Binisita na ni Alma Moreno ang anak niyang si Mark Anthony Fernandez sa Angeles City Police Station 6 sa Pampanga, gabi ng Miyerkules, October 5.
Ito ay dalawang araw mula nang maaresto ang 37-year-old Kapuso actor matapos itong mahulihan diumano ng isang kilong pinatuyong dahon ng marijuana habang sakay ng sports car nito.
READ: Mark Anthony Fernandez may face lifetime imprisonment over alleged illegal possession of marijuana
Ayon sa ulat ni Gracie Rutao, na nailathala sa ABS-CBN News Online, dalawang oras ang itinagal ni Alma at iba pa nitong kasama sa loob ng Angeles City Police Station 6.
Makikita sa video ng ABS-CBN News na sinubukang kapanayamin ang beteranang aktres bago ito umalis ng lugar.
Tila maayos namang tumanggi si Alma na magbigay ng anumang pahayag sa ngayon.
Makikitang nakaalalay kay Alma ang dalawa niyang kasama mula sa paglabas nila ng presinto hanggang sa makasakay ng kanilang dalang sasakyan.
Sa mga naunang ulat ay nabanggit na hindi kaagad nakadalaw ang aktres sa kanyang anak dahil sa sakit nitong high blood.