Pumanaw na ang movie icon na si Tony Ferrer sa edad na 86.
Ang pagpanaw ni Tony, Antonio Laxa ang tunay na pangalan, ay kinumpirma ng anak niyang si Mark Laxa sa entertainment writer na si Mell Navarro.
Ayon sa reports, sumakabilang-buhay si Tony ngayong Sabado ng umaga, January 23, sa kanilang bahay sa Pasig City dahil sa sakit sa puso.
Si Tony ay lolo ng young actor na si Donny Pangilinan. Anak ni Tony ang ina ni Donny, ang actress-author na si Maricel Laxa, 50.
Bukod kina Maricel at Mark, anak din ni Tony ang dating aktres na si Mutya Crisostomo.
JAMES BOND OF THE PHILIPPINES
Isinilang sa Macabebe, Pampanga noong June 12, 1934, sumikat si Tony noong 1960s at 1970s bilang “James Bond of the Philippines.”
Si James Bond and iconic fictional character ng British novelist na si Ian Fleming.
Taong 1953 nang unang binigyang-buhay sa pelikula si James Bond bilang isang British super spy, na tinatawag ding Agent 007.
Dekada '60 naman nang pumatok ang pagbibida ni Tony bilang ang spy at secret agent na si Tony Falcon sa movie series na Agent X-44.
Nauna rito, ang unang pelikula ni Tony ay ang Kilabot sa Barilan, na pinagbidahan ni Fernando Poe Jr. o FPJ at ipinalabas noong 1960.
Sa sumunod na mga taon, gumawa si Tony ng napakaraming action films at nakatrabaho ang mga pinakasikat na actions stars sa bansa, tulad nina Ramon Revilla Sr. (Nardong Putik, 1972), Ramon Zamora (Experts, 1979), Lito Lapid (Back to Back, 1979), Rey Malonzo (Deadly Fighters, 1979), at Ace Vergel (Pangkat Do or Die, 1980).
Nakatrabaho niyang muli si FPJ sa Ang Agila at ang Falcon (1980) at nakaeksena sa action stunts maging ang mas batang action stars na sina Ramon “Bong” Revilla Jr. (Chinatown: Sa Kuko ng Dragon, 1988), Ronnie Ricketts (Black Sheep Baby, 1989), at Jess Lapid Jr. (Isang Milyon sa Ulo ni Cobra, 1990).
Sa pinagbidahang drama films, nakaeksena naman ni Tony sina Snooky Serna (The Golden Child, 1971), Chanda Romero (Alat, 1975), Alma Moreno (Jailbreak!, 1976), Niño Muhlach (Wonder Boy, 1976), at Nora Aunor (Sa Lungga ng mga Daga, 1978).
Napanood din si Tony sa international films na The Vengeance of Fu Manchu (1967), Blind Rage (1978), at Cover Girl Models (1975).
Taong 2007 nang huling mapanood si Tony sa pelikula, nang magkaroon siya ng special participation sa Agent X44 remake ni Vhong Navarro.
“SUPER GROOVY LOLO”
June 14, 2019 nang ibinahagi ni Donny kung paanong naging espesyal para sa kanya ang pagdiriwang ng 85th birthday ng kanyang Lolo Tony.
Sa Instagram, ipinost ni Donny ang picture nila ng kanyang Lolo Tony habang nasa mall.
Tony with grandson Donny
Sa caption, tuwang-tuwang ikinuwento ng young actor na napapayag niyang lumabas ng bahay ang retiradong actor-director.
Kasama ang kanilang pamilya, dinala raw ni Donny sa shopping mall si Tony para roon kumain.
Post ni Donny: “This super groovy lolo of mine never (as in never) leaves his house.
“Last time I remember seeing him out was maybe more than 5 years ago because of his vertigo.
“But he allowed me to take him out for his 85th birthday with my mom and other relatives.”
Subalit kung naging espesyal man ang araw na iyon para kay Tony, mas naging makabuluhan naman iyon para kay Donny dahil sa touching na pasasalamat ng kanyang lolo.
Kuwento ni Donny: “At the end of the day when no one was looking he got my hand and said 'Thank you Donny ha, hindi ko ito makakalimutan' then we hugged.”
At press time, burado na sa Instagram feed ni Donny ang post niyang ito.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika