Kinumpirma ng Brazilian-Japanese model-actor na si Daniel Matsunaga na hiwalay na sila ng Polish model na si Karolina Pisarek.
Si Daniel, 31, ang Pinoy Big Brother: All In (2014) big winner na huling napanood sa ABS-CBN teleseryeng Halik, at sa pelikulang Kahit Ayaw Mo Na noong 2018.
Ang 21-anyos na si Karolina ay naging participant sa Top Model—ang bersiyon ng America’s Next Top Model sa Poland—noong 2015.
October 2017 nang aminin ni Daniel ang relasyon nila ni Karolina.
Sa interviews sa actor-model-athlete sa mga sumunod na taon, ilang beses niyang nabanggit na ipinagdadasal niyang si Karolina na ang “the one” para sa kanya.
Ito ay kahit pa mayroon silang LDR o long-distance relationship.
Narito sa Pilipinas si Daniel, habang nakabase naman sa Los Angeles, California sa Amerika si Karolina.
Mahigit dalawang taon nang magkarelasyon ang dalawa nang mabalita noong January 2020 na hiwalay na sila.
Ang balita ay nagmula sa isang gossip website sa Poland.
Ayon pa sa report, nagkahiwalay sina Daniel at Karolina dahil umano sa “infidelity” ng binata.
Gayunman, walang opisyal na kumpirmasyon ang sinuman kina Daniel at Karolina sa napabalitang hiwalayan nila.
DANIEL CONFIRMS BREAKUP
Pero sa Instagram post ni Daniel nitong Linggo, March 1, isang netizen ang diretsahang nag-usisa sa actor-model tungkol kay Karolina.
Ipinost kasi ni Daniel ang litrato ng kanyang buong pamilya. Nakasuot silang lahat ng puting damit habang nakaharap sa dagat.
Caption ng binata: “My everything [heart emoji] Thank you Jesus for such an amazing family [two praying hands emojis]”
Sa nakalipas na mga taon, madalas na kasama si Karolina sa family pictures na ipinu-post ni Daniel.
Tanong tuloy ng isang Instagram follower ng actor-model: “[slightly sad face emoji] bakit feeling ko wala na kayo ni piekna?”
“Piekna” ang term of endearment noon ni Daniel kay Karolina.
Isang itong Polish word na nangangahulugang beautiful o maganda.
Sagot ni Daniel sa netizen: “tama ka :)”
Nag-reply kay Daniel ang netizen, at sinabing “everything happens for a reason.”
Dagdag pa ng netizen, umaasa siyang matatagpuan din ni Daniel ang “the one” nito.
Ang ibang Instagram followers ng actor-model, nagpahayag ng kalungkutan sa nangyaring hiwalayan.
Ang isa naman, sinabing “may boyfriend nang iba” ngayon si Karolina.
DANIEL’S EXES
Bago nakarelasyon ang Polish model, naging girlfriend din ni Daniel ang mga aktres na sina Erich Gonzales at Heart Evangelista.
Parehong tumagal ng halos dalawang taon ang relasyon ni Daniel kina Erich (2015-2017) at Heart (2010-2012).
Napapabalitang boyfriend ngayon ni Erich ang negosyanteng si Mateo Lorenzo.
Si Heart naman ay limang taon nang happily married kay Sorsogon Governor Chiz Escudero.
