“She’s my girlfriend now.”
Ito ang deklarasyon ni Daniel Matsunaga patungkol sa matagal nang napapabalitang relasyon nila ni Erich Gonzales.
Ginawa ni Daniel ang pag-amin sa nationwide broadcast ng Kapamilya Deal Or No Deal ng ABS-CBN kaninang Miyerkules ng hapon, June 3.
Sina Daniel at Erich ang naging celebrity players sa show na hinu-host ni Luis Manzano.
Unang napansin ni Luis na ayaw bitawan ng dalawa ang kanilang mga kamay.
Tanong ng TV host sa dalawa: “Pare, ayaw niyong bitawan ang isa’t isa, 'no?”
Halos sabay na tugon nina Daniel at Erich: “Malamig, malamig.”
Kasunod nito ay tinanong ni Luis kung paano na-realize ni Daniel na ang attraction niya kay Erich “is becoming more than friends.”
Kinikilig na sagot ni Daniel, “Crush ko, bro.”
Paano ba sila nagkakilala?
Tugon ni Erich, “Nagkakilala kami last year pa [sa Palawan] because of Kris TV.
"Tapos, we share the same interests, ganyan. Tapos, we go to the same church din.”
Muling tanong ni Luis: “Linawin muna natin, bakit spartan-spartan baby?”
Ang tinutukoy ni Luis ay ang madalas na ginagamit na hashtag ni Daniel sa kanyang posts sa Instagram tungkol sa kanila ni Erich na #spartan at #spartanbaby.
Dito na nadulas si Daniel.
Tugon niya, “Well, siguro mahilig ako sa workout-workout, ‘di ba? So, nung naging kami…”
Sabat ni Luis, “O tapos, tapos, walang paikot-ikot...
"Hindi nanggaling sa akin, hindi nanggaling kay Erich, malinaw, ‘Nung naging kami.’ Tapos!
"Maraming salamat."
Aminado naman si Daniel na nahuli nga siya ni Luis.
Dugtong pa ni Luis, “Noong naging nag-boyfriend-girlfriend kayo...”
Pagkumpirma naman ni Daniel, “Yes, yes... She’s my girlfriend now.”
Unang lumutang ang balitang may relasyon ang dalawa nang matapos ang pinagsamahan nilang teleserye sa ABS-CBN, ang Two Wives.
Si Kris Aquino ang unang naghayag na hiwalay na si Erich sa longtime non-showbiz boyfriend nito, kasunod ng haka-hakang nagdi-date na sina Daniel at Erich.
Read: Kris Aquino confirms Erich Gonzales's breakup with non-showbiz BF; Erich dating Daniel Matsunaga?