“fake news po…”
Bahagi ito ng paglilinaw ng aktor na si Rez Cortez kaugnay ng kumakalat na pekeng balitang pumanaw na siya.
Dakong ika-8:00 ng gabi ngayong Martes, June 16, nag-post sa kanyang Facebook page ang 64-anyos na batikang actor-director.
Diretso ang mensahe ni Rez: “Hello everyone! I just want to say that I'm alive and kicking [laughing emoji] fake news po itong kumakalat.
“Wag na lang I click or ishare.
“Mabalos [smile with hearts emojis] God bless us!”
Naka-attach sa post ni Rez ang screenshot ng diumano’y post ng mismong video na inatake siya.
Taglay ng nasabing larawan ang logo ng "GMA News."
Makikita sa nakapaloob na larawan ang naka-side view na si Rez, na nakahawak sa kanyang dibdib at tila may dinaramdam .
Tila kuha ang imahe sa isang nilabasang TV project ni Rez.
Ganito ang caption (published as is): “Aktor na si REZ CORTEZ Inatake, Patay. Vinideo Pa Imbes na Tulongan Dahil Baka Daw Covid19|Today, June 2020
Nakalagay pa rito “ACTUAL VIDEO”
Ilan sa mga pinakahuling teleseryeng ginawa ni Rez ay sa GMA-7 ay ang One of the Baes (2019), Dahil sa Pag-ibig (2019), at Ika-5 Utos (2018-2019).
"THANK GOD FOR THE TRUTH"
Bumuhos naman ang pasasalamat ng supporters ni Rez na fake news lang ito.
Isa sa mga nag-react ay ang kapwa niya aktor na si Rey “PJ” Abellana: “Thank God for d truth! God bless brother.”
Ibinahagi naman ng ibang netizens ang disgusto nila sa ginawang pag-imbento ng pekeng balita, kung saan si Rez ang latest victim.
Hindi nalalayo rito ang sinapit ni BB Gandanghari, na halos ganito rin ang naranasan noong Abril.
Kumalat sa social media ang screenshot ng gawa-gawang TV newscast tungkol sa pagpanaw raw ni BB, na natagpuan umanong wala nang buhay sa kanyang apartment sa Amerika.
Nag-react dito si BB na bagama’t nilinaw na fake news ang death hoax ay ikinagulat daw rin niya ito.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika