Iprinodyus ni Harlene Bautista ang pelikulang Rainbow’s Sunset para sa kanyang ninong na si Tony Mabesa.
Ito ang unang pelikula na bida si Tony.
Nagwaging best supporting actor si Tony sa 44th Metro Manila Film Festival (MMFF) noong Disyembre 27, 2018 para sa nasabing pelikula.
Sa 42nd Worldfest Houston Film Festival noong Abril 2018 sa Houston, Texas, kapwa itinanghal na best actor sila ng co-star na si Eddie Garcia para sa Rainbow’s Sunset.
Post ni Harlene nitong Oktubre 4, Biyernes ng gabi, sa Facebook kaugnay sa pagpanaw ni Tony, “I love you, Sir. Maraming salamat po sa lahat-lahat. ”
Pinost ni Eric Ramos (scriptwriter ng Rainbow’s Sunset) nitong Friday night sa FB ang isang litrato nina Eddie Garcia at Tony Mabesa na magka-holding hands.
Ani Eric, “Tatlong buwan matapos pumanaw si Ramon, iniwan na rin tayo ni Fredo. Paalam, Sir Tony Mabesa! Pakikumusta na lang kay Tito Eddie sa langit. O kung saan man magkahawak-kamay ang bahaghari at dapithapon.”
DIREK JOEL'S MOVIE COMPANION
Madalas na kasama si Tony Mabesa sa mga pelikulang dinirek ni Joel Lamngan.
“Siya ang aking tagapayo, ang aking guro!” sabi ni Direk Joel Lamangan nang makausap ng PEP.ph (Philippine Entertainment Portal) nitong Sabado ng umaga, October 5, via Messenger.
Madalas ding magkasama sila sa panonood ng mga sine.
“Nag-uusap at nagdi-discuss kami ng mg obrang napapanood!”
Isa si Tony sa mga panauhin ni Direk Joel sa kanyang birthday dinner noong Setyembre 21, Sabado, sa Alba restaurant, Morato Avenue, Quezon City.
“Parati siyang nandoon sa b-day prty ko! Mami-miss ko siya!!
“Isa siyang kaibigan, guro, mabuting tao!! Siya ang tunay na ibig sabihin ng salitang ‘director’! Paalam Tony!” sabi pa ni Direk Joel.
OPEN LETTER TO SIR TONY
May open letter si Film Development Council of the Philippines (FDCP) Chair Liza Diño-Seguerra sa FB para sa kanyang mentor:
“Dear Sir Tony,
“I still can't believe na totoo... na wala ka na. Na hindi ka na namin makakasama. Masakit sa dibdib.
“Para akong anak na nawalan ng magulang. You are more than just a mentor and director to me. You are like the Father (and mother) that I will always look up to.
“I don't know if I've told you enough how grateful I am to have been mentored by you. Ikaw ang puno't dulo ng lahat. Kung wala ka, hindi ako magkakapuwang sa industriyang ginagalawan natin ngayon.
“Ikaw ang nagtiwala, sumugal at nakakita nang talentong meron ako (kahit sinasabi mo lagi...maganda lang ako!). You are why I am here. At hinding-hindi ko makakalimutan yun, Sir Tony.
“Sir, paano na? Bakit mo kami iniwan? Sabi ko noon sa sarili ko, aarte ako ulit pagkatapos ko sa FDCP, paano pa tayo ulit magkakatrabaho?
“I will miss your texts. Your random messages of support to let me know I am appreciated and loved.
“I will also miss your ‘tampo’ texts, pag di mo pa nare-receive yung mga imbitasyon ko. Or when you want to remind me about your MMFF or PPP passes to watch films kasi suspended ang MTRCB Deputy card mo.
“Sir, hindi man tayo nagkikita parati pero sana, alam mo na palagi akong grateful sa iyo. Mahal na mahal na mahal na mahal kita, sir, and it breaks my heart right to now to say goodbye to you...
“Sir TONY, MARAMING MARAMING MARAMING MARAMING SALAMAT.
“Kaming mga anak mo sa teatro ay walang katapusang magpupugay sayo. Sir, I love you so much...pls watch over us. Sana na-hug man lang kita. Love you, sir Tony...
“Your prodigal daughter,
“Liza”
A POEM FOR TONY MABESA
Tagulaylay ng mandudula, makata, aktor at direktor na si Frank Rivera sa Facebook:
TONY MABESA
Isang Pahimakas
Punumpuno ang buhay mo, Kaibigan
May dula, may sayaw, saka may awitan
Dulsayawit ito't may bahaghari pa
Edukasyon, Sining, at saka Kultura
Galing ka sa Hawaii nang bumalik dito
Iyong tinanggihan offer ng MSU
At ang pinili mo ang DULAANG UP
Napakapalad kong mapasa-Marawi
Ating mga buhay pinagtagpo noon
Dula ni Pilandok para lang kahapon
Bati mo sa akin, "Tama ka lamang d'yan
Sa Kambayoka ka, ako sa Diliman."
Doon nagsimula ang pagkakatoto
TV't pelikula, hindi lang sa teatro
Sa Seiko, sa Regal tayo'y nagkasama
Sa Balintataw at kahit pa sa Viva
Pareho tayo ng katotong matalik
Si Joel Lamangan sa atin nagbitbit
Sa mga proyekto at mga lakaran
Lalong pinaigting pagkakaibigan
Ang birthday ni Joel huling pagkikita
At pinaghuntahan si Lope de Vega
May-Akda ng dulang iniwan mo ngayon
Nang ika'y yumaong wala sa panahon
Subalit kung akin itong lilimiin
Ang iyong paglisan napapanahon din
Dahil ang iniwang dula ang pamana
Kahit di natapos madudugtungan pa
Sa ating dalawa ganyan ang nangyari
Mga nakinabang maraming-marami
Kaya, Katoto ko, pumalangit ka na
Tala mo'y ilawan, O, TONY MABESA!
PAALAM...