Nagpositibo sa COVID-19 si Department of Education (DepEd) Secretary Leonor Briones.
Si Briones, 79, ang pinakabagong mataas na opisyal ng gobyerno na tinamaan ng virus.
Sa kanyang official statement ngayong Huwebes, April 9, sinabi ng kalihim na tungkulin niyang ihayag sa publiko ang resulta ng kanyang COVID-19 test.
Ayon sa opisyal, Miyerkules ng hapon, April 8, nang makumpirma niyang nagpositibo siya sa virus.
Sinabi rin ng DepEd Chief na dalawang beses siyang nagpa-swab test.
Ang una ay noong March 13, na negatibo ang resulta.
At ang pangalawa ay nitong April 2.
BRIONES EXPLAINS SECOND SWAB TEST
Paliwanag ni Briones, muli siyang sumalang sa COVID-19 testing matapos ideklara ng isa pang Cabinet member "that he was tested and declared positive."
Hindi pinangalanan ng kalihim ang lalaking opisyal ng Gabinete.
Dagdag niya, “He and I attended an urgent and critical meeting of select Cabinet officials on March 23.”
Si Department of Interior and Local Government (DILG) Secretary Eduardo Año ang huling Cabinet member na nagpositibo sa COVID-19.
ASYMPTOMATIC, ISOLATED, AND WORKING
Sinabi ni Briones na sa ngayon ay asymptomatic siya, na ibig sabihin ay wala siyang nararamdamang sintomas ng sakit.
Tiniyak din ng DepEd Secretary na patuloy siyang magtatrabaho habang naka-quarantine.
“[I] will preside over the DepEd executive committee and management committee, and make all decisions necessary to keep DepEd in full operation.”
Makikibahagi rin daw siya “virtually” sa mga meeting ng Inter-Agency Task Force (IATF) for the Management of Emerging Infectious Diseases.
Ang IATF ang pangunahing in-charge sa pagtugon sa COVID-19 pandemic sa bansa.
Kasabay nito, hinikayat ng kalihim ang mga taong nagkaroon ng close contact sa kanya sa nakalipas na mga araw na sumailalim sa “precautionary self-quarantine at home.”
Nakikipag-ugnayan na rin daw ang DepEd sa Department of Health (DOH) para sa contact tracing.
OTHER GOVERNMENT OFFICIALS WHO TESTED POSITIVE FOR COVID-19
Bukod kina Briones at Año, nagpositibo rin sa COVID-19 sina Armed Forces of the Philippines (AFP) Chief of Staff General Felimon Santos Jr. at Metropolitan Manila Development Authority (MMDA) General Manager Jojo Garcia.
Tinamaan din ng virus ang isang one-star general ng AFP, isang undersecretary ng DOH, at isang regional director ng DOH.
Pawang hindi pinangalanan ang tatlo.
Tatlong senador din ang dinapuan ng COVID-19: sina Senators Migz Zubiri, Koko Pimentel, at Sonny Angara.
Tanging sina AFP Chief Gen. Santos at Senator Angara ang nag-anunsiyo sa publiko na naka-recover na sila sa COVID-19.
Lagpas 4,000 na ang kumpirmadong kaso ng COVID-19 sa bansa.
Ayon sa latest update ng DOH ngayong Huwebes, 4,076 na ang nagpositibo sa virus.
Ito ay matapos na nakapagtala ng 206 na bagong kaso ngayong araw.
Nasa 124 na ang gumaling, habang 203 ang binawian ng buhay.