Nagkakaisang dumepensa ang fans ni Julia Barretto laban sa mga pilit na idinadawit ang aktres sa hiwalayang James Reid at Nadine Lustre.
Nitong Martes, January 21, nagtagumpay ang fans ni Julia na mapa-trend sa Twitter ang #LeaveJuliaBarrettoAlone.
Ito ay matapos na kumalat sa social media nang araw na iyon ang lumang litrato ni Julia kasama si Issa Pressman.
Si Issa ang pinagbintangan ng ilang fans nina James at Nadine—mas kilala bilang JaDine—na third party sa hiwalayan ng dalawa.
Kinabitan ng ilang netizens ng mga maiintrigang caption ang naturang litrato nina Julia at Issa.
Sa isang caption, nakasaad na dahil ba “friends” ang dalawa, applicable na sa kanila ang kasabihang “birds of the same feather flock together?”
Ang isa pang netizen, ginamit ang naturang litrato para manawagan sa kababaihang huwag maging “Julia or Issa in someone’s relationship.”
JULIA’S FANS REACT; TREND ON TWITTER
Ang parehong posts ay umani ng batikos mula sa fans ni Julia, na nagsabing malinaw namang walang kinalaman ang aktres sa hiwalayan nina James at Nadine.
Reklamo nila, nananahimik ang 22-anyos na aktres, pero hindi pa rin ito tinatantanan ng “bullying” kaugnay ng kinasangkutang kontrobersiya noong nakaraang taon.
July 2019 nang madawit si Julia sa hiwalayan nina Gerald Anderson at Bea Alonzo.
Kapwa itinanggi nina Gerald at Julia na may kinalaman ang young actress sa breakup ng aktor kay Bea.
Samantala, kahit ang mga hindi fans ni Julia, ginamit ang #LeaveJuliaBarrettoAlone upang punahin ang pilit na pag-uugnay sa aktres sa JaDine breakup, dahil lang kaibigan nito si Issa.
YASSI DEFENDS ISSA
Si Issa ay nakababatang kapatid ng aktres na si Yassi Pressman.
Sa isang Instagram post ngayong Miyerkules, January 22, pinabulaanan ni Yassi na may kinalaman si Issa sa hiwalayan.
Sumagot pa nga si Nadine ng "Love u both” sa naturang post ni Yassi, at tinag ang magkapatid na Pressman.