Isang araw pagkatapos makunang magkasama sina James Reid at Nadine Lustre sa isang pub sa Makati City noong January 25, Sabado, muling nagkasama ang dating magkasintahan nitong Linggo ng gabi, January 26.
Base ito sa videos at photos na ipinost sa Instagram ng kapatid ni James na si Lauren Reid.
Patunay lamang itong nananatiling magkaibigan sina James at Nadine kahit break na sila.
Eksaktong isang linggo na ang nakararaan nang kumpirmahin ng dalawa ang kanilang breakup.
JADINE ALL SMILES IN PHOTOS
Tinawag na “pasta night” ni Lauren ang pagsasama-sama nilang magkakaibigan.
Naka-tag sina James at Nadine sa ipinost na videos ni Lauren sa kanyang Instagram Story.
Nag-post din si Lauren sa kanyang Instagram account ng dalawang group photos, kung saan kasama sina James at Nadine na parehong nakangiti.
Hindi magkatabi ang dating magkasintahan sa mga larawang ito.
Sa isang video namang ipinost ni Lauren, mapapanood si Nadine na nagsasalita.
Katabi niya ang isang lalaki na hindi kita ang mukha, pero nakatuon ang atensiyon nito sa aktres.
Base sa suot na T-shirt ng lalaki ay posibleng si James ito.
JADINE PUB SIGHTING
Noong Sabado ay kumalat sa social media ang photos at videos nina James at Nadine nang pumunta sila sa isang pub sa Brgy. Poblacion, Makati City.
Makikitang magkasama ang dalawa at parehong nasa happy mood sa kabila ng mataong lugar.
Sa isa pang lumutang na video, makikita sina James at Nadine na tila nakatungtong sa elevated platform at masayang nakikisayaw sa kumpol ng maraming tao.
May larawan din silang naglalakad sa crowded area.
Marami naman sa JaDine fans ang natuwa na makitang magkasama pa rin ang kanilang favorite love team.
January 20, Lunes, nang kumpirmahin nina James at Nadine na hiwalay na sila.
Sa joint statement na ipinadala nila sa Tonight With Boy Abunda, sinabi ng dalawa na mutual decision ang paghihiwalay nila.
Bukod sa career, gusto raw nilang pagtuunan ang "personal growth as we are still young and we want to achieve as much as we can.”
Paniniyak pa nina James at Nadine “We are in good terms and are still really good friends and will continue to work with each other especially when it comes to music.”
January 1, 2020 nang unang iulat ng PEP.ph (Philippine Entertainment Portal) ang breakup nina James at Nadine dahil sa “irreconcilable differences.”