Ikinasal na ang ABS-CBN actress na si Ritz Azul 27, sa kanyang first-and-last boyfriend na si Allan Guy, 31.
Ginanap ang kasal ng dalawa sa Alphaland Baguio Mountain Lodges nitong Sabado, November 20, 2021.
Nagmistulang diwata sa ganda si Ritz sa suot nitong wedding gown na idinisenyo ng fashion designer na si Mak Tumang.
Kabilang sa kanyang glam team ang make-up artist na si Jason delos Reyes at hairstylist na si Mark Anthony Rosales.
Ibinahagi ni Mark sa kanyang Instagram ang ilang litrato ni Ritz habang naghahanda para sa kanyang kasal.
Caption nito: "RITZ AZUL Wedding [emoji] #MarkedBride #Bride #Wedding"
Samantala, makikita sa isang litrato si Miles Ocampo, na kabilang sa bridesmaids.
RITZ AND ALLAN'S RELATIONSHIP
"No Boyfriend Since Birth" (NBSB) si Ritz bago nito nakilala si Allan.
Noong September 2018, sa press conference ng pelikula nila ni Pepe Herrera na The Hopeful Romantic, unang ibinunyag ng aktres na mayroon nang nagpapatibok ng kanyang puso.
Kuwento niya noon tungkol kay Allan, "Ngayon, may ini-entertain na ako, dating, and he’s not from showbiz. Nag-start lang sa barkada.
"Hindi ko binibilang iyong romantic date. Cowboy kasi ako, e, mostly nga kasama naman iyong friends," sabi ni Ritz.
Dagdag niya, "Kasi for the past few years, focused ako sa career. Mas inisip ko kasi iyong ibang bagay kesa sa personal kong buhay.
"Ako kasi, masyado akong futuristic mag-isip kaya medyo naiwan ko iyong side na iyon sa kabataan ko.
"Saka nung time na yun, naghihintay ako ng guy na hindi makakaabala sa ginagawa ko, kumbaga, susuporta pa rin. So far, iyong guy na ito, sumusuporta siya."