Pinasalamatan ng Kapamilya artists na sina Angel Locsin at Julius Babao si Davao City Mayor Inday Sara Duterte sa paghahayag nito ng suporta sa franchise renewal ng ABS-CBN.
Kaugnay ito ng nalalapit na pag-e-expire ng prangkisa ng pinakamalaking TV network sa bansa sa May 4, 2020.
Sa mga unang ulat, sinabing sa March 30, 2020 mag-e-expire ang prangkisa ng ABS-CBN.
Pero nilinaw ni Justice Secretary Menardo Guevarra na may bisa pa ang franchise ng Kapamilya network hanggang May 4.
Idinaan nina Angel at Julius ang pasasalamat sa Davao City mayor at presidential daughter sa pamamagitan ng posts sa Instagram.
Ipinost ni Julius ang screenshot ng TV report ng pagpabor ni Sara Duterte sa franchise renewal ng ABS-CBN.
Ni-like naman ito ng ni Angel, at ni-repost ang screenshot sa kanyang Instagram Story.
Simpleng caption ng Kapamilya actress: “Thank you Mayora Sara [praying emojis]”
MAYOR INDAY SARA SUPPORTS ABS-CBN
Nitong Huwebes, February 27, na-interview si Mayor Sara sa Sulu.
Pahayag niya, “Davao City fully supports ABS-CBN sa kanila na pagpapa-renew ng kanilang franchise.
“And of course, malaki rin ang suporta ng ABS-CBN sa Davao City at sa buong bansa.
“So hopefully, ma-resolve in a positive way ang issue ng franchise ng ABS-CBN.”
Positibong balita para sa ABS-CBN ang naging pahayag ni Mayor Sara, lalo pa’t ang kanyang ama na si President Rodrigo Duterte ay paulit-ulit sinabing titiyakin niyang hindi mari-renew ang franchise ng TV network.
Ang galit ng Pangulo ay nag-ugat sa hindi pag-ere ng ABS-CBN ng kanyang political ads noong 2016 presidential elections, kahit bayad na ito.
Pero nag-iba ang ihip ng hangin nang mag-sorry sa Pangulo ang pamunuan ng ABS-CBN sa ginanap na Senate hearing noong Lunes, February 24.
Ani Mayor Sara, naniniwala siyang may maawaing puso ang kanyang ama para sa libu-libong manggagawa ng TV network na mawawalan ng trabaho kung magsasara ang ABS-CBN.
Saad niya, “But of course, alam niyo si President Duterte, maawain 'yan na tao, so iniisip din niya yung trabaho ng maraming employees ng ABS-CBN.
“Sinabi naman ng ating Pangulo, ‘no, na iiwan niya sa Kongreso at sa mga korte, sa ating Supreme Court ang desisyon kung ano ang mangyayari sa franchise ng ABS-CBN.”
DUTERTE ACCEPTS ABS-CBN’S APOLOGY
Noong Miyerkules, February 26, na-interview si Pangulong Duterte sa isang event sa Malacañang.
Dito ay sinabi ng Pangulo na tinatanggap niya ang apology ni ABS-CBN President and Chief Executive Officer Carlo Katigbak.
Humingi ng paumanhin si Katigbak sa Pangulo sa ginanap na pagdinig sa Senate Committee on Public Services noong Lunes.
Mas malumanay na rin ang pahayag ng Pangulo pagdating sa isyu ng franchise renewal ng network.
Aniya, “I leave it to Congress…The critical move is in the House and I tell you, I am not going to interfere. Wala talaga ako.”
Itinanggi rin ng Pangulo na mayroon siyang kinausap na sinumang kongresista hinggil sa isyu ng franchise renewal.
“I never, never, never really called anybody about this, even before. Wala akong kinausap na tao dito,” diin niya.
Hindi naman tiniyak ng Pangulo na isasabatas niya ang anumang panukalang batas na magbibigay sa ABS-CBN ng panibagong 25 years to operate.
“I will cross the bridge when I get there. Maybe I will call the media to help me out.
"It would be a difficult decision, really. So I will... I will cross the bridge when I get there.”
Ayaw namang makialam ni Pangulong Duterte sa quo warranto petition na isinumite ni Solicitor General Jose Calida ng Office of the Solicitor General (OSG) sa Supreme Court noong February 10.
Layon ng petisyon ng OSG na kanselahin ang prangkisa ng ABS-CBN dahil sa akusasyong mga paglabag umano ng TV network sa kanilang operasyon.