Sumakabilang buhay na si Manuel "Manoling" Morato, dating chairman ng Movie and Television Review and Classification Board (MTRCB) at board director ng Philippine Charity Sweepstakes Office (PCSO).
Si Morato ay pumanaw kaninang 2:30 ng hapon, Biyernes, July 30, sa isang ospital sa Quezon City dahil sa COVID-19. Siya ay 87 taong gulang.
Kinumpirma ng pamilya ni Morato ang kanyang pagpanaw sa ABS-CBN News.
Ayon pa sa pamilya ng dating MTRCB chairman, hindi nila inasahan ang mabilis na pag-deteriorate ng kalusugan nito, apat na araw pagkatapos nitong maospital.
Nagpaabot agad ng pakikiramay ang tanggapan ng MTRCB, na pinamumunuan ngayon ni Rachel Arenas.
Nakasaad sa mensahe na naka-post sa Facebook page ng MTRCB:
"The whole of the MTRCB family joins in mourning the loss of Manuel "Manoling" Morato, Former Chairperson and legend of the Philippine entertainment industry. Your contributions to history, the national discourse and the lives of the Filipino people will remain ever large in our hearts.
"You will be missed Sir!"
Si Morato ang ikalawang naging chairperson ng MTRCB, ang ahensiya ng gobyerno na inatasan upang mag-review at magbigay ng classification sa mga pelikula at TV shows na ipinalalabas sa bansa, na itinatag noong taong 1985.
Kilala si Morato sa pagsugpo ng mga "penekula" (penetration films) sa panunungkulan niya mula 1986 hanggang 1992, sa ilalim ng administrasyon ni dating Pangulong Corazon Aquino.
THE LAST INTERVIEW
Nito lamang July 10, 2021 ay na-interview pa ng entertainment press, kabilang ang PEP.ph, si Morato para sa isang solution spray sa Marco Polo Hotel, Meralco Avenue, Pasig City.
Dito ay binalikan ni Morato ang kanyang panunungkulan sa MTRCB.
Ito ang bahagi ng panayam kay Morato na isinulat ng PEP columnist na si Jerry Olea at na-publish dito noong July 11:
Dahil sa mahigpit na pamamalakad niya noon sa MTRCB, marami ba siyang naging kaaway sa showbiz?
“Hindi ako nakikipag-away sa kanila,” nakangiting tugon ni Morato.
“Inaaway ako pero I was just implementing the law. Because if I approve it, I’m the one who’ll go to jail."
Ayon pa sa dating MTRCB chairman, ang pinakamahirap na phase ng nabanggit na ahensiya ay ang kanyang term.
“Kasi, laganap noon ang bomba films,” pagdidiin ni Morato.
“When I stepped down, Mother Lily was the first one naman to acknowledge on television, na it was the golden years of the film industry raw.
“Kasi, ayaw silang maniwala sa akin. Sinasabi ko, ‘Lily, kung magbobomba-bomba films, mga 5% lang ng mga sira-ulo ang magiging kliyente ninyo.
“‘Pero if you follow the law, and you go down to Parental Guidance, because bawal ang X-rated, e… Pati sa television, bawal ang adult [contents].
“It has to be up to Parental Guidance, General Patronage. Sabi ko, ‘You try to do clean films, especially yung mga suitable for children. Because manonood lahat, from the lolo, the parents, the children.’
“Napuno ang mga sinehan noon. Kaya noong mag-step down ako, sinabi ni Lily na during my term daw was the golden years of the movie industry, and they all made money.
“Paano ka kikita sa bomba films, it’s not even 5% of the public that go and watch? Yung mga may sira lang ang ulo!”
Sinugpo noon ni Morato ang mga penekula.
“Pinatay ko. It took me two years, but I killed the bomba films!” bulalas niya.
Nung panahon din ni Morato as MTRCB chairman, maraming film titles ang disapproved at pinalitan.
“Kagaya ng Materyales Fuertes. OK, materiales fuertes, Spanish phrase meaning “strong materials," pero pag inilagay mo [ang title] sa ibabaw ng suso ng isang babae, ano ba ang ibig sabihin niyon? I also turned it down.”