Ipinagbunyi ng ilan sa respondents sa Christine Dacera case ang pagbasura ng Makati Prosecutor's Office sa reklamong rape with homicide na inihain ng Philippine National Police (PNP) laban sa kanila.
Sa kani-kanilang social media accounts, nag-post sina Valentine Rosales at Rommel Galido ng celebratory messages sa naging desisyon ng korte.
Ayon kay Valentine, answered prayers ito ng kanilang kampo laban sa mapanirang reklamong ibinabato sa kanila.
Post niya sa Facebook ngayong araw, April 27: “CASE DISMISSED
"TRUTH PREVAILED! NAKAKAIYAK!!! THANK YOU GOD! FOR THE ANSWERED PRAYERS [praying hands emoji]
“Philippians 4:6-7 do not be anxious about anything, but in everything by prayer and supplication with thanksgiving let your requests be made known to God.
“And the peace of God, which surpasses all understanding, will guard your hearts and your minds in Christ Jesus.”
Nagbahagi rin siya ng Bible verse mula sa Exodus: “Thank God and PRAISE HIM! Because the TRUTH came out, and true to God’s word in Exodus 14:14 ‘The Lord will fight for you and you shall hold your peace!’”
Nag-post din si Valentine sa kanyang Instagram Stories ng mensahe tungkol sa pagkabasura ng reklamo.
Nakalagay sa kanyang post, “CASE DISMISSED [praying hands emojis] THANK YOU GOD!”
Si Rommel naman ay nagbahagi sa Instagram Stories ng screenshot ng resolusyon ng Makati Prosecutor’s Office.
Caption niya, “Case dismissed [fist, praying hands emojis]”
LACK OF PROBABLE CAUSE
Hindi nakitaan ng piskalya ng sapat na ebidensiya ang reklamo laban sa 11 respondents sa Dacera case kaya hindi na aakyat sa husgado ang reklamo para sa pormal na paglilitis.
Bukod kina Rosales at Galido, ang siyam pang respondents ay sina JP Dela Serna, Louie De Lima, Mark Anthony Rosales, John Paul Halili, Gigo de Guzman, Clark Jezreel Rapinan, Rey Englis, Jammyr Cunanan, at Ed Madrid Pangilinan.
Hindi pa naglalabas ng resolusyon ang korte tungkol naman sa reklamo ng National Bureau of Investigation (NBI) na may kaugnayan sa paglabag sa Comprehensive Dangerous Drugs Act, perjury, obstruction of justice, at reckless imprudence resulting in homicide.
Natagpuang wala nang buhay si Dacera sa banyo ng kuwartong nirentahan nilang magkakaibigan sa City Garden Grand Hotel sa Makati noong January 1, 2021 matapos silang magdaos ng New Year’s Eve Party mula gabi ng December 31, 2020.
Ayon sa resulta ng medico-legal examination ng Philippine National Police Crime Laboratory, walang foul play sa pagkamatay ng flight attendant dahil ruptured aortic aneurysm ang sanhi ng kanyang kamatayan.
Wala pang pahayag na inilalabas ang kampo ng pamilya Dacera kaugnay ng desisyon ng Makati Prosecutor's Office.