“Manner of death as homicide is ruled out in Dacera’s case because aortic aneurysm is considered a medical condition. Rape and/or drug overdose will not result to the development of aneurysm.”
Ito ang bahagi ng nakasaad sa latest medico-legal report na inilabas ng Philippine National Police (PNP) Crime Laboratory na resulta ng kanilang eksaminasyon sa mga labi ni Christine Dacera.
Sa report na ipinasa ng PNP sa Makati City Prosecutor’s Office kahapon, January 27, idinetalye nila ang ginawang eksaminasyon kay Dacera.
Sa eksklusibong report ni Emil Sumangil sa 24 Oras ng GMA kahapon, ipinakita rito ang mga larawan sa mga tissue at organ samples na nakuha sa katawan ng yumaong flight attendant.
Makikita sa unang larawan ang descending aorta o malaking bahagi ng ugat sa puso kung saan kapansin-pansin ang sugat na naging sanhi ng aneurysm ni Dacera.
Sa ikalawang larawan, ipinakita ang tissue sample sa bandang dibdib kung saan nakitaan ng blood clots sa paligid ng pumutok na ugat.
Makikita naman sa ikatlong larawan ang microscopic view ng aorta kung saan nagkaroon ng hemorrhage sa paligid nito.
Ang ikaapat na larawan ay ang microscopic view pa rin ng aorta kung saan ipinakita ang may sugat na bahagi na siyang sanhi ng pagdurugo.
Sa ikalima at ika-anim na larawan, ipinakita ang pagdurugo sa labas ng aortic wall ni Daceta.
Pirmado ni Dr. Joseph Palmero,Medico-Legal Officer ng PNP head office, ang mga ilustrasyon.
Sa konklusyon ng medico-legal report, natural at walang foul play sa pagkamatay ni Dacera.
Saad pa rito: “Based on available information on hand, the manner of death is classified as natural death."
NO MALE DNA SAMPLE FOUND
Kahit hindi kasama sa medico-legal report ng PNP, may source ang GMA News na nagsabing wala raw nakikitang ebidensiya ang crime lab para sabihing nagahasa ang namatay.
Wala rin daw lumabas na DNA ng lalaki sa mga swab na nakuha kay Christine.
Dahil sa bagong development na ito, nabuhayan ng pag-asa ang respondents sa kaso dahil lumalabas na walang krimeng nangyari.
Nauna nang sinampahan ng Makati PNP sa piskalya ng provisional rape with homicide ang labintatlong respondents sa Dacera case.