mo bantayan mo si Gerald."
Paglilinaw naman ni Vhong, "Magaling yun, e. Siyempre bantayan mo."
BEA-GERALD-JULIA ISSUE
Noon lang August 7 ay nabanggit din ni Vice si Gerald sa It's Showtime dahil sa kontrobersiyang kinasasangkutan ni Gerald, ex-girlfriend na si Bea Alonzo, at leading lady sa pelikulang Between Maybes na si Julia Barretto.
Diretsahang nagbiro noon si Vice na marami ang naghintay sa wala para sa inaabangan sanang pagsagot ni Bea sa bullying allegation ni Julia.
Kaugnay ito ng hiwalayan nina Bea at Gerald kasabay ng balitang si Julia diumano ang bagong nililigawan ni Gerald.
VICE'S LOVE FOR BEA
Tila updated si Vice sa isyu dahil sa It's Showtime noong July 31, nabanggit niyang napa-movie marathon siya ng mga pelikula ni Bea na mapapanood sa isang streaming service.
"Mahal ko siya," sabi ni Vice, na binigyan ng kahulugan ng mga tao na salita ng pakikisimpatiya niya kay Bea.