Handa raw harapin nina Senador Juan Ponce Enrile, Senador Ramon “Bong” Revilla Jr., at Senador Jinggoy Estrada ang bagong plunder case na isinampa laban sa kanila ng Field Investigation Office (FIO) ng Office of the Ombudsman.
Ito ay kaugnay pa rin ng pagkakasangkot diumano nila sa P10-billion pork barrel scam.
Read: Senators Juan Ponce Enrile, Jinggoy Estrada, Bong Revilla face new plunder charges
Ayon sa report ng GMA News, kinuwestiyon ni Senator Estrada ang bilis ng pagpa-file ng bagong plunder case, ngunit handa raw siyang sagutin ito.
"Napakabilis naman niyan... I will answer it in the proper forum, all charges in the proper forum," sabi ni Senator Estrada sa isang panayam.
Tila hindi rin naman nababahala si Senate Minority Leader Juan Ponce Enrile sa bagong kaso na isinampa laban sa kanya.
Sabi niya, "Ang balita ng abogado ko, they just put a docket on the old charge, I do not know.
“Ako naman, I’m ready to face the case. Pinag-aralan ko rin naman yun.”
Pinaninindigan naman ng legal counsel ni Senator Revilla na inosente ang kanyang kliyente sa pork-barrel scam.
Sabi ni Atty. Joel Bodegon, sa isang text message, "As he has stated from the beginning, he is ready to face whatever charge or charges are filed against him to clear his name.”