Umamin na sa wakas si Karla Estrada, 44, na in a relationship siya ngayon.
Sa taped episode ng Magandang Buhay ngayong araw, November 14, inusisa si Karla ng co-hosts niya sa ABS-CBN program na sina Melai Cantiveros at Jolina Magdangal tungkol sa estado ng kanyang puso.
Inusisa rin nila ang naging bakasyon ni Karla kasama ang boyfriend sa Osaka, Japan.
Ayon kay Karla, “Okay naman. Bukod sa last year na kasama ko yung mga anak ko na nag-snow kami, ito ang pinakamasaya na nakasama ko ang partner naman.”
Labis namang kinilig sina Melai at Jolina sa rebelasyong ito ni Karla.
Sabi ni Jolina, "Ayun na nga, Momshies, it's official, in a relationship ang Queen Mother."
Dagdag pa ni Melai, "Inamin na niya sa telebisyon. I love it!”
Ayon kay Karla, hindi naman dapat itago ang kanilang relasyon dahil mabuting tao raw ang kanyang nobyo.
Paliwanag niya, “Deserve naman. He is a very good man.”
Wala nang iba pang paliwanag si Karla ukol sa katauhan ng kanyang boyfriend.
Pero base sa ilang komento sa kanyang post sa Facebook noong November 7, “Jam” daw ang pangalan ng boyfriend ng TV host.
Noong Oktubre lamang, magkasama si Karla at ang kanyang boyfriend sa Coron, Palawan.
Taong 2017 huling nagkaroon ng boyfriend si Karla sa katauhan ni Mark Yatco.
Ngunit tinuldukan nila ang kanilang long-distance relationship dahil nakabase si Mark sa Amerika.