Biniro ni Luis Manzano na asyumera lang umano si Alex Gonzaga, 32, sa marriage proposal ng boyfriend nitong si Mikee Morada, 32.
Kaugnay ito ng video kunsaan makikita ang pagluhod ni Mikee sa gitna ng pamamasyal nila ni Alex sa Hong Kong noong December 28, 2019.
Nasa garden sila ng 1881 Heritage Hotel nang biglang lumuhod si Mikee sa harap ni Alex.
Kita rin sa video na napalundag si Alex sabay upo sa harap ni Mikee sa sobrang excitement.
Nagbibirong hirit ni Luis, tila napilitan lang si Mikee na mag-propose dahil nag-expect daw na si Alex na maglabas ang nobyo nito ng singsing.
"Baka nagtali lang ng sintas, tapos biglang ganyan reaction mo kaya na pressure? Yun lang naman akin."
Tawa nang tawang napa-comment si Bianca Gonzalez sa hirit ni Luis.
Sa thread ng biro ni Luis kay Alex, may ilan ding netizens ang natawa sa umano'y pambu-bully ng TV host-actor kay Alex.
Sabi ng isa, "@luckymanzano kanina kopa antay comment mu na basag trip kay Alex hahaha."
May nagbiro rin na dapat ay si Luis, 38, naman ang mag-propose sa girlfriend nitong si Jessy Mendiola, 27.
"@luckymanzano ikaw naman napag iiwanan kana poh," saad ng ng isang netizen kalakip ang kiss emoji.
Ang totoo ay nauna nang nag-congratulate si Luis kina Alex at Mikee. Kasabay niya ang girlfriend na si Jessy na masaya rin sa balitang engaged na ang TV host-vlogger.
Gayundin si Bianca na kinikilig para sa newly engaged couple.
"SUPER HAPPY FOR YOOOU [lovestruck emojis] Congratulations!!!! Great job @mikee_mo!!!!"
Si Mikee ay isang konsehal sa Lipa City, Batangas. Tatlong taon na silang magkasintahan ni Alex.