Napaluha si Billy Crawford, 37, habang nagkukuwento tungkol sa pagbubuntis ng kanyang misis na si Coleen Garcia, 27.
Nitong weekend, inanunsiyo ng showbiz couple via social media na five months pregnant na si Coleen.
Ikinasal sina Billy at Coleen sa Balesin Island Club sa Polilio, Quezon, noong April 20, 2018.
Bagamat Enero 2020 pa nang malaman nilang buntis si Coleen, inilihim muna ito ng mag-asawa sa publiko.
Ang tanging pinagsabihan daw nila ay ang mga malalapit na kaibigan at kapamilya.
Naghintay muna raw sila ng tamang timing bago ito isapubliko dahil naging maselan ang pagbubuntis ni Coleen.
“Tumitiyempo rin lang kami," sabi ni Coleen sa YouTube video nila ni Billy na in-upload noong May 1, Biyernes.
"We were just trying to find the right timing, past the first trimester.
“Kasi yung first trimester, talagang maselan, maraming puwedeng mangyari.
"Very sensitive pa yung pregnancy, so we really waited muna.”
EMOTIONAL BILLY
Hindi naman napigilan ni Billy ang maiyak dahil sa katuparan ng kanyang pangarap na makabuo ng sariling pamilya sa kabila raw ng kanyang mga pagkukulang.
Sa usapan nila ni Coleen, binalikan ng singer-host ang naging pag-uusap nila ng kanyang American father na si Jack Crawford.
Sa Texas, U.S.A. nakatira si Jack, kasama ang Filipina mother ni Billy, si Mayette Ledesma.
Minsan daw ay ikinuwento ni Billy sa ama na pangarap nitong magkaroon ng sariling pamilya kasama si Coleen.
Maluha-luha si Billy nang sabihin nitong hindi niya inakalang masasaksihan pa kanyang ng ama ang kasal nila ni Coleen.
Dalangin din daw niyang makita pa ng ama ang apo nito.
Kuwento ni Billy, “I remember telling my dad, as long as he stays alive just to witness our marriage was very important for me.
“And, I guess, it’s just a bigger plus that my dad is still alive.
"And hopefully he’s still alive during the birth of my child.”
Patuloy niya, "I pray to God that he’ll just be there just to witness the cry of his grandson or [grand]daughter so that he’ll always remember it.
“Because I know my dad won’t stay there forever. I’ve accepted that already.
"But it’d be nice for God to bless me with that.”
November 2019, nabanggit ni Billy sa Kapamilya late-night talk show na Tonight with Boy Abunda (TWBA) ang tungkol sa pagkakasakit ng ama.
Nakita raw niya ang “deterioration” ng kalusugan ng ama dahil sa mga bisyo nito sa alak at sigarilyo.
Ito raw ang nag-udyok kay Billy na alagaan ang sarili at maging malusog kapag nagkaroon ng sariling pamilya.
Sambit ng emosyonal na si Billy: “I just wanna be the best father.”
Paniniyak naman sa kanya ni Coleen: “You will be.”
Pag-amin ni Billy: “I’m not that great of a husband. I’m trying…
"But I think I can be a better husband. I can be a good father.”
Sinigurado naman ni Coleen sa kanya na isa siyang “good husband.”
COLEEN ON BILLY’S DRINKING PROBLEM
Sa mga nakaraang interviews ni Billy, bukas ito sa pagsasabing iniwan niya ang pagiging regular host ng ABS-CBN noontime show na It’s Showtime noong 2018 para gawing prayoridad ang pamilya.
Host si Billy sa noontime show mula pa noong 2011.
Pero dumaan din sa pagsubok ang pagsasama nila ni Coleen.
November 2019, nagsalita si Billy sa isyu ng kanyang biglang pagpayat.
Marami ang nagtanong kung may sakit ba ito.
Sa TWBA, ibinunyag ni Billy ang pangunahing dahilan ng kanyang pagpayat.
Itinigil raw niya ang kanyang bisyo na pag-inom ng alak.
Dati raw ay nakakaubos siya ng isang bote ng Black Label sa isang araw.
Masaya ring binanggit ni Billy na isang taon na niyang itinigil ang kanyang pagkalulong sa alak.
Tugma ito sa kuwento ni Coleen sa isang interview noong January 2020.
Sabi noon ng aktres, “Actually, kasi si Billy, he used to drink at home.
“Nakakaisang bottle siya on his own.
“It’s really not healthy, it’s not productive, it’s not good for you in any way talaga.”
Kaya naman laking tuwa raw niya nang magbago si Billy.
“He quit alcohol for more than a year now, talagang ibang-ibang tao na siya ngayon.
“And he’s cool with his temper and everything, and very reasonable to talk to.
“Level-headed na, hindi na siya yung nag-a-outburst kagaya ng dati,” saad ni Coleen.
Tungkol naman sa biglaang pagpayat ni Billy, sinabi ni Coleen na side effect ito ng pagtigil ni Billy ng kanyang bisyo.
“Well, I mean, the weight wasn’t really a problem, but it became, like, a side effect of everything.
"I guess, a side product of quitting all the bad habits was losing the weight,” paliwanag ng aktres.
Samantala, nabanggit sa YouTube video ng mag-asawa na inaasahang manganganak si Coleen sa September 2020.
(Isa ka bang showbiz fan na laging updated at naghahanap ng latest chika? Share what you know. Join here!)