Halos isang buwan matapos niyang kumpirmahin ang kanyang pakikipaghiwalay sa race-car driver na si Marlon Stockinger, nakatagpo na nga ba ng bagong pag-ibig si Pia Wurtzbach sa katauhan ng travel editor-entrepreneur na si Jeremy Jauncey?
Kinikilig ngayon ang maraming fans ng Miss Universe 2015 dahil sa nababalitang pagkakamabutihan nila ng Scotland-born model at professional traveler.
Naniniwala ang fans na magkasamang sinalubong nina Pia, 30, at Jeremy, 34, ang bagong taon habang nagbabakasyon sa isang isla sa Indonesia.
Ibinatay ng netizens ang kanilang suspetsa sa malaking pagkakapareho ng mga Instagram posts nina Pia at Jeremy sa nakalipas na mga araw.
January 1 nang mag-post si Pia ng litrato ng kanyang “First breakfast of 2020” habang nasa pampang ng isang isla.
Seksing-sexy ang beauty queen sa suot niyang red two-piece swimsuit, bagamat hindi niya tinukoy sa caption kung nasaan siya.
Sa post ni Jeremy nitong December 31, ibinahagi niya ang drone shot ng paradise island na Bawah Reserve sa Indonesia.
Sa caption, sinabi ni Jeremy na ang isla “will be home for the next week.”
Ni-like nina Pia at Jeremy ang posts ng isa’t isa.
Pero ang mga litrato nina Pia at Jeremy sa kani-kanilang Instagram Stories ang nagbigay-daan sa hinala ng netizens.
Nagkataon kasing pareho ang background ng kani-kanilang selfies nitong nakaraang Huwebes, January 2.
May pictures din sila ng sinasakyang bangka—na nagkataon namang magkapareho rin.
Maging ang pagkakatulad ng sunglasses nina Pia at Jeremy ay napansin din ng eagle-eyed fans.
A “VERY SPECIAL” NEW YEAR’S EVE TRIP FOR JEREMY
Nauna rito, sa Instagram post ni Jeremy nitong December 8, idinetalye niya ang mga huling lugar na pupuntahan niya bago matapos ang 2019.
Ang paglilibot ng dating rugby player ay bahagi ng kanyang trabaho bilang founder at Chief Executive Officer (CEO) ng social media-savvy creative agency na Beautiful Destinations.
Bukod dito, travel editor-at-large rin si Jeremy ng Asia Tatler.
Sa naturang post, binanggit ni Jeremy na sa New York City ang huling destinasyon ng kanyang team bago siya umuwi sa Edinburgh para roon mag-Christmas, “and on to a very special New Year’s Eve trip.”
At press time, kapwa wala pang reaksiyon sina Pia at Jeremy sa pagli-link sa kanila ng netizens sa isa’t isa.
PIA-MARLON BREAKUP
December 5 nang unang iulat ng PEP.ph (Philippine Entertainment Portal) na hiwalay na sina Pia at Marlon, 28 anyos.
Tumagal din ng halos tatlong taon ang kanilang relasyon.
Ayon sa pahayag sa PEP.ph ng business manager ni Pia na si Rikka Infantado-Fernandez, September pa natuldukan ang matagal nang on-and-off na relasyon ng dalawa.
