Handang mamagitan ang Philippine Medical Association (PMA) sa sigalot sa pagitan ng kanilang miyembro na si Dr. Esterlina Tan at ng Kapamilya singer na si Yeng Constantino.
Ito ang mensahe ng PMA spokesperson at chairman ng PMA Commission on Ethics na si Dr. Bu C. Castro sa ipinadala niyang pahayag kay Mario Dumaual ng ABS-CBN News ngayong araw, January 10.
Pahayag ni Dr. Castro:
"The PMA has become aware that the unfortunate incident in Siargao involving Dr. Esterlina Tan and Madam Yeng Constantino has evolved into a court case, be that as it may the PMA is always open and offers its venue for a possible settlement between Dr. Tan and Madam Yeng Constantino."
Ikinagulat ng publiko ang paglabas sa Facebook kahapon, January 9, ng kopya ng warrant of arrest laban sa Pop Rock Royalty kaugnay ng cybercrime case na isinampa ni Dr. Tan sa RTC Branch 31 ng Dapa, Surigao del Norte.
Nakitaan ni Presiding Judge Cesar B. Bordalba, ng RTC Branch 31 ng Dapa, ng probable cause ang isinampang reklamo ni Dr. Tan sa kanyang sala kaya naglabas ito ng warrant of arrest laban kay Yeng noong December 12, 2019.
Ipinagtaka naman ni Yeng at ng kanyang kampo ang nasabing warrant dahil hindi sila aware na may kinakaharap palang kaso ang Kapamilya singer.
Magbibigay raw ng pahayag ang kampo ni Yeng—sa pamamagitan ng abugado nitong si Atty. Joji Alonso—kapag natanggap na nila ang kopya ng kasong isinampa laban dito.
Ayon naman sa ulat ng ABS-CBN News, natanggap ng Caraga Police Office, Butuan City ang kopya ng arrest warrant kay Yeng nito lang umaga ng Biyernes, January 10.
Pahayag ni Police Brig. Gen. Joselito Esquivel Jr., regional director ng Caraga Police Office, “Ngayon lang kasi kami nabigyan ng kopya so I have to ask my provincial director as to the status.
"Kasi yung kaso, bailable lang ng P30,000, so kung live pa yung warrant of arrest, she could be subjected to arrest.”
Nakapagpiyansa na si Yeng ng halagang P30K ngayong araw.
Nagsampa si Dr. Tan ng kasong paglabag sa R.A. 10175 (Cybercrime Prevention Act of 2012) in relation to Article 355 ng Revised Penal Code ilang buwan matapos siyang akusahan ni Yeng na tila wala raw ito sa hulog nang asikasuhin ang naaksidenteng asawa ng singer na si Yan Asuncion sa Dapa Siargao Hospital noong July 2019.