Muli na namang napansin ng supermodel-TV host na si Tyra Banks ang ganda ng Pinay beauty queens.
Ngayong araw ng Huwebes, May 20, ni-repost ni Tyra ang tweet ni Miss Universe 2018 Catriona Gray ukol sa panlaban natin sa Miss Universe 2020 na si Rabiya Mateo.
Laman ng mensahe ni Catriona ang papuri niya sa Ilongga beauty queen na nakapasok sa Top 21 ng MIss Universe ngayong taon.
Hindi kasi naputol ang tradisyon na makapasok ang kandidata ng Pilipinas sa semifinals ng Miss Universe sa loob ng labing-isang taon.
Saad ni Catriona sa kanyang tweet ilang sandali pagkatapos ng grand coronation ng Miss Universe 2020 noong Lunes, May 17: “Woooow this year is intense!! Sending Rabiya all of our love! She made our country proud!
“11 Year consecutive semi-streak Pilipinassss #MissUniverse”
Ni-retweet ito ng host ng America's Next Top Model na si Tyra Banks.
Sabi niya sa kanyang caption: “Pretty Pinoy Power Forever! #MissUniverse”
Nagpasalamat naman ang maraming Pinoy at napansin ni Tyra ang ganda ng Pinay beauty queens.
Mula 2010 hanggang ngayong taon, palaging pasok sa semifinals o nagkakapuwesto ang Pilipinas sa Miss Universe.
Kabilang sa kanila sina Venus Raj (Miss Universe 2010, fourth runner-up), Shamcey Supsup (Miss Universe 2011, third runner-up), Janine Tugonon (Miss Universe 2012, first runner-up), Ariella Arida (Miss Universe 2013, third runner-up), MJ Lastimosa (Miss Universe 2014, Top 10).
Mula 2015 naman hanggang 2020, dalawa ang nakapag-uwi ng korona ng Miss Universe sa bansa.
Sila ay sina Pia Wurtzbach (Miss Universe 2015) at Catriona Gray (Miss Universe 2018).
Ang iba pang masuwerteng nakapasok sa semifinals ay sina Maxine Medina (Miss Universe 2016, Top 6), Rachel Peters (Miss Universe 2017, Top 10), Gazini Ganados (Miss Universe 2019, Top 20), at si Rabiya (Miss Universe 2020, Top 21).
Si Andrea Meza ng Mexico ang kinoronahang Miss Universe 2020.