Sinadya man o hindi, ikinatuwa ng ilang Kapamilya artists at personalities ang “solidarity” gesture ng anchors ng 24 Oras, ang primetime news program ng GMA-7.
Sa episode ng 24 Oras nitong Martes, February 11, kapansin-pansin ang kulay ng mga suot ng anchors na sina Vicky Morales, Pia Arcangel, at Atom Araullo.
Tugma kasi ang mga ito sa kulay ng logo ng ABS-CBN: red, green, at blue.
Ang puwesto nina Pia (red), Vicky (green), at Atom (blue) habang nag-uulat ay tugma rin sa color arrangement ng Kapamilya logo.
Kaagad namang nag-viral ang screen shot ng GMA News anchors, na sinasabing sadyang suot ang kulay ng ABS-CBN logo.
Iniuugnay ito ng netizens sa kinahaharap na krisis ng ABS-CBN sa kanilang franchise renewal.
Laman ngayon ng balita ang ABS-CBN dahil sa pangambang pagsasara nito dahil sa inihaing quo warranto petition ni Solicitor General Jose Calido, official counsel ng gobyerno ni Presidente Rodrigo Duterte, laban sa TV network.
Sinabi ni Calida na ito ay dahil sa diumano'y “highly abusive practices of ABS-CBN.”
Nagbanta naman si Pangulong Rodrigo Duterte nang makailang-beses na haharangin nito ang franchise renewal ng ABS-CBN.
Hanggang ngayon ay hindi pa rin dinidinig sa Kongreso ang mga panukalang batas na naglalayong palawigin ang prangkisa ng ABS-CBN sa susunod na 25 taon.
Sa March 30, 2020 na mag-e-expire ang franchise ng Kapamilya network.
KAPAMILYA ARTISTS, CELEBS GRATEFUL FOR THE SOLIDARITY
Kabilang sa unang nag-react sa viral photo ng GMA News anchors, na suot ang mga kulay ng ABS-CBN logo, ay ang Broadway performer at Kapamilya star na si Lea Salonga.
Nag-react si Lea sa post ng netizen na si Robert Terranz, na isa sa mga unang nakapansin sa mga kulay ng suot nina Pia, Vicky, at Atom.
Komento ni Lea: “Looks like solidarity to me!”
Ngayong Miyerkules, February 12, muling binanggit ni Lea na naniniwala siyang pagpapakita ng solidarity ang ginawa ng Kapuso anchors.
Ito ang komento ng original Miss Saigon star sa Instagram post ng talent manager at PEP Troika columnist na si Noel Ferrer, na ipinost ang screen shot ng ulat ng PEP.ph.
Komento rito ni Lea: "I vote for solidarity. It's wonderful seeing anchors from another network show full support."
Ganito rin ang paniniwala ng Concert King na si Martin Nievera.
“I’d like to think solidarity,” komento ng Concert King sa post ni Noel.
Aprubado rin ng ABS-CBN reporter na si Niña Corpuz ang gesture ng Kapuso anchors.
“Mabuhay!” naman ang maikling tweet ng Umagang Kay Ganda host na si Gretchen Ho, na nag-share ng link tungkol sa suot ng anchors ng GMA News.
Sinamahan pa ni Gretchen ng heart emojis ang kanyang tweet.
Sunud-sunod din ang pag-retweet ni Gretchen ng links ng gesture ng Kapuso anchors.
Ikinatuwa naman nina Agot Isidro at Jim Paredes ang ginawa ng 24 Oras anchors.
Heart emojis ang tweet ni Agot.
Tweet naman ni Jim: “Proud of you guys. Mabuhay kayo.”
COINCIDENTAL OR SOLIDARITY?
Ngayong Miyerkules, February 12, nakipag-ugnayan ang PEP.ph sa GMA Corporate Communications upang hingan ng reaksiyon tungkol sa pagsusuot ng Kapuso anchors ng ABS-CBN colors sa 24 Oras.
At press time ay hindi pa kami nakatatanggap ng tugon.
Gayunman, tila kinumpirma ni Atom sa kanyang recent tweet na pagpapakita ng suporta ang ginawa nila nina Pia at Vicky sa 24 Oras kagabi.
Sa tweet ng Kapuso anchor, binanggit niya, na sa kabila ng kumpetisyon sa kanilang industriya, nagkakaisa sila sa pagtatanggol ng press freedom.
Tweet ni Atom, na dati ring Kapamilya: “In competition, we bring out the best in each other which hopefully benefits the audience we aim to serve. In defending press freedom as one, we are the proverbial rising tide that lifts all boats.”
Mensahe pa niya: “Our hearts go out to our colleagues in these challenging times. Laban lang!”
KAPUSO ARTISTS RALLY BEHIND KAPAMILYA
May ilang Kapuso artists na ang nagpahayag ng pakikiisa sa mga kapwa artista at kasamahan sa ABS-CBN.
Sunud-sunod ang tweets ni Dingdong Dantes para ipakita ang pakikiisa sa ABS-CBN sa kinakaharap nitong laban, at nanawagan din sa Kongreso na aksyunan ang franchise renewal ng rival network.
Nag-tweet din ng pro-ABS-CBN si Eugene Domingo, na dating Kapamilya star.
Nagpahayag din ng pagsuporta si Aiko Melendez, na nakagawa ng maraming proyekto sa ABS-CBN pero kasalukuyang may teleserye sa GMA Network.